Teu Maan Caoh 2

Khuanz Seu Ngamz cur truz

1Meuz seu ngihz pawiz Pentekos ne ihz yum yam keui teur aacz daehz cuhz ti kawmz. 2Meuz diz luat maang reus cung coh krang cur truz thaz kaang raaoz, neuk tuhz kaang an keuh naeh ne. 3Keuh awlz raenz ngaaiz ceun taakz ngal heungz baaiz seuk praaiz kaai keuh klawhz ihz. 4Keuh hacz aamz neuk tang Khuanz Seu Ngamz, Khuanz aez keuh mawz rawz mony reu ma keunyz meoz. 5Meuz phangz an diz kuanz mai Yio setz an ro se Phraz Pen Caoh klawhz ti keui, truz naeh boh tuhz weng Yerusalem. 6Meuz ihz ngarz reus an diz ne ihz heungz baaiz teur aacz daehz wungz truz. Keuh teur aacz daehz meun lan kawp an ihz yum yam keui rawz ne naeh mony reu ma daehz klawhz kheuz. 7Keuh tang sangz tang meun daz, “Ihz an rawz boh keu ni ne nam anz ihz prih Kalile haz? 8Beuk naeh ceun diz kaw cih seu naez ehz caang ngarz mony reu ma daehz klawhz ihz hoh? 9Ihz prih Parthia, prih Medes boh prih Elam, tang prih Mesopotamia, prih Yio boh prih Kappadosia, prih Pontus boh prih Asia, 10prih Phrikia boh prih Pamphilia, prih Ekip boh ihz an moh tawiz pruh patz prih Libia an naeh rim prih Siren, 11khaekz an naeh kheuz Yio boh ihz an nam anz kheuz Yio kut tuhz pha sa Yio an truz thaz weng Rom, prih Krete boh prih Arap, ehz keu ni bawnz ngarz mony reu ma daehz an Phraz Penz Caoh cih plaez an mawh myaat.” 12Keuh hacz aamz teur aacz daehz sangz baaiz thanz paw kuangz, teur daz daehz nahz, “An ni naeh seu naez ez?” 13Keuiz daz maang ihz teur ka saehz teu paez keui daz, “Keuh naeh ihz cawc keu daaoz.”

Traz Petros rawz

14Meuz phangz an diz, Petros ceng teur kawmz tang teu maan seu kawlz disz rae rawz reus usz usz daz ihz keui nahz, “Kuanz mai Yio boh ihz weng Yerusalem keui aez, teuk ngarz rak rak raez, ohz te lao plaez pehz nahz.” 15Ihz keu ni nam cawc keu daaoz ceun pehz thaang keuiz, seu ni ne taamz naeh taw timz na ri teuk ngup pan. 16An ni naeh ceun ihz taangz phraz Yoel rawz mok daz,

17“Kaap thaz puatz ne Phraz Pen Caoh ngaz thawkz aez Khuanz Daehz kaai ihz klawhz meoz. Kuanz pehz keui ngaz rawz taangz phraz, ihz plung keui ngaz bawnz awlz pya tik, ihz thao keui ngaz yaetz reu muh awlz an laak laaiz.”

18“Anz mawn, kaai kuanz leng keur meh boh keun nyah ihz an cih kaanz Ohz ne, Ohz ngaz thawkz aez Khuanz Ohz, keuh ngaz rawz taangz phraz. 19Ohz ngaz cih plaez an laak laaiz lang plengz boh an rak seum sangz keui, naamz, ngal boh tawhz ngal tuhz prih keu tehz. 20Seu ngihz ne ngaz bimz lang, kiarz kaw rong naeh ceun naamz taw maat phraeoz seu ngihz mawh myaat Phraz Cen Cen. 21Meuz phangz an diz, ihz an raak khahz mus Phraz Cen Cen keui bawnz reung dengz khyawt.” 22Petros lao thaengz, “Kuanz mai Israel keui, teuk ngarz mony ohz raez, pehz kaw mas boh Tahz Yesuhz ihz weng Nasaret naeh ihz an truz thaz Phraz Pen Caoh rae Hnhz caang cih an laak laaiz, rak seum sangz boh an pleung pleung aacz ngaai pehz.” 23Ceun Phraz Pen Caoh kyaam mok ne Hnhz leh Tahz Yesuhz aez pehz nahz, pehz kaw cao ihz meukz keui leh piamz Hnhz kaai lakz keun rang klawngz klaengz. 24Keuiz daz Phraz Pen Caoh aez Hnhz meu rae imz, aez Hnhz lawt thaz reung dengz yam peur teuk, kawp daz reung dengz yam ne nam pae Hnhz. 25Khunz Dawit taemz mok lawng Hnhz daz, “Ohz awlz Phraz Cen Cen naeh se se aacz ngaai ohz. Kawp daz naeh plaakz takz kaaiz ohz rae ohz nam teur ceus naehz. 26Kawp ceun diz kingz keu nuasz ohz kaw seuz, mony reu ma ohz kaw pyaw. Toz ohz kaw moh tuhz reung dengz mang. 27Kawp daz Tahz ehz nam thengz Khuanz Ohz tuhz prih Maranahz, Ihz Seu Ngamz an maang saet ca kaw Hnhz nam aez kheumz. 28Tahz ehz aez ohz mas reung dengz phawmz imz rae, ohz ngaz seuz tawiz bawnz moh aacz ngaai Mih.” 29Petros kaw siupz lao thaengz “Kuanz mai keui aez, aez ohz bawnz lao plaez pehz nahz lawng tahz kok ehz khunz Dawit. Hnhz a wa yam, a wa pluz, peun lu hnhz kaw yeung naeh boh a ehz ne taw phraeoz seu ngihz meu ni. 30Hnhz naeh ihz taangz phraz hawkz rae hnhz mas keu tih Phraz Pen Caoh aez daehz nahz, ihz hawkz tuhz ceu kheuz hnhz ne Phraz Pen Caoh aez keu dez kaai plaang hnhz. 31Khunz Dawit awlz mok teuk aacz lawng Tahz Khris meu rae imz rae Phraz Pen Caoh nam thengz Khuanz Hnhz tuhz prih Maranahz, toz Hnhz kaw nam aez kheumz tuhz peun lu. 32Phraz Pen Caoh aez Tahz Yesuhz meu rae imz, ehz keu ni kaw awlz tuhz keutz ngaai. 33Phraz Pen Caoh leh phrawz Hnhz mok plaakz takz kaaiz Daehz, bawnz Khuanz Seu Ngamz an Paz Phraz maang mok keu tih. Hnhz thawkz aez Khuanz Seu Ngamz kaai pehz ceun pehz a wa ngarz, a wa awlz seu ni ne. 34Khunz Dawit maat raw lang kaang raaoz, keuiz daz hnhz daz, ‘Phraz Cen Cen daz Tahz ehz nahz, keu dez plaakz takz kaaiz Ohz raez, 35thonz taw Ohz leh raan su Mih mok ti tam cawng Mih.’ 36Kawp naeh ceun diz, kheuz Israel keui lo mas caem caem, Tahz Yesuhz an pehz piamz kaai lakz keun rang klawngz klaengz ne, naeh Tahz an Phraz Pen Caoh phrawz mok Hnhz naeh Caoh Phraz boh Tahz Khris.” 37Meuz ihz keui ngarz ne, kawcz phawmz rae teur aacz daehz maanyz Petros boh teu maan keui daz, “Kuanz mai keui aez, ehz ngaz cih seu naez hoh?” 38Petros mial daz keuh nahz, “Aez pehz lawt reung dengz kawi ne caanz reung dengz kawi rae leh teuk sruz kaai mus Tahz Yesuhz Khris klawhz ihz raez. Beuk cih ceun diz pehz te bawnz suz Khuanz Seu Ngamz. 39Kawp daz keu tih Hnhz ne naeh kaai pehz, kaai kuanz pehz tang kaai ihz an naeh yaan keui nahz hacz aamz, an Phraz Pen Caoh ehz Phraz Cen Cen raak truz cu Daehz.” 40Petros lao keuh nahz mony reu ma tang meoz keui rae lao sawz thaengz keuh nahz, “Aez pehz tiunz lawt lae truz thaz ceu kheuz meukz keu ni raez.” 41Ihz keui yum Petros lao rae teur aacz daehz leh teuk sruz, kaai seu ngihz an diz ihz naeh seu waiz rengz ne kut tuhz cumz keuh. 42Keuh teur aacz daehz teuk ngarz mony reu ma teu maan keui, cih bohz cih raen kuanz mai teur deuiz, pekz kaaiz mun rae suz tawngz se se keui.

Reung moh ihz yum yam

43Ihz keui kaw teur aacz daehz doz baaiz kawp daz teu maan keui cih plaez an laak laaiz boh rak seum sangz keui. 44Ihz yum yam keui teur aacz daehz moh teur kawmz, phrihz phrahz keuh hacz aamz kaw cao teur kawmz. 45Keuh saz phrihz phrahz daehz, teur baengz aez ihz an lo keui nahz. 46Klawhz seu ngihz keuh moh teur kawmz a teu laangz wat. Keuh suamz seum suamz tawiz kaang, teur aacz daehz seuz phawmz suamz. 47Teur aacz daehz lupz phrawz Phraz Pen Caoh, bawnz mawk mael aacz ngaai ihz. Ihz an bawnz reung dengz khyawt keui kaw Phraz Cen Cen aez kut tuhz cumz keuh cih aez keuh heungz truz klawhz seu ngihz.

Currently Selected:

Teu Maan Caoh 2: ril

Highlight

Copy