यूहन्ना 17

यीशु कै आपी कारिए प्रार्थना कौरणै

1यीशुए आपणै चैलै खै ऐजी बातौ बुली औरौ तैणै स्वर्ग कै ढौबौ दैखौ औरौ प्रार्थना कौरे, “ओए रै पिता पौरमेशवर, सैजा सौमय आए गौआ, ऐजौ प्रगट हौंव कै पौरमेशवर कैतरा महान औसौ, कै बैटा बै तैरै महिमा कौरौ। 2जिथुकै तुऐं तैसीकै सौबी लोगौ पांदी औधिकार दिया, कै जिनु तुऐं तैसीकै दैय राए, तिनु सौबी कै सै सौदा कै जिन्दगी दैंव। 3सौदा कै जिन्दगी ऐजै औसौ कै लोग ताखै जाणै सौकौ, बल्कि सिरफ एकमात्र साची पौरमेशवर कै। औरौ ऐजौ बै कै सैजै मुखै जाणौ, यानी यीशु मसीह कै, जैसी तुऐं भैजै राए। 4जू काम तुऐं मुखै कौरणौ कै दैय राए थिया, तैसी काम कै पूरा कौरेयौ मोऐं दुनिया पांदी तैरै महिमा कौरे राए। 5औरौ ऐबै, ओए रै पिता जू महिमा मैरै तैरै साथै दुनिया कै बाणणौ दै औगौड़ियौ थै, तू मुखै आपणै साथै तियौंई महिमा शै महान कौर।”

यीशु कै आपणै चैलै कारिए प्रार्थना कौरणै

6“मोऐं तैरै बारै मुंजी तिनु चैलै कै बौताए राए, जिनु तुऐं दुनिया पौरैशै चोणैयो मुखै दैय राए। सै तैरै थिए औरौ तुऐं तिनु मुखै दैय राए औरौ तिनुऐ तैरै वचन कै मानै पाए। 7ऐबै सै जाणै गौवै, कै जू किछै तुऐं मुखै दैय राए, सैजौ सौबै तैरै ढौबौशौ औसौ। 8जिथुकै जू सौंदेश तुऐं मुखै दिया, सै मोऐं तिनुखै दिया औरौ तिनुऐ तैरै सौंदेश पांदी बिशवाश कौरा, ऐबै तिनु यकीन औसौ कै हांव तैरै ढौबौशा आए रौआ। औरौ ऐजा बिशवाश कौरे राए कै तुऐंई मुखै छाड़ा।

9हांव तिनु कारिए बिन्ती ना कौरु, जू दुनिया शै सौमबंध राखौ, पौरौ तिनु कारिए बिन्ती कौरु, जिनु तुऐं मुखै दैय राए, जिथुकै सै तैरै औसौ। 10औरौ जू लोग मैरै औसौ सैजै सौबै तैरै औसौ; औरौ जू तैरौ औसौ सैजौ मैरौ औसौ; औरौ इथलैई मैरी महिमा प्रगट हौए रौए।

11ऐबै हांव दुनिया पांदी ना रौंदा, हांव तैरै धोरे आन्दा लागै रौआ, पौरौ मैरै चैलै इबी बै दुनिया पांदी औसौ। ओए रै पवित्र पिता, आपणै नांव कै शौकतै लैई तिनकै रक्षा कौर, जू तुऐं मुखै दैय राए, कै सैजै ऐक हौंव जैशै आमु ऐक औसौ। 12जोबै हांव तिनकै साथै थिया, तौ मोऐं तैरै तैसी नांव लैई, जू तुऐं मुखै दैय राए तिनकै रक्षा कौरे, मोऐं तिनकै दैख-रैख कौरे औरौ विनाश कै बैटै कै छोड़ेयौ कै तिनु मुंजीदा कुणिए नाश ना होई, ताकि जू पवित्र शास्त्र दो लैखै राए, सै पूरु हौए जांव।

13पौरौ ऐबै हांव तैरै धोरे ओऊं, औरौ ऐजी बातौ दुनिया दी रौंदै बैई बौल़ै लोई, कै सैजै मैरी खुशी लैई पूरी तरह शै भोरै जांदै। 14मोऐं तैरा सौंदेश तिनुकै दिया, औरौ दुनिया कै लोगै तिनु आरी बोयर राखा, जिथुकै जैशै हांव दुनिया आरी सौमबंध ना राखु, तैशैकैई सैजै बै दुनिया आरी सौमबंध ना राखौ। 15हांव ऐजै बिन्ती ना कौरु, कै तू तिनुकै दुनिया पौरैशै उठाए दै, पौरौ ऐजौ कै तू तिनुकै तैसी दुष्ट शैतान कैईंदै बौचायौ राख। 16जिथुकै जैशै हांव दुनिया आरी सौमबंध ना राखु, तैशैकैई सैजै बै दुनिया आरी सौमबंध ना राखौ।

17तैरा वचन साचा औसौ, औरौ तिनु सौचाई दै आपी कारिए जौई कौर। 18जैशै तुऐं मुखै दुनिया पांदी भैजा तैशैखैई मोऐं बै तिनुकै दुनिया पांदी भैजै। 19औरौ तिनकै फायदै कारिए हांव आपी खै सौचाई दा जौई कौरु, ताकि सैजै बै सौचाई कै दवारा जौई कौरे जांव।”

यीशु कै आपणै सौबी बिशवाशी लोगौ कारिए प्रार्थना कौरणै

20“हांव सिरफ इनुई चैलै कारिए बिन्ती ना कौरु, पौरौ तिनु कारिए बै बिन्ती कौरु, जू इनकै सौंदेश कै दवारा मुं पांदी बिशवाश कौरदै, 21कै सैजै सौबै ऐक हौंव, जैशै तू ओए रै पिता मुं दा औसौ, औरौ हांव तांवदा औसौ, तैशैखैई सैजै बै आमु मुंजी हौंव। इथकारिए दुनिया कै लोग बिशवाश कौरौ, कै तुऐंई मुखै भैजै राए।

22औरौ सैजै महिमा जू तुऐं मुखै दै, मोऐं तिनुखै दै कै सैजै तैशैकैई ऐक हौंव जैशैकै आमुए ऐक औसौ। 23हांव तिनुदा औरौ तू मुं दा कै सै सिध्‍द हौयौ खै ऐक हौए जांव, औरौ दुनिया जाणौ कै तुऐं ही मुखै भैजै राए, औरौ जैशणा तुऐं मुं आरी प्यार राखा, ऐशणाई तिनुआरी प्यार राखा।

24ओए रै पिता, हांव चोऊं कै जिनु लोगौ खै तुऐं मुखै दैय राए, जिथै हांव औसौ, तिथै सैजै बै मैरै साथै हौंव कै सै मैरी महिमा कै दैखौ जू तुऐं मुखै दैय राए, जिथुकै तुऐं दुनिया कै बाणणौ दै औगौड़ियौ मुं आरी प्यार राखा।

25ओए रै धरमी पिता, दुनिया कै लोगै ताखै ना जाणी, पौरौ मोऐं ताखै जाणै राए, औरौ इनु चैलै बै जाणै पाए कै तुऐंई मुखै भैजै राए। 26मोऐं तिनुकै बौताए राए कै तू कुण औसौ, औरौ बौतांदा रौंदा कै जू प्यार तू मुं आरी कौरे, सैजा प्यार तिनुदा रौंव, औरौ हांव तिनुदा रौंऊ।”

Currently Selected:

यूहन्ना 17: SRXNT

Highlight

Copy

Want to have your highlights saved across all your devices? Sign up or sign in

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

Learn More About सिरमौरी नौवाँ नियम