यूहन्ना 20
20
खाली कब्र
(मत्ती 28:1-10; मर 16:1-8; लूका 24:1-12)
1औयतवार कै झीशीं, मगदेला गांव कै मरियम इनारै दी कुणजी ओकी बैटमाणिशौ कै साथै कब्रो दी ऐई, औरौ पाथर खै कब्रो कै दवारो पौरैशा हौटाएयौंदा दैखा। 2तोबै सै दोऊड़ी औरौ शमौन पतरस औरौ तैसी ओकी चैलै कै धोरे जैसीआरी यीशु प्यार राखौ थिया, आयौ कै बौल़ौ, “सै प्रभु कै लाशो खै कब्रो पौरैशा गाड़ेयो लोऐ गौवै; औरौ आमुए ना जाणु कै तैसी कुकै राख राए।”
3तोबै पतरस औरौ सैजा ओका चैला निकल़ैयो कब्रो कै ढौबौ हौटै। 4सै दुईनै साथी-साथी दोऊड़ो थिए, पौरौ ओका चैला पतरस दा जादा दौड़ैयौ कब्रो पांदी आगै पोऊंचा। 5औरौ उदे नियुड़ेयो मलमल कै खोटणो कै चादर पौड़ेयौंदे दैखै, तोबै सै भीतरै ना हुटी। 6तोबै शमौन पतरस तैसकै पाछै-पाछै पौऊंचा, औरौ कब्रो कै भीतरै हौटा औरौ मलमल कै खोटणो कै चादर पौड़ेयौंदे दैखै। 7औरौ सैजै खोटणो जू तैसकै मुँह पांदी लोपेटेयौंदे थिए, खोटणो कै साथै पौड़ेयौंदे नी, पौरौ जौई ऐकी जौगैह लोपेटेयौंदे दैखै। 8तोबै ओका चैला बै जू कब्रो पांदी औगौड़ियौ पौंचै रौआ थिया, भीतरै हौटा औरौ दैखैयो कै बिशवाश कौरा कै यीशु मौरेयौंदे मुंजीदा जियुंदी हौए गौआ। 9सै पवित्र शास्त्र दो यीशु कै बारै मुंजी लैखैयौंदे इयौं बात कै इबी तौड़ी सौमझी ना रैई थी, कै सै मौरेयौंदे मुंजीदा औटेयौ जियुंदा हौंदा। 10तोबै सैजै चैलै आपणै घोरे पाछु हौटै।
मरियम मगदलीनी कै दैखिणा
(मर 16:9-11)
11पौरौ मगदेला गांव कै मरियम रुंदै बैई कब्रो कै धोरे बायरै खौड़ै रौए, औरौ रुंदै-रुंदै कब्रो कै ढौबौ नियुड़ेयो, गुफा कै भीतरो दैखौ। 12औरौ तिथै तियैं दो स्वर्गदूतौ कै चिटै खोटणो बाम्बेयोंदे ऐकी कै शीराने कै ढौबौ औरौ दूजै कै लातो ढौबौ बोठेयोंदै दैखै, जिथै यीशु कै लाश राखै राए थै। 13तिनुऐ तियौंखै बौल़ौ, “ओए रै बैटमाणिश, तू किथु रौ रौए?” मरियमे तिनुखै बौल़ौ, “सैजै मैरै प्रभु कै लाश कै लोए गौवै औरौ हांव ना जाणु कै तैसी कुकै राखै राए।” 14ऐजौ बौलणौ कै बाद सै पाछु फिरी औरौ यीशु कै खौड़ा दैखा, पौरौ ना पोछियाणी कै ऐजा यीशु औसौ। 15यीशुए तियौं बौल़ौ, ओए रै बैटमाणिश, तू किथु रो रौए? कोसी कै जौए लौआ? मरियमे तैसी बगीचै का माल़ी सौमझेयौ कै तैसीखै बौल़ौ, ओए रै साहब, जै तुऐं तैसकै लाश कै टिपै राए तौ मुंआ बौताए दै कै तुऐं तैसी कुकै राखै राए, औरौ हांव तैसी आगु लोए जांदै। 16यीशुए तियौं बौल़ौ, मगदेला गांव कै मरियम। तैणै पौछौड़ियौ फिरैयौ कै तियौंकै इब्रानी भाषा दो बौल़ौ रब्बूनी जिथका मतलब औसौ ओए रै गुरु। 17यीशुए तियौं बौल़ौ, मैरै लातो पांदी पौड़ेयौ नी रू, जिथुकै हांव इबी तौड़ी पिता पौरमेशवर कै धोरे पाछु ना हौटै रैई, पौरौ मैरै चैलै कै धोरे जायौ कै तिनु बौलदै, कै हांव आपणै पिता औरौ तोंवारै पिता, औरौ आपणै पौरमेशवर औरौ तोंवारै पौरमेशवर कै धोरे पाछु चालै रौआ। 18मगदेला गांव कै मरियमे जायौ कै चैलै कै बौतौऊं, “मोऐं प्रभु कै दैखा, औरौ तैणै मुं आरी ऐजी बातौ कौरी।”
चैलै कै बीच मुंजी यीशु का प्रगट हौणा
19तैसी दूसै औयतवारो कै बैल़खै कै जोबै सौबै चैलै ऐक साथै कौठै हौए रौवै थिए, औरौ तिनुऐ यहूदी नेता कै डौर शै दवार बोन्द कौरे राए थिए, तोबै यीशु ओऊवा औरौ बीच मुंजी खौड़ै हौयौ कै तिनुखै बौल़ौ, “तुऔं शान्तै भैटौ।” 20औरौ ऐजौ बौलेयौ तैणै तिनु आपणै हाथ औरौ आपणै पसली कै घाव दिखाए। तोबै चैलै प्रभु कै दैखैयो कै बैजाए खुशी हुवे। 21यीशुए तिनुखै हौजौ बौल़ौ, तुऔं शान्तै भैटौ; जैशैखै मैरै पिता पौरमेशवरे मुखै दुनिया पांदी भैजै राए ऐशैकैई मोऐं बै तुऔं दुनिया पांदी भैजै लोऐ। 22ऐजौ बौलेयौ तैणै तिनु पांदी फूंक मारै औरौ तिनुखै बौल़ौ, पवित्र आत्मा लौ। 23जै तुऐं कोसी कै पाप माफ कौरलै, तौ तिनकै पाप माफ हौंदै, औरौ जिनकै पाप तुऐं माफ नी कौरलै, तौ सैजै माफ ना हौंदै।
दैखिणा औरौ बिशवाश कौरणा
(मत्ती 28:16-20; मर 16:14-18; लूका 24:36-49)
24पौरौ बारौ चैलै मुंजीदा ऐक आदमी यानी थोमा जैसी दिदुमुस बौल़ौ, जोबै यीशु तिथै ओऊवा तौ सै तिनकै साथै ना थी। 25जोबै औकै चैलै थोमा कै बौलदै लागै, कै आमुए प्रभु कै दैख राए, तोबै तैणै तिनुखै बौल़ौ, “जांव तौड़ी हांव तैसकै हाथौ दै किलो कै घाव ना दैख पोऊँ औरौ किलो कै घाव दै आपणै गोठै नै पाए दियु, तांव तौड़ी हांव बिशवाश ना कौरदा कै सै मौरेयौंदे मुंजीदा जियुंदी हौए गौआ।”
26आठी दूसौ कै बाद तैसकै चैलै हौजौ घोरो कै भीतरै थिए, औरौ थोमा तिनकै साथै थिया, औरौ दवार बंद थियु, तोबै यीशुए आयौ तिनकै बीच दौ खौड़ै हौयौ कै बौल़ौ, तुऔं शान्तै भैटौ। 27तोबै तैणै थोमा खै बौल़ौ, “आपणै गोठै इथै लायौ मैरै हाथौ कै दैख औरौ आपणा हाथ लायौ कै मैरै पसली दा पा, औरौ शक कौरणा बंद कौर, पौरौ बिशवाश कौर कै हांव मौरेयौंदे मुंजीदा जियुंदी हौए गौआ।” 28ऐजौ शोणेयो थोमाए जोवाब दिया “ओए रै मैरै प्रभु, ओए रै मैरै पौरमेशवर!” 29यीशुए तैसीखै बौल़ौ, तुऐं तौ मुखै दैखैयो बिशवाश कौरे राए। धन्य औसौ सैजै जिनुवै मुं पांदी बिना दैखै बिशवाश कौरे राए।
ऐजी किताब यूहन्नाए काए लैखै
30यीशुए हौजौ बै भौरिशै निशान चैलो कै सामणै दिखाए, जू इयौं किताब पांदी लैखै ना रैई। 31पौरौ ऐजौ इथकारिए लैखै राए, कै तुऐं बिशवाश कौरौ, कै यीशु ही पौरमेशवर का बैटा मसीह औसौ, औरौ तैसी पांदी बिशवाश कौरेयौ कै तैसकै नांव लैई सौदा कै जिन्दगी पांव।
Currently Selected:
यूहन्ना 20: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
