1 SAMUEL 31
31
Saul le A Fapa Pathum An Thihnak Kong
(1Cha 10.1-14)
1Cun Filistin mi nih Israel mi cu an tuk hna i Israel mi cu Filistin mi hna hmaiah khan an zam i Gilboa Tlang ah cun an thi liangluang ko. 2Cun Filistin mi nih khan Saul le a fapa hna kha an phanh hna i Filistin mi nih cun Jonathan le Abinadab le Malkhishua, Saul fapa hna kha an thah hna. 3Cun Saul cu heh tiah an nam i thalkah thiam hna nih khan an phak ai; cun thal kah thiam hna nih khan ṭhalo tein an hliam. 4Cun Saul nih a ralthuam putu sinah khan, “Na nam kha i zuh law, tleng lak in ka chun, cu lo ahcun, cuarpartan lo pawl hi an ra lai i an ka chunh ṭhiamṭhiam ṭung lai i lentecelhnak ah an ka ser sual hnga,” tiah a ti. Sihmanhsehlaw a ralthuam putu nih khan a tuah duh lo, zeicahtiah a thin a phang ngaingai. Cucaah Saul nih amah vainam kha aa lak i a bawhkhuh. 5Cun a ralthuam putu nih khan Saul kha a thi cang tiah a hmuh tikah amah zong nih a vainam kha a bawhkhuh ve i amah sinah cun a thi. 6Cuticun Saul le a fapa pathum hna le a ralthuam putu le a mi vialte cu ni khat ah hmun khat ah an thi. 7Cun ralchan ah a ummi Israel mi hna le Jordan tiva ral ah a ummi hna nih Israel mi kha an zam i Saul le a fapa hna kha an thi, ti an theih tikah, an khua kha an chuahtak hna i an zam; cun Filistin mi kha an ra i an khua kha an rawlh hna.
8A thaizing ah Filistin mi hna nih a thimi kha an thilthuam hawh awk i an rat tikah, Saul le a fapa pathum Gilboa Tlang i an thih kha an hmuh hna. 9A lu kha an cik i a ralthuam kha an hawh i thawngṭha cu an siasal hna le mi zapi hna sin i kalpi awkah Filistin mi ram dihlak ah khan thawngthanhtu an thlah hna. 10A ralthuam cu Ashtaroth biakinn ah an chiah; cun a pum cu Bethshan kulhnak vampang ah an tar. 11Sihmanhsehlaw Jabesh-gilead mi nih, Saul cung i Filistin mi nih an tuahmi kha an theih tikah, 12ralṭha vialte cu an tho i zan khuadei in an kal i Saul ruak le a fapa pathum hna an ruak kha Bethshan kulhnak vampang khan an va lak hna; cun Jabesh ah an ra phan i khika ah an khangh hna. 13Cun an ruh cu an lak hna i Jabesh i tamarisk thingkung toiah an vui hna i ni sarih rawl an ul.
Currently Selected:
1 SAMUEL 31: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
