MARKU 5

Yeesu ayësan niints ni ucaay niaji

(Mat 8.28-34; Lúk 8.26-39)

1A ba band kalutar bërëk kacints, di pëboos bañaan Geraasa. 2Bi Yeesu welee bi di kanawa, din a nalon niints ni ucaay niaji pëni di ibuk pii jëk ni nul. 3Nul, aciina di ibuk, a uja ŋal ni mkorente, ñaan yilaants pëtanul. 4Par ngëyaas ngëcumal na janka, a na tana ni mkorente, maa na mar-maran mkorente, na fam-faman ngëjank. A ñaan cits, nan yilaani pëmobul. 5Bërëm ni pënak, nuu yaana ibuk ni ngëntunda, nuu lië rul, nuu lupan uliaful ni ilaak. 6Bi na win bi Yeesu wama lawani, na túk ee jintëla tsi bërunul, 7a na lië mak aja: “Wee m kaaraan wun ni nji, wi Yeesu Abuk Nasien-batsi Kanpe pëci di ruets? Man ñaanu tsi katim Nasien-batsi, cӓts luekanin.” 8Par Yeesu ro ci tsi pëjaul: “Ucaay, pënan tsi niintsi.” 9A Yeesu yeparul aja: “Katímu ka jaka um?” A na yankul aja: “Katím nji ka jaka Kandënd, par wund acum.” 10A na buara Yeesu mak, pa na rits ruak ngul nga pën tsi pëboos pëmënts pun.

11A pëtan ngënkëmbe pëwiak ro ci tsi kafeer, tsi kambaŋ untunda. 12A ngëcaay buara Yeesu, ajaul: “Gúts wund di ngënkëmbe gun, wund ka niaj ngul.” 13A Yeesu niiran ngul. A ngëcaay pën, a nga niaj ngënkëmbe; a pëtan panduakan pi ngënkëmbe ngëmiil ngëtëb (2.000), këra-këree di ruets ee yër di bërëk, a nga yoora.

14A bayafan ngënkëmbe túk ee leents di përaasa ni di ngëntab, ko un par wi. Din, a bañaan pëni pii teen ko un par wi. 15Bi ba baandi bi tsi Yeesu, a ba win niints ni ngëcaay roi niaj kak aci uwar, na tiema iŋi a na tsoar. Din a ba lënk. 16Ba maatir biki ko un par wi, leents bañaan ko un par-na wi niints ni ngëcaay roi niaji, ni uleka ngënkëmbe. 17A ba kur pëbuara Yeesu, na pën na lawan pëboos bukul.

18Bi Yeesu kë gija bi kanawa, niints ni ngëcaay roi niaj buaraul na wëtul në ci ni nul. 19Yeesu niiranatsul, maa na jaul: “Tsëpan katou, di bañaanu; leentsan bukul ngi Ajug rooru ngi bëlieng, ni bi na yëkaru bi ipës.” 20Din, a niints namënts un pën atsëp; a na kur pëleents tsi pëboos #5.20 Dekapolis: Aci përim ugërek, ko wi pac wi aci këraasa untaajaDekapolis, ngi Yeesu roorul ngi bëlieng; a bañaan pikra bëlieng.

Yeesu natsani abuk Jairus ŋaats di pëcӓts, a na yësan ŋaats ni kan tulee pëñaak

(Mat 9.18-26; Lúk 8.40-56)

21Bi Yeesu gija bi kanawa awitsa kalutar kacints, a kandënd bañaan kawiak fayul; aro ci di kambaŋ bërëk. 22A nalon tsi bawiak kato-kajúki baandi tsi Yeesu, ka jaka Jairus. A nu win Yeesu, na yër tsi itsiimul, 23a na ci tsi pëbuaraul koo ja: “Abuk nji ŋaats ka tsas pëcӓts; bili kii paful iñan, në buer, në kak ka ci nayësal.” 24A Yeesu tsëp ni nul. A kandënd bañaan kawiak kë fetsul, bu kë miepul.

25A u ka nalon ŋaats, ni kan tulee pëñaak, ko undo wi ngëwaanu untaaja ni ngëtëb; 26anoor mak tsi iñan bacuunkan bacumal, acok ko wi na ka wi bëlieng, te matats koon këmat; maa a na ru pe këpe pëci tsi unoor. 27A bi na te bi bu kë ñakanaan uleka Yeesu, a na bi tsi ufets Yeesu tsi kandënd bañaan, a na kërara kaŋí-bëtiemul. 28Par aja tsi uwejatsul: “Ŋal uci iŋiul yi bëtiem din, yi n kërara yun, ka yës.” 29Tsi uyëk umënts wun, a pëñaakul tsañan pëtula, a na te tsi uliaful na yësana pëmaakul.

30Tsi ucar umënts wun a Yeesu te pëyëlan pën tsi nul; a na witsësa tsi pëncuaf kandënd bañaan, a na ja: “Yën kërara un iŋi nji?” 31A bafetsul jaul: “M win kandënd bañaan ci tsi pëmiepu, a m du kë ja, yën kërarain un.” 32Maa Yeesu teen afayësan, pëwin nandoi ko wan. 33A ŋaats me ko undola wi tsi nul, a na lal a nuu lënk, din a na bi ee jintëla tsi bërun Yeesu, a na leentsul ucär bëlieng. 34A Yeesu jaul: “Abuk nji, uwaku abueranu, tsëpan ni pëfac, m yësana pëmaaku.”

35Bi na wama bi ka ñakan, balon ban pëni biki kato nawiak kato-kajúki baandi, a ba jaul: “Abuku ŋaats acӓts; we ka wun a m wama ka nooran Nawiak?” 36Maa Yeesu yankats irim yan, na ja nawiak kato-kajúki: “Cats lënk, Uwakan din.” 37A niiraants ñaan pëfetsul, ucits ba Per, ni Jakob, ni Joŋ nan tsaari ni Jakob. 38Bi ba band bi kato nawiak kato-kajúki, a Yeesu win bañaan juatsan, bu kë kaan a bu kë lië mak. 39Bi na niaj bi, a na ja bukul: “We ka wun nda juatsan, a nduu kaan? Napats cӓtsats, aŋooy këŋooy.” 40A ba ci tsi përiatul. Maa, bi na ba bi përuakar bukul bëlieng utsand, a na tsëpand asin abuk nji, ni anin abuk nji, ni ban ci bukunk ni nul, a na niaj di abuk nji ci ri. 41Na mob kañan napäts, a na jaul: “Talita, kum!” Uci pa colësiaara, aci: “Napats nampëli, manjau, natsaan.” 42Tsi uyëk umënts wun, napäts natsa a nuu yandaar, par aka ngëwaanu untaaja ni ngëtëb. Din, ba pikra mak. 43A Yeesu ja bukul ñaan tsë me koon këme umënts wi; a na ja, napäts aa bariala.

Currently Selected:

MARKU 5: KPKNT

Highlight

Copy