1 SAMUEL 30

David Nih Amalek Mi A Tei Hna

1David le a mi hna cu a ni thumnak ni ah Ziklag kha an phak tikah, Amalek mi nih Negeb le Ziklag kha an rak hranh hna. Ziklag kha an rak tei i mei in an khangh i 2nu hna le a chung i a ummi vialte, a hme a ngan in, an rak tlaih dih hna; pakhat hmanh an that hna lo, sihmanhsehlaw an rak kalpi diam hna i an rak kal cang. 3Cun David le a mi hna cu khua kha an ra phak tikah, mei in khangh dih a rak si i an nupile le an fapale le an fanule hna cu an rak tlaih dih hna kha an hmuh. 4Khi tikah David le a sinah a ummi hna kha fak piin, ṭahnak thazang an ngeih ti lo tiangin an ṭap. 5David nupi pahnih, Jezreel mi Ahinoam le Karmel mi Nabal nupi ro Abigail zong kha an rak tlaih hna. #1Sam 25.42-43 6Cun David cu a lungre a thei ngaingai; zeitintiah mi vialte kha an fapa hna le an fanu hna kongah khan an ngaih a chiat ngaingai caah mi nih khan amah kha lung i cheh awk an ceih lengmang. Sihmanhsehlaw David cu Bawipa a Pathian ah khan aa hriim ṭhan.

7Cun David nih tlangbawi Abiathar, Ahimelek fapa sinah khan, “Tlangbawi angki kha ka pe tuah,” tiah a ti. Cucaah Abiathar nih David sinah khan tlangbawi angki kha a rak put. #1Sam 22.20-23 8Cun David nih Bawipa kha a hal i, “Hi bu hi ka dawi hna lai maw? Ka phan hna hnga maw?” tiah a ti. A leh i, “Dawi hna, zeicahtiah na phak hrimhrim hna lai i na chanh khawh hrimhrim hna lai,” tiah a ti. 9Cun David cu a sin i a ummi za ruk hna he khan aa thawh; Besor vate kha an va phan i cuka ah cun hnulei i an kaltakmi hna kha an rung tang. 10David le a mi za li hna tu nih khan cun an dawi lengmang hna; asinain Besor vate tan awkah a ba tukmi za hnih kha cu hnuah an rung tang.

11Ramlak ah khan Izipt mipa pakhat an hmuh i David sinah an ratpi; cun changreu kha an pek i a ei, din awk ti kha an pek, 12theipi car hlum khat le mitsur car bor hnih an pek. Cun a ei dih tikah a hun i hriim ṭhan; ni thum le zan thum rawl zong ei lo ti zong ding loin a rak um. 13Cun David nih amah cu a thawh i, “Aho mi dah na si? Khuazei in dah na rat?” tiah a ti. Anih nih, “Keimah cu Izipt mi tlangval ka si, Amalek mi pakhat i a sinum ka si; kan hnulei ni thum ah khan ka zawt caah ka bawipa nih hnulei ah hin a ka kaltak. 14Khereth mi hna Negeb le Judah ta a simi le Kaleb i a Negeb kha kan hranh hna i Ziklag kha mei in kan khangh,” tiah a ti. 15Cun David nih amah cu, “Hi bu sinah hin na vun ka kalpi lai maw?” tiah a ti. Cun anih nih, “Kan that lai lo, cun na bawipa sinah kan pe ṭhan lai lo, tiin Pathian min in ka sinah chiat ser law, hi bu sinah hin ka vun in kalpi ko lai,” tiah a ti.

16Cun amah nih a vun kalpi tikah khan, zohhmanh, Filistin mi ram le Judah ram in hranchaw kha tampi an lak caah a kenkip ah an rak i ṭhek dih i an rak ei, an rak ding, an rak lam len ko. 17Cun David nih nitlak in a thaizing zanlei tiang a thah hna i tlangval za li kalauk aa cit i a zammi hna dah ti lo cu annih lakah a luatmi pakhat hmanh an um lo. 18Amalek mi nih an lakmi vialte kha David nih a chuh ṭhan hna; David nih a nupi pahnih hna zong kha a lak ṭhan hna. 19A hme siseh, a ngan siseh, fapa si hna seh, fanu si hna seh, hranchaw siseh, thil zeipaoh an rak lakmi kha siseh, zeihmanh a tlaumi a um lo; David nih a ratpi ṭhan dih hna. 20David nih tuurun vialte le cawrun vialte zong kha a tlaih hna i a hmaiah mi nih an khalh hna i, “Mah hihi David hranchaw a si,” an ti.

21Cun David cu mi za hnih, an baat tuk ca i David a zul kho lo i Besor varek i an kaltakmi hna sin kha a ra phan; cun annih nih David le a sinah a ummi hna kha ton awkah an kal; cun David nih a hei phak deng hna tikah khan conglawmhnak a pek hna. 22Khi tikah David sin i a kalmi miṭhalo hna le misual hna nih khan an thawh i, “Annih cu kan sinah an kal lo caah kan va lak ṭhanmi hranchaw hi zeihmanh kan pe hna lai lo, amah belte, an nupile le an fale cio kha i hruai hna seh law, kal ko hna seh,” tiah an ti. 23Sihmanhsehlaw David nih a thawh hna i, “Ka u le ka nau hna, hi bantukin Bawipa nih a kan pekmi thil kongah nan tuah hnga lo; kannih kha a kan zuah i a kan dohtu bu kha kan kut chungah a kan pek cang. 24Hi kongah hin cun aho nih dah nan bia an in ngaih hna lai? Zeitintiah raltuknak hmun i a vung kalmi nih a tin a co bantuk tein thil a rak hngakmi zong nih a tin a co ve lai; aa khatrep in an i ṭhenh cio awk a si,” tiah a ti. 25Cun cu ni thawk in nihin ni tiang Israel mi hna caah mah cucu nawlbia le phunglam ah a ser i nihin tiang a hmun.

26David cu Ziklag a phanh tikah hranchaw a cheu cu Judah ram upa a hawikom hna sinah khan a kuat i, “Bawipa ral hna sinin lakmi hranchaw chungin nanmah ca i laksawng a si,” tiah a ti; 27mah cucu, Bethel khua chung i a ummi hna le Negeb i Ramoth khua i a ummi hna le Jattir i a ummi hna le 28Aroer i a ummi hna le Sifmoth i a ummi hna le Eshtemoa i a ummi hna le 29Rakal i a ummi hna le Jerahmeel mi hna khua i a ummi hna le, Ken mi hna khua i a ummi hna le, 30Hormah i a ummi hna le Borashan i a ummi hna le Athak i a ummi hna le 31Hebron i a ummi hna, David le a mi hna an rak i chawhvaihnak hmun vialte i a ummi hna caah khan a si.

Currently Selected:

1 SAMUEL 30: HCL06

Highlight

Copy