Lukas 24

Yesuhz meu rae imz

(Matthe 28:1-10, Markus 16:1-8, Yohn 20:1-10)

1Kaai seu ngihz seun teungz tuhz wong, teuk ngup cao cao ne keun nyah keui lan peun lu, khaenz tang meoz an hawm an daehz raenz. 2Keuh awlz reu aangz an bitz tuhz peun lu ne peun kling plaez mok. 3Keuh kut tuhz diz, keuiz daz nam awlz toz Tahz Yesuhz. 4Meuz keuh ceng meun boh ne maang ihz keu aarz kap kreung aasz ceng boh rim keuh. 5Keun nyah keui doz baaiz kupz taet tuhz keu tehz. Kaar maanyz keuh, “Pehz khahz ihz imz peur lah ihz yam cih naehz? 6Hnhz nam naeh a niz leui. Hnhz a wa meu rae imz. Tang mony reu ma Hnhz lao mok pehz meuz yeung naeh prih Kalile ne daz, 7‘Kuanz Ihz talz ihz aapz Daehz tuhz tihz ihz raai, keuh ngaz piamz kaai keun rang klawngz klaengz. Keuiz daz moh waiz seu ngihz ne meu rae imz.’”

8Keun nyah keu diz kaw tang mony reu ma Yesuhz. 9Meuz keuh weng truz thaz peun lu, keuh lao plaez keuh seu kawlz disz nahz boh ihz keui nahz lawng an diz. 10Keun nyah keu diz naeh Mari Makdalen, Yoanna, Mari mah keuh Yakop boh keun nyah an naeh tawiz keuh, keuh lao plaez teu maan keui nahz lawng an diz. 11Teu maan keui nam yum keuh lao, mok naeh ceun mony nam anz naehz. 12Keuiz daz Petros ceng wang lan cu peun lu. Hnhz kuiz dawmz yawt tuhz peun lu ne awlz taw banz maat pan. Hnhz sangz an naeh keui rae weng kaang daehz.

Reung dengz lan pruh Emmaus

(Markus 16:12-13)

13Kaai seu ngihz an diz teu paez Hnhz keu aarz lan pruh Emmaus. Pruh an diz yaan weng Yerusalem pulz lakz, 14kaar teur daz daehz nahz lawng an a wa naeh peun. 15Meuz kaar yeung teur daz teur upz daehz ne toz Yesuhz lan thatz kaar, nuar tawiz kaar. 16Kaar nam mas naeh Yesuhz, kawp daz ngaai kaar seun tapz mok. 17Yesuhz maanyz kaar, “Tawiz reung dengz ne paarz teur daz daehz nahz lawng naehz?”

Kaar kaw ngaai kawcz rae deukz. 18Tuhz kaar ne an mus naeh Kleopas daz Yesuhz nahz, “Khaekz thangz boh tuhz weng Yerusalem ne naeh taw mih pan doz, nam mas lawng a wa peun aarz waiz seu ngihz a?”

19Yesuhz maanyz kaar, “Naeh naehz awh?”

Kaar kaw mial daz, “Naeh lawng Yesuhz ihz weng Nasaret eu. Hnhz naeh ihz taangz phraz, an Hnhz upz, an Hnhz cih keui maang taanz khoz aacz ngaai Phraz boh aacz ngaai ihz hacz aamz. 20Keuiz daz beunz caangz boh ihz peur aacz ehz keui aapz Hnhz aez talz taam yam kaai lakz klawngz klaengz. 21Ehz mang Hnhz naeh ihz thutz plaez kheuz Israel. An naeh ceun ni ne a wa bawnz waiz seu ngihz. 22Meuz teuk ngup cao cao ne keun nyah tuhz ehz teur ka keui lan yawt tawz peun lu, keuh kaw sangz. 23Keuiz daz keuh nam awlz toz Yesuhz. Keuh weng lao ehz nahz lawng an keuh awlz, teu maan kaang raaoz keui paw truz lao daehz daz Yesuhz imz boh. 24Keur meh ehz teur ka lan yawt tawz peun lu, awlz naeh ceun keun nyah keui lao, keuh kaw nam awlz toz Yesuhz.”

25Yesuhz daz kaar nahz, “Paarz naeh ihz klukz, baai hinz yum baaiz an ihz taangz phraz keui lao mok. 26Khris bawnz talz peur teuk ceun ni rae bawnz caam tuhz bunz Daehz, nam anz haz?” 27Yesuhz kaw krai plaez kaar nahz lawng Daehz an naeh tuhz kyaamz Moses boh tuhz kyaamz ihz taangz phraz keui.

28Meuz kaar lan a wa thatz pruh ne Yesuhz cih ceun Daehz kyaam peun lan pruh kaar. 29Kaar raak Yesuhz tikz tikz daz, “Yaetz preumz kawmz aaiz raez, seu ngihz a wa keutz, prih kaw a wa reu nyeum.” Yesuhz kaw lan thangz tawiz kaar. 30Yesuhz keu dez suamz kawmz kaar. Hnhz leh kaaiz mun, lupz phrawz kez cuz, pekz kaaiz mun aez kaar nahz. 31Meuz diz luat ngaai kaar a wa thaangz rae a wa tang Hnhz. Keuiz daz Yesuhz bilz lan aacz ngaai kaar. 32Kaar teur daz daehz nahz, “Meuz Hnhz lao plaez aaiz nahz kyaamz lik tawiz reung dengz ne aaiz seuz phawmz thanz paw kawcz seuk rawi, nam anz haz?”

33Kaar ceng lan luat weng Yerusalem, awlz teu maan seu kawlz disz boh teu paez keui wong teur kawmz daehz 34rae daz, “Tahz a wa meu rae imz mawn. Plaez Petros nahz toz.”

35Kaar kaw lao plaez lawng an naeh tawiz reung dengz boh meuz pekz kaaiz mun ne taamz mas naeh Hnhz.

Yesuhz plaez toz tawz teu paez

(Matthe 28:16-20, Markus 16:14-18, Yohn 20:19-23, Teu Maan Caoh 1:6-8)

36Meuz keuh yeung teur daz boh ceun diz ne toz Yesuhz truz ceng teun khinz keuh, daz keuh nahz, “Aez reung dengz nimz naeh kaai pehz.”

37Teu paez keui thaang daehz awlz phet rae teur aacz daehz khranz ngaat. 38Yesuhz daz keuh nahz, “Cih naehz pehz caang khranz a? Cih naehz maang phawmz nam yum Ohz a? 39Yawt tihz cawng Ohz raez, naeh toz Ohz eu. Beutz yawt Ohz raez mas boh. Phet nam maang lomz naamz, nam maang ceun aangz ceun pehz awlz Ohz.”

40Waaiz Hnhz lao ne Hnhz plaez keuh nahz tihz cawng Daehz. 41Meuz keuh yeung sangz, yeung seuz boh ne keuh maat yum lawh, Yesuhz daz keuh nahz, “Anz pehz maang seum suamz?” 42Keuh aez Hnhz nahz kahz purz seu patz. 43Hnhz leh suamz aacz ngaai keuh.

44Samz lao tang keuh nahz, “An ni naeh mony reu ma an Ohz lao pehz, naeh an Ohz yeung naeh kawmz pehz meuz aacz, lawng Ohz an taemz mok tuhz kyaamz Moses, kyaamz ihz taang phraz, boh kyaamz Ngawk keui a wa penz keunyz klawhz meoz.”

45Hnhz kaw plaakz aez ngaai kingz keu nuasz aez keuh loz phawmz kyaamz lik. 46Samz lao thaengz keuh nahz, “Tuhz kyaamz lik taemz mok ceun ni, Khris ne talz suhz rae bawnz yam, moh waiz seu ngihz meu rae imz thaz reung dengz yam boh. 47Pehz ngaz bawnz lao plaez lawng traz caanz reung dengz kawi boh traz plawiz lawt reung dengz kawi kaai mus Ohz, tae leh kaanz weng Yerusalem taw phraeoz ihz klawhz kheuz an naeh tuhz prih keu tehz. 48Pehz samz naeh ihz awlz tawiz lawng keu ni. 49Ohz ngaz phuhz aez pehz nahz keu tih Paz Daehz. Pehz bawnz moh tuhz weng Yerusalem, thonz taw taanz khoz kaang raaoz cur cu a pehz.”

Yesuhz raw lang kaang raaoz

(Markus 16:19-20, Teu Maan Caoh 1:9-11)

50Yesuhz aacz lan teu paez keui pruh Bethani, leh phrawz tihz Daehz rae aez keuh nahz reung dengz rak. 51Meuz phangz yeung aez reung dengz rak ne leh raw Hnhz lang kaang raaoz. 52Teu paez keui waiz Hnhz, seuz phawmz baaiz rae weng cu mial weng Yerusalem. 53Keuh lupz phrawz se se kez cuz Phraz Pen Caoh tuhz wat.

Kyaamz Lukas a wa dutz.

Currently Selected:

Lukas 24: ril

Highlight

Copy