2 SAMUEL 4
4
Ishbosheth An Nawn
1Saul fapa Ishbosheth nih Hebron ah Abner a thi ti kha a theih tikah a lung a der i Israel mi vialte cu an hnabei a dong. 2Saul fapa nih khan ral hranh bu haotu mi pahnih a ngeih hna i pakhat min cu Baanah a si i a dang pakhat min cu Rekhab a si, annih cu Beeroth khuami Benjamin phun Rimmon fapa an si (zeitintiah Beeroth zong khan Benjamin ta ah rel chih a si; 3Beeroth mi hna cu Gittaim ah an zam i khika ah nihin tiangin mipem an si).
4Saul fapa Jonathan nih khan fapa pakhat a ngeih i amah cu a ke a bei. Saul le Jonathan kong kha Jezreel in a hung than tikah amah cu kum nga a si; cun a cawngtunu nih khan aa pom duak i a zampi; cun khulrang i a zam lioah khan a thlak sual i a ke kha a bei. Cun a min cu Mefibosheth a si. #2Sam 9.3
5Cun Beeroth khuami Rimmon fapa Rekhab le Baanah kha an i thawh i chun nilinh saling hrawng khin Ishbosheth inn ah chunlai i aa dinh lioah khin, an phan. 6Cun zohhmanh, innka a cawngtu cu changvut kha a thian i sihmanhsehlaw a ngu i aa hngilh ai; cucaah Rekhab le a unau Baanah cu a thli tein an lut. 7Inn chung i an va luh tikah khan, a ihnak dai chung i a ihkhun cungah a ih lioah khan an tuk i an thah i a lu an tan. A lu kha an lak i Arabah lei kalnak lam khan zan khuadei an kal i 8Isbosheth lu cu David sinah Hebron ah khan an ratpi. Cun siangpahrang sinah khan, “Mah hihi na nunnak an kawltu na ral Ishbosheth, Saul fapa i a lu kha a si; nihin ah hin siangpahrang ka bawipa cu Saul le a tefa hna cungah khan Bawipa nih phu an hlampiak cang,” tiah an ti. 9Sihmanhsehlaw David nih Beeroth khuami Rimmon fapa hna, Rekhab le a unau Baanah cu a leh hna i, “Ral vialte chungin ka nunnak a ka tlantu Bawipa a nun bangin, 10mi pakhat nih, ‘Zohhmanh, Saul cu a thi cang,’ ti i a ka chimh i thawng ṭha ka phorh ti i a ruah tikah khan, ka tlaih i Ziklag ah ka thah, mah cucu thawngpang a rak phorhmi ca i laksawng ka rak pekmi a si. #2Sam 1.1-16 11Miding mi amah innte i a ummi, a ihkhun cung i a thattu miṭhalo hna chinchin cu, zeitluk tein dik nanmah kut ah a thisen man cu kan cawh hna lai i vawlei cungin kan hloh chinchin hna lai?” tiah a ti. 12Cun David nih a tlangval kha nawl a pek hna i an thah hna i an kut le an ke kha an tan hna i Hebron khua i tidil pawngah khan an thlai hna. Sihmanhsehlaw Ishobosheth lu kha cu an lak i Hebron i Abner thlan ah khan an vui.
Currently Selected:
2 SAMUEL 4: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006