यूहन्ना 18
18
बागो दा यीशु कै थोम्बाणा
(मत्ती 26:47-56; मर 14:43-50; लूका 22:47-53)
1जोबै यीशुए प्रार्थना कौरे पाए तौ सै आपणै चैलै कै साथै किद्रोन कै नाल़ै कै पाईलै ढौबौ हौटा। तियौं जौगैह पांदी ऐक बाग थिया, औरौ सै तिथकै भीतरै हौटै। 2तैसका थोमाणौवाल़ा यहूदा इस्करियोती बै तियौं जगह कै जाणौ थिया, पौरौ यीशु आपणै चैलै कै साथै तिथै जाया कौरौ थिया। 3तोबै यहूदा इस्करियोती सैनिकौ कै ऐकी गुटो कै औरौ मुख्य यहूदी पुरोहितो औरौ फरीसी लोगौ कै ढौबौशा मंदिर कै रौखवाल़ै कै लोयो खै दिवे औरौ मशालों औरौ हथियारों कै लोयो खै तिथै ओऊवे। 4तोबै यीशु सैजी सौबै बातौ कै जाणैयौ जू तैसकै साथै हौणौवाल़ी थी, औगौड़ियौ जायौ खै औरौ तिनुखै पूछु, “तुऐं कोसी कै जौए लौआ?” 5तिनुऐ तैसीखै जोवाब दिया, “नासरत गांव कै यीशु खै।” यीशुए तिनुखै बौल़ौ, “हांव औसौ।” तैसी थोमाणौवाल़ा यहूदा इस्करियोती बै तिनकै साथै खौड़ा थिया। 6यीशु कै ऐजौ बौलेयौ ही, कै हांव औसौ, सै पौछौड़ियौ होटेयो जोमीनो पांदी रिड़ै गौवै। 7तोबै तैणै तिनुवांदो पूछु, “तुऐं कोसी कै जौए लौआ।” तिनुऐ बौल़ौ, “नासरत गांव कै यीशु खै।” 8यीशुए जोवाब दिया, मोऐं तौ तुऔं बौल़ै दियु कै हांव औसौ, जै तुऐं मुखै जौए लौआ तौ मैरै इनु चैलै कै जाणौ दैव। 9ऐजौ इथकारिए हौं ताकि यीशुए जू आगै बौल़ै राए थियु सैजौ साचौ हौए जांव, जिनु लोगौ कै तुऐं मुखै दैय राए तिनुमुंजी दै मोऐं ऐक बै ना खोए रैई।
10तोबै शमौन पतरसे तलवार खिंचै जू तेसीयागो थै औरौ महायहूदी पुरोहित कै नोकर पांदी चौलायौ, तैसका सोंवा कान काटै दिया। तैसी नोकरो को नांव मलखुस थियु। 11तोबै यीशुए पतरसो खै बौल़ौ, आपणै तलवार म्यान दै राख। जू दुख मैरै पिता पौरमेशवरे मुखै दैय राए, का हांव तैसी ना सोऊं?
हन्ना कै धोरे यीशु
12तोबै सैनिकौ कै गुटे औरौ तिनकै औधिकारियो औरौ यहूदी मन्दिरो कै रौखवाल़ै यीशु खै थाम्बैयौ बानै दिया। 13औरौ औगौड़ियौ तैसी हन्ना कै धोरे लोय गौवै, जिथुकै सै तैसी साल कै महायहूदी पुरोहित कैफा का ससुर थिया। 14सै सैजाई कैफा थिया, जैणै यहूदी नेता कै सलाह दै थी कै अमारै लोगौ कारिए ऐकी आदमी कौ मौरणौ आछौ औसौ।
पतरस का यीशु कै पोछैयाणनौ शै इन्कार
(मत्ती 26:69-70; मर 14:66-68; लूका 22:55-57)
15शमौन पतरस औरौ ऐक ओका चैला बै यीशु कै पौछौड़ियौ हौटै गौआ। ऐजा चैला महायहूदी पुरोहित का जाण पहचाण का थिया, औरौ यीशु कै साथै महायहूदी पुरोहित कै आँगणो दा हौटा। 16पौरौ पतरस बायरै दवारो धोरे खौड़ा रौआ, तोबै ओका चैला जू महायहूदी पुरोहित कै जाण पहचाण का थिया, बायरै निकल़ा दवार पांदी खौड़ै नोकरानी कै बौलेयौ खै, पतरस कै भीतरै लियोऊवा। 17तोबै तियौं नोकरानीए जू दवारो पांदी खौड़ै थी, पतरस कै बौल़ौ, “कै तू बै ऐसी आदमी कै चैलै मुंजीदा औसौ?” तोबै तैणै बौल़ौ, “हांव ना आथी।”
18मुख्य यहूदी पुरोहितो कै नोकर औरौ मन्दिर कै रोखवाल़ै जाड़ो लागणौ की बौजैह शै अंगार बाल़ेयो खै खौड़ै हौयौ आग सेकदै लागै रौवै थिए तोबै पतरसे बै तिनकै साथै आग सैकै लोए थै।
महायहूदी पुरोहित कै धोरे यीशु
(मत्ती 26:59-66; मर 14:55-64; लूका 22:66-71)
19तोबै महायहूदी पुरोहिते यीशु कै चैलै कै बारै मुंजी औरौ तैसकै उपदैश कै बारै मुंजी पूछु। 20यीशुए तिनुकै जोवाब दिया, मोऐं सौबीआरी खौलेयौ बातौ कौरी, मोऐं यहूदी सभा-घोरो औरौ मन्दिर दै जिथै सौबै यहूदी लोग कौठै हौया कौरौ थिए, सौदा उपदैश दिए औरौ गुप्त दौ किछै बै ना बुली। 21तुऐं मुंआदो किथु पूछु? शुणणौवाल़ै लोगौ शै पूछ कै मोऐं तिनुवा का बौल़ौ? दैख सै जाणौ कै मोऐं का का बुलू। 22जोबै तैणै तिनुखै बौल़ौ, तौ मन्दिर कै रोखवाल़ै मुंजीदै ऐकीए जू तिथी खौड़ा थिया, यीशु कै चटाका लायौ बौल़ौ, “का तू महायहूदी पुरोहित कै ऐशैखै जोवाब दैय?” 23यीशुए तैसी जोवाब दिया, जै मोऐं बुरु बौल़ै राए, तौ इथै सौबी खै बोता कै का गौलत बौल़ौ, पौरौ जै सोही बौल़ै राए तौ तू मुखै किथुखै मारै? 24यीशु इबी बै बानेयोंदा थिया, औरौ हन्नाए तैसीकै महायहूदी पुरोहित कैफा कै धोरे भैजै दिया।
पतरस का यीशु कै पोयछाणणो शै दुजाल़ियो इन्कार
(मत्ती 26:71-75; मर 14:69-72; लूका 22:58-62)
25शमौन पतरसे खौड़ै हौयौ आग सैक लोए थै। तोबै तिनुऐ तैसीखै बौल़ौ कै तू बै तैसकै चैलै मुंजीदा तौ नी औसौ? तोबै सै भाजै गौआ औरौ बौल़ौ, “हांव ना आथी।” 26महायहूदी पुरोहित कै नोकरो मुंजीदा ऐक जू तैसकै कुड़बे का थिया, जैसका कान पतरसे काटै दिया थिया तैणै बौल़ौ, “का मोऐं ताखै यीशु कै साथै बागौ दा ना दैख रैई थी?” 27पतरस हौजौ बै भाजै गौआ औरौ तौलोंई कुकड़ै बांक दै।
यीशु कै पिलातुस कै धोरे लोए जाणा
(मत्ती 27:1-2,11-31; मर 15:1-20; लूका 23:1-25)
28औरौ सिपाही झीशींदै यीशु खै कैफा महायहूदी पुरोहित कै धोरे शै रोमी राज्यपाल पिलातुस कै महल खै लोए गौवै, पौरौ सै आपी महल कै भीतरै ना हुटी इथकै बौजैह ऐजै थै कै जै कुणिए बै महल कै भीतरै जांव, तौ सै अशुध्द हौए जांव थिए, औरौ तैसीखै फसह कै तैयारो कौ खाणौं खाणौ कै इजाज़त नी हौंव थै, जिथुकै पिलातुस बैगानै यहूदी का थिया।
29तोबै राज्यपाल पिलातुस तिनकै धोरे दा बायरै ओऊवा औरौ पूछु, “तुऐं ऐसी आदमी पांदी कियों बातौ का इलजाम लाए लौआ?” 30तिनुऐ तैसी जोवाब दैयौ बौल़ौ, “ऐजा आदमी अपराधी औसौ तोबैई आमुए ऐसीकै तैरै धोरे लाए राए।” 31राज्यपाल पिलातुसे तिनुखै बौल़ौ, तुऐंई ऐसी नियौ खै आपणै मूसा कै कानून कै हिसाब शै तैसका न्याय कौरौ। यहूदी नेताए तैसीखै बौल़ौ, आमुवा कोसी कै मारणौ का औधिकार ना आथी। 32ऐजौ इथकारिए हौंव, कै यीशु की सैजी बातौ पूरी हौं जू तैणै इशारे दैयौ खै बुली थी, कै तैसकै मौत कैशैखै हौंदै।
33तोबै राज्यपाल पिलातुस महल कै भीतरै हौटा औरौ यीशु खै बोयदयो पूछु, “का तू यहूदी लोगौ का राजा औसौ?” 34यीशुए जोवाब दिया, “का तू ऐजै बात आपणी औरौ शै बौल़ै या ओकी लोगै मैरै बारै मुंजी ऐजै बात तांव कैंई बौल़ै राए?” 35राज्यपाल पिलातुसे बौल़ौ, “तू जाणै कै हांव यहूदी ना आथी? तैरै ही लोगै औरौ मुख्य यहूदी पुरोहिते ताखै मैरै हाथौ दा सौंपै राए, तुऐं का कौरे राए?” 36यीशुए जोवाब दिया, मैरा राज्य इयौं दुनिया का ना आथी जै मैरा राज्य इयौं दुनिया का हौंदा, तौ जोबै हांव यहूदी नेता कै दवारा गिरफ्तार हौआ तौ मैरै चैलै इथकारिए लौड़ाए कौरौ थिए, पौरौ ऐबै मैरा राज्य इथै का ना आथी। 37राज्यपाल पिलातुसे बौल़ौ, “तौ का तू राजा औसौ? यीशुए जोवाब दिया, तू बौल़ै कै हांव राजा औसौ। मैरै जन्म लोणो औरौ दुनिया पांदी आणौ कै बौजैह ऐजै औसौ कै हांव सच कै बारै मुंजी शिखाए सौकु, औरौ सच कै मानणोवाल़ै सौबै मैरी बातौ शुणौ। 38राज्यपाल पिलातुसे तैसीखै बौल़ौ, साचौ का औसौ?” ऐजौ बौलेयौ सै हौजौ यहूदी नेताओं कै धोरे हौटा औरौ तिनुखै बौल़ौ, “हांव ऐसी दा किछै बै दोष ना पोऊँ।
यीशु या बरअब्बा
39पौरौ तोंवारै ऐजा भोवार औसौ कै हांव फसह कै तैयारो मुंजी तुऔं कारिए ऐक आदमी छोड़े दियु। तौ तुऐं का चांव, कै हांव तुऔं कारिए यहूदी लोगौ कै राजा खै छोड़े दियु?” 40तोबै तिनुऐ लैलियायो बौल़ौ, “ऐसी नै पौरौ आमु कारिए बरअब्बा कै आज़ाद कौरे दैंव।” औरौ बरअब्बा डाकू थिया।
Currently Selected:
यूहन्ना 18: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
