Teu Maan Caoh 1

Tahz Yesuhz raw lang kaang raaoz

1Theophilus aez! Tuhz pap seun teungz aacz ihz ne ohz a wa taemz mok hacz aamz lawng Tahz Yesuhz seun teungz cih sawnz aez, 2thonz taw seu ngihz leh raw Hnhz lang kaang raaoz. Meuz Hnhz maat raw lang kaang raaoz, Hnhz seumz mok teu maan an Daehz ras keui nahz, an Khuanz Seu Ngamz lao Hnhz. 3Waaiz Hnhz yam meu rae imz ne plaez keuh nahz toz Daehz ponz kawlz seu ngihz, aez ihz thanz paw mas rak rak Daehz phawmz imz, lao aez tang keuh nahz lawng prih Phraz Pen Caoh. 4Meuz keuh yeung teur cuhz ne, Hnhz cao keuh nahz, yak maat lae lan thaz weng Yerusalem. Teur aacz daehz pao a suz an Ohz lao mok pehz nahz, an Paz Phraz mok keu tih ne. 5Yohn aez teuk sruz tuhz omz, nam paw moh heungz seu ngihz leui pehz samz ngaz bawnz leh teuk sruz tuhz Khuanz Seu Ngamz. 6Meuz teu maan keui teur cuhz daehz tawz Tahz Yesuhz ne keuh maanyz Hnhz, “Caoh Phraz, seu ni Mih ngaz aez prih Israel maang meu rae khunz hiuz?” 7Hnhz kaw mial daz keuh nahz, “Pehz nam caang mas kraao Paz Phraz leh a na Daehz khriungz mok. 8Keuiz daz pehz te bawnz taanz khoz meuz Khuanz Seu Ngamz cur truz kaai pehz ne penz saak se Ohz tuhz weng Yerusalem, prih Yio boh prih Samaria, taw phraeoz prih keu tehz ne dutz.” 9Waaiz Hnhz daz ceun diz, meuz keuh yeung yawt boh Hnhz ne peu eumz pumz raw Hnhz lang kaang raaoz aacz ngaai keuh, thonz taw peu eumz ne seun tapz ngaai keuh. 10Meuz keuh ngaw yawt boh lang plengz tawz Hnhz raw ne, maang ihz keu aarz kap seu kaeng keun ra paw lae truz ceng boh rim keuh. 11Kaar daz keuh nahz, “Ihz prih Kalile keui aez, cih naehz pehz yeung ngaw yawt boh lang plengz a? Ceun Tahz Yesuhz raw lang kaang raaoz ne cur truz mial boh ceun pehz awlz ne leun.”

Ras Matthias taangz Yudas Iskariot

12Waaiz an diz keuh cur truz thaz rang Olip rae weng cu weng Yerusalem, reung yaan naeh kraao seu lakz. 13Meuz keuh phraeoz ne, keuh raw cu meu rae lukz raan thaz kol an keuh moh ne. Keuh keu diz naeh Petros, Yohn, Yakop, Andre, Philip, Thomas, Bartholome, Matthe, Yakop kuanz Alphaeus, Simon ihz plaakz prih omz Yio boh Yudas an naeh kuanz Yakop. 14Keuh teur cuhz daehz suz tawngz, tang keun nyah keui tang Mari an naeh mah Yesuhz, tang seum bohz Yesuhz keui. 15Waaiz an diz, Petros rawi ceng peur lah ihz yum yam seu peur ya plawi aarz kawlz ne daz keuh nahz, 16“Kuanz mai keui aez, tuhz kyaamz lik daz, Khuanz Seu Ngamz leh mony khunz Dawit lao mok ta Yudas Iskariot an plaez reung dengz aez ihz mat Tahz Yesuhz ne a wa penz. 17Hnhz an ni hawkz kut tuhz cumz ehz, cih kaanz Phraz Pen Caoh kawmz ehz.” 18Leh paekz hnhz langz cih nam rak ne yal sraakz seu ti. Hnhz taz seun kupz, klungz loz wac lae. 19Ihz weng Yerusalem keui ngarz lawng an diz, mony keuh raak ti keu tehz an diz “Akeldama,” an loz daz, “Keu tehz naamz.” 20Tuhz kyaamz Ngawk ne taemz mok lawng hnhz daz, “Aez kaang hnhz raam, yak aez ihz moh hawkz hawkz.” Kyaamz Ngawk taemz mok thaengz, “Ti hnhz kaw aez ihz bawnz.” 21Kawp ceun diz, ehz lo ras ihz hawkz kut tuhz cumz ehz, khaam saak se lawng Tahz Yesuhz meu rae imz. Ihz an diz lo naeh ihz naeh kawmz ehz se se, thaz meuz Tahz Yesuhz kut kut lae lae tuhz ehz. 22Ihz an diz lo naeh ihz awlz tawiz tuhz keutz ngaai daehz kawmz ehz, tae leh seu ngihz Tahz Yesuhz leh teuk sruz omz Yohn thonz taw phraeoz Hnhz raw lang kaang raaoz. 23Meuz ceun diz keuh raak leh ihz keu aarz, hawkz naeh Yosep an daz Barsabbas, raak Yustus kaw anz, thaengz hawkz samz naeh Matthias. 24Meuz phangz an diz keuh suz tawngz daz, “Caoh Phraz, Tahz ehz mas phawmz ihz hacz aamz, kawp ceun diz, lao aez ehz nahz ihz an Mih ras ne. 25Aez hnhz cih taangz teu maan Yudas Iskariot an praasz rae lan ti an hnhz trohz naeh ne, aez ihz an diz siupz cih kaanz Phraz Pen Caoh.” 26Keuh pohz ceu kawk, klaez kaai Matthias. Hnhz kaw bawnz kut tawiz cumz teu maan seu kawlz disz.

Currently Selected:

Teu Maan Caoh 1: ril

Highlight

Copy