MARKU 4

Përim pan tiba pi anaamanaana nagur

(Mat 13.1-23; Lúk 8.4-15)

1 # Lúk 5.1-3 Yeesu akaka jot bëjukan di kambaŋ bërëk. A kandënd bañaan kawiak júk tsi nul, a u tsuul a na gija kanawa ee tsoar, alaayatsa kambaŋ bërëk. A bañaan bëlieng ci di kambaŋ bërëk tsi kankay. 2A nuu jukan bukul ngëko ngëcumal, koo tib këtib bukul irim. Tsi bëjukanul a na ja: 3“Nda cikëndëni! Nagur apën pii gur utul; 4a bi nu gur bi, a u ka u yër wi tsi kambaŋ bëga, a ngëko-ngëyits bi ee re. 5A ulon yër tsi tsëko ilaak, tsan dëmbats tsi mboos; a u car amayi, par mboos rëmbats tsul. 6Maa ukatee unu, a bënu tër a u kay, par kaats ibuul. 7A ulon yër tsi buwuul iyu, a buwuul iyu wiaka a ba nëts, a bukats. 8A ulon yër tsi tsëko mgiji, a u natsa wiaka, a u buk mbuk; pëlon buk këbuk ngëntaaja ngëwaants, a pëlon buk ngëntaaja paaj, a pëlon buk useent.” 9Din, a na ja: “Nan kai ibats iteeni, na tean!”

10Bi Yeesu laayatsa bi, a untaaja bukun ni batëb, ni bando bukunk fayul, yeparul uleka katib-irim. 11A Yeesu yank bukul aja: “Ind, un doots wunk mea, wi pësien Nasien-batsi, aa ind; maa ban ci biki di utsand, bukul bëlieng bu koo jukanaana tsi katib-irim, 12#Isa 6.9,10par bu

koo teen bu ka win, maa bë ri ka yëkëran;

bu koo cikëndën bu ka te, maa bë ri ka me;

ucits ank, bu ka yaar ibats,

din bu ka jampësaa.”

13A na yepar bukul aja: “Nda meets përim pan tiba pink-a? A um bi ndu me bun irim bëlieng i kan tiba yi këtiba?

14Nagur, agur përim; 15balon bañaan, bë ci pi utul tsi kambaŋ bëga, tsi përim wayana tsi; bi ba te bi pul, ucar umënts wun a Useetaani bi ee pënan përim pa wayana punk di ngëwaas bukul. 16A balon buts ci pi utul un gura wunk di tsëko ilaak; bi ba te bi përim, ucar umënts wun a ba niiran pul ni ulílan. 17Maa bukul bërier bukul bu liincӓts, bë ci ban dits biki ka jon; ubaandi unoor, oo pënoor-noorana tsi undo përim, din bu ka wëtan uwak. 18A balon kak, bë ci pi utul un gura wunk tsi buwuul iyu; bi ba te bi përim, 19a bu kë wejats ngëko umundu, bëka ni karí-ko kë raac bukul; a ngëmënts ngan nëts përim, atsu pul kakaats-bëkat. 20Maa balon bañaan, bë ci pi utul un gura wunk tsi tsëko mgiji; bu te përim a ba niiran pul, a ba ka bëkat; nalon a tsij këbuk ngëntaaja ngëwaants, nacints këbuk ngëtaaja paaj, a nacints kak këbuk useent.”

Përim pan tiba pi anaamanaana ulamp

(Lúk 8.16-18)

21 # Mat 5.15; Lúk 11.33 A Yeesu kaka ja bukul: “Ane ñaan ka tsiji ulamp, në jej pëcaa ka kundëna, oo në tsu di utsia bëkaab a? Wul tsijaatsee pii tsua di tsëpafi-a? 22#Mat 10.26; Lúk 12.2Par kaats ko un beka wi un dits wi ka pibanaa, nin un kunda wi un dits wi ka meaa. 23Nan kai ibats iteeni, na tean.” 24#Mat 7.2; Lúk 6.38A na kaka ja bukul: “Nda rukan ibats tsi ko wi ndu te wi. Kaniibi ki nduu niibëna ki, kul kee niibëna ind kun buts, a ndë watsësaa. 25#Mat 13.12; 25.29; Lúk 19.26Par nan kai, nii aa; a nan kaatsi, nii caanaa ŋal wi na ka wi.”

Përim pan tiba pi anaamanaana utul

26A Yeesu kaka ja: “Iink di pësien Nasien-batsi naam dun: ñaan agur utul tsi utsia; 27bërëm ni pënak, na ŋooy oo na natsa ank, utul aci tsi pëmayi a uu wiaka, te nul meets bi u ro bi. 28Utsia ja u roon u buki bërier : ucak, aci katsats kañuaw, kii tsij kanëng; a tsi ituami, mbuk ka cum kanëng. 29#Joe 4.13A uwal wi mbuk jank wi, din në fali ni ukaawi, par uwal kacët aband.”

Përim pan tiba pi anaamanaana pëbuk bëmutaar

(Mat 13.31-32; Lúk 13.18-21)

30A Yeesu kaka ja: “We wi nja kë naamanaan wun pësien Nasien-batsi? Oo uwom unaamanaani winja kë pibanaan wun pul? 31Anaam ni pëbuk bëmutaar, pan ci pi pëbuk pan pe pi pëtienkëts tsi mbuk mko bëlieng tsi utsia; 32maa uwal wi pa saala wi, pë wiaka, pë ruka ci bëko ban pe bi mko uwoorta bëlieng; bë jabani ina iwiak, a ngëko-ngëyits kë bi koo cangan tsi bëlími bul.”

33A Yeesu kë leents bukul përim, koo tib këtib irim icumal pi imënts yan, tsi ko wi ba yëlan wi pëte. 34Yeesu di ka ñakanaan bukul, ucits ba tsi katib-irim; maa tsi mpats, nëë pac bafetsul ngëko bëlieng.

Yeesu anatsan ukëk di bërëk

(Mat 8.23-27; Lúk 8.22-25)

35Tsi unu umënts wun, uyër pëcaal, a Yeesu ja bafetsul: “Ngë lut pa kajara kacints kun.” 36Bi ba patsësar bi ni kandënd, a ba tsëpand Yeesu tsi kanawa ki na ciina kunk; a ilon inawa ci ni nul. 37A ukëk uwiak natsee, a ngëmaroŋ kë kobar tsi kanawa, a ku tsas pëcum mlik. 38A Yeesu ro ci di bëŋooy di ufets kanawa, a na paf beenul tsi upafi. A ba wambul, a ba jaul: “Najukan! Nja ka cӓts, a m tsuuts ko-a?” 39A na teeni, a na leentsar ukëk, a na ja bërëk: “Tsëkandari! Yëŋandari!” A ukëk nats, a tsëko juabuts jok. 40Din a na ja bukul: “We ka wun a nda lal iink? Nda netse ka uwak-a?” 41A ba lënk mak, a uja bandoon biki bu ka ja bacints bukul: “Namëntsi aci naom? Par, aja ŋal ukëk ni bërëk, ngë ro ko wi na ja wi!”

Currently Selected:

MARKU 4: KPKNT

Highlight

Copy