2 SAMUEL 1
1
David Nih Saul Thihnak Kong A Theih
1Saul thih hnu i David nih Amalek mi a thah hnanak in a hung kir tikah, David cu Ziklag ah ni hnih a cam; 2cun a ni thumnak ni ah Saul riahhmun in mipa pakhat, a puan tlek le a lu ah leidip i phulh in a ra. Cun David sin kha a phak tikah vawlei ah a bawk i upatnak kha a tuah. 3David nih amah cu, “Khuazei in dah na rat?” tiah a ti. Cun anih nih, “Israel mi hna riahhmun in ka ra zam,” tiah a ti. 4Cun David nih amah cu a thawh i, “Zeitindah a si? Ka chim tuah,” tiah a ti. Cun anih nih a leh i, “Mi hna nih raltuknak hmun khan an zam i mi tampi cu an tlu i an thi; cun Saul le a fapa Jonathan zong an thi,” tiah a ti. 5Cun David nih amah a hung chimtupa tlangval sinah cun, “Zeitindah Saul le a fapa Jonathan cu an thi, tiah na hngalh?” tiah a ti. 6Cun amah a chimtu tlangval nih khan, “Zeitimaw in Gilboa tlang ah khan ka rak um ngelcel i, khika ah khan Saul cu a fei kha i rinhchan in a rak dir i zohhmanh, rangleng le rangcung ralkap hna nih khan an naih chin cuahmah cang. #1Sam 31.1-6; 1Cha 10.1-6 7Cun a hnulei kha a hei zoh tikah a ka hmuh i a ka auh. Cun kei nih ka leh i, ‘Hika ah hin ka um,’ ka ti. 8Cun anih nih keimah cu, ‘Ahodah na si?’ tiah a ka ti i, ‘Amalek mi ka si,’ tiah ka leh. 9Cun anih nih keimah cu, ‘Ka pawngah dir law ka that tuah; zeitintiah vansang auhnak nih a ka tlaih cang, asinain ka nung rih ṭung,’ tiah a ka ti. 10Cucaah a pawngah cun ka dir i ka thah, zeicahtiah a tluk cang hnuah khan cun a nung kho bal ti lai lo ti kha ka hngalh; cun a lu i a ummi bawi luchin le a baan i aa khihmi ban hrolh cu ka lak hna i hika ah ka bawipa sinah ka rak put hna,” tiah a ti.
11Khi tikah David nih a thilpuan kha aa tlaih riangmang hna i a thleh hna i cu bantukin amah sin i a ummi vialte nih khan an tuah ve; 12Saul le a fapa Jonathan le Bawipa mi hna le Israel innchungkhar hna kha vainam in an thih caah, mithi cu an ngai, an ṭah hna i zanlei tiang rawl an ul. 13Cun David nih amah a chimtu tlangval sinah cun, “Khuazei in dah na rat?” tiah a ti. Cun anih nih “Kei cu Amalek mi, mipem fa ka si,” tiah a leh. 14David nih amah cu, “Zeitindah a si e, nangmah nih Bawipa chiti thuhmi hrawh awk i na kut zao na ṭih lo cu?” tiah a ti. 15Khi tikah David nih tlangval pakhat kha a auh i, “Va kal law, va that,” tiah a ti. Cun a tuk i a thi. 16Cun David nih amah cu, “Na thi cu nangmah lu cungah va um ko seh; zeitintiah nangmah kaa hrimhrim nih, ‘Bawipa chiti thuhmi cu ka thah,’ tiin nangmah cung i biahngaltu a si,” tiah a ti.
David Nih Saul le Jonathan A Ṭah Hna
17Cun David nih Saul le a fapa Jonathan kha hi ṭah hla hi a lawh hna i 18Judah mi kha mah hihi cawnpiak awk an si lai, tiah a ti; zohhmanh, Jashar Cauk chungah aa ṭial. Amah nih a thawh i: #Jos 10.13
19Maw Israel, na sunparnak cu,
na tlang cungah thah an si cang.
Ralkap ṭhawng bikbik hna cu
an ril cang.
20Gath khua ah va thanh hlah u,
Askelon khuachung lam zongah va chim hlah u,
Filistin fanu hna kha an i lawm sual hnga i
Cuarpartan lomi fanu hna kha
an di a riam sual hnga.
21Gilboa tlang hna, nan cungah ruah sur hlah seh,
dap zong tla hna hlah seh
lo ṭha zong um hna hlah seh;
Zeicahtiah khika ah miṭhawng phaw cu thurhnawmh a si i
Saul phaw cu chiti thuh ti loin
a ril cang;
22Jonathan likuk cu mithahnak caah
a ṭhawng,
Saul vainam cu zaangfahnak
a ngei lo,
Miṭhawng kha an tuk hna i
ral kha an thah hna.
23Saul le Jonathan,
duh a nung i aa dawhmi hna,
nunnak ah siseh thihnak ah siseh
an i ṭhen lo;
muvanlai nakin an khul a rang,
chiandeih nakin an ṭhawng.
24Maw Israel fanu hna,
Saul cu ṭah tuah u,
Amah nih maimaw puan an aihter hna i
lungvar le sui in an ṭamh hna.
25Ralkap miṭhawng hna cu
zeitindah i doh liopi ah an thih ee!
Jonathan cu na tlang cungah a ril cang ai!
26Ka nau Jonathan,
Nangmah cu kan ngai,
Zeitluk in dah ka caah na sun
Na ka dawtnak cu khuaruahhar a si,
nu dawtnak kha a hluan.
27Ralkap ṭhawng hna cu an tlu cang,
ralhriam hna cu
an rawk cang,” a ti.
Currently Selected:
2 SAMUEL 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
