यूहन्ना 21
21
तिबिरियास झील कै किनारे चैलै पांदी प्रगट हौणौ
1इनु बातौ कै बाद यीशुए आपी कै तिबिरियास झील (जिथकौ औकौ नांव गलील झील औसौ) कै किनारे चैलो पांदी प्रगट कौरा, औरौ ऐशैखैई प्रगट हौं औरौ ऐजौ ऐशैकै हौं।
2शमौन पतरस, औरौ थोमा जैसीखै दिदुमुस बै बौल़ौ, औरौ गलील जिले कै काना नगर का नतनएल, औरौ जब्दी कै दौ बैटै औरौ तैसकै चैलै मुंजीदै दो औकै आदमी कौठै थिए। 3शमौन पतरसे तैसीखै बौल़ौ, हांव माछी पाकोड़दा चालै रौआ। तिनुऐ तैसी बौल़ौ, आमै बै तैरै साथै चालु। इथकारिए सै निकल़ैयो कै किश्ती पांदी बौठै, पौरौ तियौं रातै तिनकै ऐक बै माछी ना पाकड़ी।
4आगलै दूसै झीश हौंदै ही यीशु किनारे पांदी आयौ खौड़ा हौए गौआ, तोबै बै चैलै ना पोछैयाणी कै सै यीशु औसौ। 5तोबै यीशुए तिनु बौल़ौ, “ओए रै साथियो का तुऔं कैई किछै खाणौ कारिए माछी औसौए?” तिनुऐ जोवाब दिया ना। 6तैणै तिनु बौल़ौ किश्ती कै सोऐं ढौबौ जाल पाव, तोबै तुऔं माछी भैटदी। तोबै तिनुऐ जाल पायौ, औरौ ऐबै माछी कै बौहितै हौणै की बौजैह शै सैजौ जाल ऊबु ना खिंचियो थियु।
7तोबै सैजा चैला जैसीआरी यीशु प्यार कौरौ थिया, पतरस कै बौल़ौ, ऐजा तौ प्रभु औसौ, शमौन पतरसे ऐजौ शोणेयो कै सै प्रभु औसौ, तौ तैणै आपणै सैजै खोटणो बाम्बै जू तैणै काम कौरदै बैई उंढे राए थिए खोले, औरौ झीलो दै फाल़ मारै। 8पौरौ औकै चैलै किश्ती पांदी माछी कौ भोरयोंदो जाल खिंचदै बैई ओऊवे, जिथुकै सै किनारे दै जादा दूर नी थी, सिरफ शो मीटर कै लमसम दूर थिए।
9जोबै सै किनारे पांदी उतरे, तोबै तिनुऐ अंगारो की आगी पांदी औरौ तिथपांदी माछी राखी, औरौ रोटी दैखी। 10यीशुए तिनुकै बौल़ौ, जू माछी तुऐं इबी रैई पाकड़ै, तिनुमुंजी दी दैणी उंढी लाव। 11तोबै शमौन पतरसे किश्ती पांदी चौढ़ेयौ ऐक शो तिरपन बौड़ी माछी शै भोरयोंदो जाल किनारे पांदी खींचु, औरौ इशैक जादा माछी कै हौणौ पांदी बै जाल नी फाटी। 12यीशुए तिनु बौल़ौ, “आव, खाणौं खोऊंबे, चैलै मुंजी दी कोसी कै हिम्मत नी होई कै तैसीयांदो पूछौ, तू कुण औसौ?” जिथु सै जाणौ थिए कै ऐजाई ही प्रभु औसौ। 13यीशुए रोटी लोयो खै तिनुदी, औरौ ऐशैकैई माछी बै। 14ऐजौ तिजाल़ियों औसौ जोबै यीशुए मौरेयौंदे मुंजीदै जियुंदी हौणौ कै बाद चैलै खै दर्शन दियै।
यीशु कै पतरस शै बातचीत
15खाणौं खाणौ कै बाद यीशुए शमौन पतरस कै बौल़ौ, “ओए रै शमौन यूहन्ना का बैटा का तू सौथी कै इनु ओकी चैलै दा जादा बौढ़ेयौ मुं आरी प्यार कौरे?” शमौन पतरसे यीशु कै बौल़ौ, “हां, प्रभु तू तौ जाणै कै हांव तांवआरी प्यार कौरु।” यीशुए तैसीकै बौल़ौ, “मैरै चैलै कै दैखभाल कौर जैशैकै ऐक चौराईया आपणै भेड़ो कै दैखभाल कौरौ।” 16यीशुए हौजौ दुजाल़ियो तैसीखै बौल़ौ, “ओए रै शमौन यूहन्ना का बैटा का तू मुं आरी प्यार कौरे?” तैणै तैसी बौल़ौ, “हां, प्रभु तू तौ जाणै की हांव तांवआरी प्यार कौरु।” तैणै तैसी बौल़ौ, “मैरै लोगौ कै दैखभाल कौर जैशैखै ऐक चौराईया आपणै भेड़ो कै दैखभाल कौरौ।” 17यीशुए तिजाल़ियों बौल़ौ, “ओए रै शमौन यूहन्ना का बैटा का तू मुं आरी प्यार कौरे?” पतरस उदास हौआ, कै यीशुए तिजाल़ियों तैसीखै ऐशै बौल़ौ, “का तू मुं आरी प्यार कौरे?” औरौ तैणै तैसी बौल़ौ, “ओए रै प्रभु तू तौ सौबै जाणै: तू ऐजौ बै जाणै कै हांव तांवआरी प्यार कौरु।” यीशुए तैसी बौल़ौ, ऐक चौराईया कै जैशणै मैरै लोगौ की जौरुरतौ कै पूरी कौर।
18हांव तुऔं साचौ-साचौ बुलू, जौल़ौ तू जवान थिया, तौ तौलौ तू आपणै कमर बानियो कै जिथै चांए थिया, तितै फिरै थिया। पौरौ जोबै तू बूढ़ा हौए जाला, तोबै तू आपणै हाथ फौएलांदा औरौ कुणिए ताखै बानी दैंदै औरौ ताखै तिथै निंदै जिथै तू ना चांए। 19यीशुए ऐजौ बौताणौ कारिए बौल़ौ कै पतरस कैशैकै मौरदा औरौ कैशैकै पौरमेशवर कै महिमा कौरदा; ऐजौ बौलेयौ तैणै तैसीखै बौल़ौ, “मैरा चैला बौणेयौंदा रो”
यीशु औरौ तैसका प्यारा चैला
20पतरसे फिरैयौ तैसी चैलै कै पाछु आन्दै दैखा जैसीआरी यीशु प्यार राखौ थिया औरौ जू खाणौ कै सौमय तैसकै पोशो दा बौठै रौआ थिया जैणै पौछै राए थियु, “ओए रै प्रभु तैरा थोमाणौवाल़ा कुण औसौ?”
21तैसी दैखैयो पतरसे यीशु खै बौल़ौ, “ओए रै प्रभु ऐसका का हाल हौंदा?” 22यीशुए तैसी बौल़ौ “जै हांव चोऊं तौ सै मैरै पाछु आणौ तौड़ी जियुंदी रौंव, तौ ताखै का? तू मैरा चैला बौणेयौंदा रो।”
23इथकारिए बिशवाशी भाईयों मुंजी ऐजै बात फोयलै गौए, कै सैजा चैला मौरदा ना। तोबै यीशुए तैसीखै ऐजौ नी बुली, कै सै ना मौरदा; पौरौ ऐजौ कै, “जै हांव चोऊं कै सै मैरै पाछु आणौ तौड़ी जियुंदी रौंव, तौ ताखै इंदु का?”
सौबी बातौ का निचोड़
24जैसी चैलै ऐजौ सौबै ठुँ दैखौ, तैणै गवाही दैय राए, ताकि तुऐं बै यीशु पांदी बिशवाश कौरे सौकौ। औरौ तैसकै गवाही साची औसौ। औरौ सै जाणौए कै सै सौचाई शै बौल़ौ। 25हौजौ बै भौरिशै काम औसौ जू यीशुए कौरे राए, पौरौ जै आमै तिनु कामौ खै ऐक-ऐक कौरेयौ लिखदै, तौ मैरै जाणियौ कै सारै दुनिया पांदी बै तिनु किताबो सम्भाल़णो कारिए ऐतरै जौगैह ना हौंदी जू लिखी जान्दी।
Currently Selected:
यूहन्ना 21: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
