2 SAMUEL 2
2
David Cu Judah Siangpahrang Ah A Cang
1Hi hnuah hin David nih Bawipa kha a hal i, “Judah ram chung khua pakhatkhat ah ka hung kal lai maw?” tiah a ti. Cun Bawipa nih amah cu, “Hung kal,” tiah a ti. David nih, “Khuazei ah khin dah ka hung kal hnga?” tiah a ti. Anih nih, “Hebron ah,” tiah a ti. 2Cucaah David cu khika ah khan a hung kal, a nupi pahnih Jezreel khuami Ahinoam le Karmel ram mi Nabal nupi ro Abigail zong kha an kal ve. #1Sam 25.42-43 3Cun David nih a sin i a ummi a mi vialte hna kha, an innchungkhar cio he a hun i kalpi hna i Hebron khua hna ah cun an um. 4Cun Judah mi kha an ra i khika ah David cu Judah hrin siangpahrang caah chiti an thuh.
David kha, “Saul a vuitu cu Jabesh-gilead mi an si,” tiah an chimh tikah, #1Sam 31.11-13 5Jabesh-gilead mi sinah cun lamkaltu a hei thlah hna i, “Nannih nih hi zumhawktlaknak kha nan bawi Saul cungah nan langhter i nan vui caah Bawipa nih thluachuahnak in pe ko hna seh! 6Atu cu Bawipa nih nan cungah a fekmi dawtnak le zumhawktlaknak kha langhter ko seh! Cun nannih nih hi thil hi nan tuah caah nan cungah ṭhatnak ka tuah lai. 7Cucaah nan kut kha ṭhawng hna seh law nan ralṭha ko u; zeitintiah nan bawipa Saul cu a thi cang i Judah hrin hna nih annih cung i siangpahrang ah keimah cu chiti an ka thuh cang,” tiah a ti hna.
David le Saul Ralkap An I Tu
8Ner fapa Abner, Saul ralkapbu haotu nih khan Saul fapa Ishbosheth kha a lak i Mahanaim ah a ratpi i, 9Gilead le Asshur mi hna le Jezreel le Efraim le Benjamin le Israel vialte cung i siangpahrang ah a ser. 10Saul fapa Ishbosheth cu Israel cung i uknak hram a thawk ah cun, kum sawm li a si i kum hnih a uk. Sihmanhsehlaw Judah hrin nih khan cun David kha an zulh. 11Cun Hebron khua i Judah hrin hna cung i David siangpahrang a si chung cu kum sarih le thla ruk a si.
12Ner fapa Abner le Saul fapa Ishbosheth i a sinum hna cu Mahanaim in Gibeon ah an kal. 13Cun Zeruiah fapa Joab le David sinum hna cu an chuak i Gibeon tili ah khan an va ton hna; tili khatlei kamah phu khat an ṭhu i tili khattelei kamah phu dang an ṭhu. 14Cun Abner nih Joab cu, “Tlangval pawl hi tho hna seh law kan hmaiah lente i celh tuah hna seh,” tiah a ti. Joab nih, “Tho hna ngat seh,” tiah a ti. 15Cun an tho i an i rel: Benjamin le Saul fapa Ishbosheth lei in hleihnih, cun David sinum hna leiah hleihnih. 16Cun pakhat le pakhat, anmah le an ral cio kha, an lu in an i tlai i an hnak ah nam in an i chun i hmun khat ah an tlu hna. Cucaah cuka hmun cu Helkath-hazzurim tiah ti a si, Gibeon ah a um. 17Khi ni ah an i tuk cu a fak ko; Abner le Israel mi cu David sinum hna nih khan an tei hna.
18Cun khika ah Zeruiah fapa pathum, Joab, Abishai le Asahel hna kha an um ve. Asahel cu ramlak sazuk bangin a mumi a si; 19Asahel nih Abner kha orhlei ah siseh, kehlei ah siseh, pial loin a dawi. 20Khi tikah Abner nih a hnulei kha a hei zoh i, “Nangmah maw na si Asahel?” tiah a ti. Cun anih nih, “Ka si,” tiah a leh. 21Abner nih amah cu, “Na orhlei ah maw na kehlei ah maw pial law, tlangval pakhatkhat kha tlai law, a hranchaw kha la tuah,” tiah a ti. Sihmanhsehlaw Asahel cu amah a dawinak khan a pial duh lo. 22Cun Abner nih Asahel cu a chimh ṭhan i, “Na ka dawinak hin pial tuah; zeicahdah vawlei ah tlu lakin kan chunh lai? Na u Joab hmai zeitindah ka hmuh ngam lai?” tiah a ti. 23Sihmanhsehlaw i mer kha a duh hlei lo; cucaah Abner nih a paw ah a fei chek in a chunh i a kenglei ah a tleng; khika ah khan a tlu i a thi colh. Cun Asahel a tluk i a thihnak hmun a phanmi paoh kha cuka ah cun an dir colh lengmang.
24Sihmanhsehlaw Joab le Abishai nih Abner kha an dawi; cun ni tla zuarzar ah khin Gibeon ramlak lei kalnak lam i a ummi Giah khua, cu khua hmai i a ummi Ammah tlang kha an phan. 25Cun Benjamin mi kha Abner sinah cun an i pum i bu khat ah an cang i tlangpar ah khan dirhmun an khuar. 26Cun Abner nih Joab kha a hei auh i, “Zungzal in maw mah le mah hi kan i doh ko lai! A donghnak cu a fak lai tiah na hngal ko lo maw? Na mi hna cu, nan unau hna dawi hi ngol cang u, tiah zeitik ah dah na ti hna lai,” tiah a ti. 27Cun Joab nih, “Pathian a nun bangin, nangmah nih cu bantukin chim hlah law cu, ka mi hna nih hin thaizing tiangin an in dawi peng ko hna hnga,” tiah a ti. 28Cucaah Joab nih muko kha a tum i mi vialte nih khan Israel mi hna dawi kha an ngol i a tuk zong an i tu ti lo.
29Cun Abner le a mi hna cu Arabah tan in cu zan cu zan khuadei an kal; Jordan kha an tan i chunhlan thliahmah an kal i Mahanaim kha an phan. 30Joab cu Abner dawinak khan a kir; cun mi vialte kha a pumh hna tikah, David sinum hna chungin Asahel lengah hleikua an bau. 31Sihmanhsehlaw David sinum hna nih, Benjamin mi, Abner mi hna chungah khan, za thum le sawm ruk an thah hna. 32Cun Asahel kha an lak i Bethlehem i a pa thlan ah khan an vui. Cun Joab le a mi hna cu zan khuadei an kal i Hebron an phak ah khua nih a dei phuat hna.
Currently Selected:
2 SAMUEL 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
