2 SAMUEL 3

1Saul innchungkhar le David inn-chungkhar karlakah khan i dohnak saupi a um; David cu a ṭhawng chin lengmang i sihmanhsehlaw Saul innchungkhar cu an der chin lengmang.

Hebron Ah David Fapa Hna

(1Cha 3.1-4)

2Cun David nih Hebron khua ah cun fapa a hrin hna: a fater cu Jezreel khuami Ahinoam fapa Amnon a si; 3a pahnihnak cu Karmel ram Nabal nupi ro Abigail i fapa Khileab a si; a pathumnak cu Geshur siangpahrang Talmai i fanu Maakah i fapa Absalom a si; 4cun a palinak cu Haggith fapa Adonijah a si; a panganak Abital fapa Shefatiah a si; 5a paruknak cu David nupi Eglah fapa Ithream a si. Mah hna hi David nih Hebron ah a hrin hna.

Abner Nih David A Doh

6Saul innchungkhar le David inn-chungkhar karlak i dohnak a um lioah khan Abner nih amah le amah kha Saul innchungkhar chungah khan miṭhawng ah aa ser. 7Saul nih khan nuchun pakhat a rak ngei i a min cu Rizpah a si, amah cu Aiah fanu a si; cun Ishbosheth nih khan Abner cu, “Zeicahdah ka pa nuchun sinah khan na vung luh?” tiah a ti. 8Khi tikah Ishbosheth bia ruangah khan Abner cu a thin a hung ngaingai i, “Judah pawl uico lu maw ka si! Nihin tiangin na pa Saul innchungkhar hna cung le a unau hna cung le a hawikom hna chungah zumhawktlak in ka um ko rih i David kut chungah nangmah cu kan chaan lo; cun maw nang nih nihin ah hin, nu he sual na hei ka puh. 9-10Pennak cu Saul hrin chungin ṭhial i David bawi ṭhutdan cu Israel le Judah cungah Dan in Beersheba tiang fehter awkah Bawipa nih a sin i chiat a sermi kha David caah ka tlinter lo ahcun, Pathian nih cu bantukin le tam deuh zongin Abner cungah hin tuah ko seh,” tiah a ti. #1Sam 15.28 11Cun Ishbosheth nih Abner cu a ṭih caah bia dang kaa khat hmanh a let kho lo.

12Cun Abner nih David sinah khan Hebron ah lamkal a hei thlah hna i, “Ram hi aho ta dah a si? Keimah he biakamnak ser law, zohhmanh, Israel mi vialte cu nangmah sin i komhter awkah ka kut cu nangmah sinah a ṭang lai,” tiah a ti. 13Cun anih nih, “A ṭha ko; nangmah he biakamnak cu ka ser lai; sihmanhsehlaw nangmah sinin thil pakhat kan hal; cu cu Saul fanu Mikhal kha ka hmai hmuh awk i na rat tikah na ratpi hmasa lo ahcun, ka hmai na ka hmu lai lo,” tiah a ti. 14Cun David nih Saul fapa Ishbosheth sinah khan lamkal a hei thlah hna i, “Filistin mi cuarpar za khat in ka hammi ka nupi Mikhal kha ka pe tuah,” tiah a ti. #1Sam 18.27 15Cun Ishbosheth nih cun mi a hei thlah hna i amah cu Laish fapa Paltiel, a va sin khan a lakter hna. 16Sihmanhsehlaw a va nih khan a zulh i Bahurim tiangin a ṭah lengmang. Cun Abner nih amah cu, “Va kal law va kir tuah,” tiah a ti i a kir.

17Cun Abner nih cun Israel upa hna kha a pumhpi hna i, “Kan hnulei nawn khan David cu nan siangpahrang si awkah nan kawl lengmang cang. 18Cucaah atu cu tlinter tuah u; zeitintiah Bawipa nih David cu bia a kam i, ‘Ka sal David kut in ka mi Israel mi hna cu Filistin mi kut chung le an ral vialte hna kut chungin ka chuah hna lai,’ a ti,” tiah a ti. 19Abner nih Benjamin mi zong kha a chimh hna; cun Abner cu David kha, Israel mi le Benjamin hrin vialte nih tuah awkah a ṭha ti i an ruahmi vialte kha Hebron i va chimh awkah a kal.

20Abner cu David sinah Hebron ah mi pakul he a rat tikah, David nih Abner le a sin i a ummi hna caah cun rawl danghnak a tuah. 21Cun Abner nih David sinah, “Ka va kal lai i siangpahrang bawipa sinah khan, Israel mi vialte cu ka pumh hna lai. Nangmah he biakamnak an ser lai i na lung duhmi a rak si bang khan na uk hna lai,” tiah a ti. Cucaah David nih Abner cu a kalter i daihnak in a kal.

Joab Nih Abner A Thah

22Cu hnu tlawmpalte ah cun David sinum hna cu ral an hranhnak khan Joab he an kir i hranchaw tampi an rak i phorh. Sihmanhsehlaw Abner cu David sinah Hebron ah a rak um lo, zeicahtiah a rak kalter cang i daihnak in a rak kal cang. 23Joab le a sinah a ummi ralkapbu vialte cu an rat tikah Joab cu, “Ner fapa Abner kha siangpahrang sinah a ra i amah nih a kalter i daihnak in a kal cang,” tiah an chimh. 24Khi tikah Joab cu siangpahrang sinah khan a va kal i, “Zeidah na rak tuah? Zohhmanh, Abner cu na sinah a rak ra; zeicahdah na rak kalter i cucaah a rak kal diam cang? 25Ner fapa Abner nih hin nangmah kha hlen awkah le na luh na chuah le na tuahmi vialte kha hngalh awkah a ra tiah na hngalh ko ṭung,” tiah a ti.

26David sinin Joab kha a chuah tikah, Abner kha mi a hei dawiter hna i Sirah tikhor khan an rak kirpi ṭhan; sihmanhsehlaw cu kong cu David nih a hngal lo. 27Cun Abner kha Hebron i a ra kir tikah Joab nih a thli in biaruah awkah hauka chungah khan ken khat ah a kalpi i a nau Asahel thisen caah khan khika ah a paw ah a chunh i a thi. 28A hnuah, mah cucu David nih a theih tikah, “Keimah le ka pennak cu Bawipa hmaika ah Ner fapa Abner thi kongah hin a zungzal in mawhchiat awk um lo kan si ko. 29Dantatnak Joab lu cung le a pa innchungkhar vialte cungah tla ko seh; cun Joab chung hna lakah hin thil chuak a ngeimi siseh, thinghmui zawtnak a ngeimi siseh, lathlur a tlaimi siseh, vainam nih a thahmi siseh, rawl a pammi siseh, ṭhing bal hna hlah seh!” tiah a ti. 30Cuticun Joab le a unau Abishai nih Abner kha an thah, zeicahtiah amah nih khan Gibeon i raltuknak hmun ah khan an unau Asahel kha a rak thah.

31Cun David nih Joab le a sin i a ummi vialte kha a thawh hna i, “Nan puan kha thlek hna u law, buri kha i aih u law, Abner kha ngai tuah u,” tiah a ti hna. Cun Siangpahrang David nih ruakkuang kha a zulh. 32Abner cu Hebron ah an vui; cun siangpahrang nih fak piin Abner thlan ah khan a ṭap; cun mi vialte zong kha an ṭap. 33Cun siangpahrang nih Abner kha ṭah hla a lawh i,

“Abner hi mihrut thih bangin maw

a thih ko lai!

34Na kut kha ṭem an si lo i na ke kha

hreng khenh an si lo;

Miṭhalo hmai i a tlumi bantukin na

tluk ko hi ta,” tiah a ti.

Cun mi vialte nih an ṭah ṭhan. 35Cun mi vialte nih David cu chun a si rih lioah khan rawl ei fial awkah an ra, sihmanhsehlaw David nih chiat a ser i “Ni a tlak hlan i changreu siseh, zeipaoh siseh ka teh ahcun, Pathian nih hi bangin le hi nak tam deuh zongin ka cungah tuah ko seh!” tiah a ti. 36Cun cucu mi vialte nih an hmuh i, siangpahrang nih a tuahmi thil zeipaoh nih an lung a ton tawn hna bang khan, an lung a ton ngaingai hna. 37Cucaah mi vialte le Israel mi vialte nih, Ner fapa Abner thah kha siangpahrang duhnak cu a rak si lo ti kha khi ni ah khan an hngalh. 38Cun siangpahrang nih a sinum hna sinah cun, “Nihin ah hin Israel mi chungah bawi le mingan pakhat a thi ti kha nan hngal lo maw? 39Siangpahrang ah chiti thuh ka si nain, nihin ah hin ka der ko; hi mi Zeruiah fapale hna hi ka caah an hak tuk. Bawipa nih ṭhat lonak a tuahtu cu a ṭhat lonak bantukin rul ko seh!” tiah a ti.

Currently Selected:

2 SAMUEL 3: HCL06

Highlight

Copy