MARKU 3

Yeesu ayësan nalon ñaan nan cӓtsi kañan

(Mat 12.9-14; Lúk 6.6-11)

1Yeesu akaka niaj kato-kajúki; Nalon niints nan cӓtsi kañan, aci rul. 2A ba ci tsi pëteen Yeesu ne ka yësanul ank tsi Unu-pënaakësa, din bu ka tumtsarul. 3A Yeesu ja niints nan cӓts unk kañan: “Natsaan nats, tsi pëncuaf.” 4A na yepar bukul aja: “We niirana wun përola tsi unu-pënaakësa: përo uwar oo u waraatsa wi? Pëbueran ñaan oo pëfiŋul?” Maa ba yëŋandar tsi ba yëŋandar tsi. 5A Yeesu teen bukul ni uriab, ajëkëlan; na juatsan undo katamb-ngëwaas bukul, na ja niints: “Colani kañan.” A na colan, a kañanul kak ayës.

6Bi Bafariseu pën bi, din a ba tsëp ee júk ni bañaan Eroodis, pa pëtsas bi bu kë ro bi, a bu ka fiŋ Yeesu.

Yeesu ayësan bañaan bacumal di kambaŋ bërëk Galileeya

7Yeesu pën ni bafetsul atsëp kambaŋ bërëk. A kandënd bañaan kawiak kë fetsul; bë pëni Galileeya. 8A kandënd bañaan kawiak kë te ngëko ngëcumal ngi Yeesu ro ngi, a ba pëni abi tsi nul; bë pëni Judeeya, ni Jerusalem, ni Idumeeya, ni kalutar Jordan, ni ngëcaak ngan wok ngi Tiiru ni Sidon. 9#Mar 4.1; Lúk 5.1-3Din, a na ja bafetsul ba yecisul kanawa katies, undo kandënd bañaan përits miepul. 10Par ayësan bañaan bacumal; a u tsu ban tsij biki bëlieng mmaak man ci mi ba këci, bë piembëlar pëya di nul, pa pëkëraraul. 11A uja ba niaja biki ngëcaay kë winul, bu ka yër tsi bërunul, bu kë lie koo ja: “Wi ci-un Abuk Nasien-batsi!” 12Maa, Yeesu leentsar ngul ni irim itamb, pa nga rits leents ko wi na ci wi.

Yeesu arat bapostolu untaaja ni batëb

(Mat 10.2-4; 12.22-32; Lúk 6.12-16; 11.14-23)

13A uu ba, a Yeesu paya untunda, a na rui biki na ŋal biki, a ba bi tsi nul. 14Din, a na rat untaaja ni batëb, atsu bukul pëci bapostolu, pa ba ci ni nul, nuu yël bukul pëleents përim, 15bu ka tsij pëyëlan puu ruak ngëcaay. 16Untaaja ni batëb biki na rat biki, ci bukun biki: Simon ni na tsui katim, Per; 17Jakob abuk Sebede, ni atsaul Joŋ, biki na tsu biki katim, Boanerges, un ci wi-babuk kampalambamb; 18ni Andëre, ni Filip, ni Bartolomeu, ni Mateu, ni Tomaas, ni Jakob abuk Alfeu, ni Tadeu, ni Simon nakamandar-ucaakul, 19ni Judas Iskarioti, nan bi ya Yeesu ufets.

20Din, a na tsëp ee niaj kato, a kandënd bañaan kaka bi ee júk aa nul ni bafetsul yilaants bi bu kë riala bi. 21Bi bayëtsul te bi ko wan, a ba tsëp pii mobul, par bë ja: “Awitsa nafuur.” 22#Mat 9.34; 10.25A bapican-ngëtsua ban pëni biki Jerusalem ja: “Aci Beelsebul, un ci wi uwiak ngëcaay, niajul wun; wi nuu ruakëna wun ngëcaay.” 23Din, a Yeesu rui bukul, a na tib bukul irim aja: “Um bi Useetaani yëlan bun përuak Useetaani? 24Uci pësien kë kaman tsi bametsu pul, pësien pëmënts di ka yëlan pëwam. 25Uci kato kë kaman tsi bametsu kul, kato kamënts di kee yëlan pëwam. 26Uci Useetaani natsara pëkaman been a u tawësar, di ka yëlan pëwam, utuami aband. 27Ñaan yëlaants na niaj kato nan kai yilaani, në kiej bëkaul; uroko në cakës na tanul; din, në kiej ngëko katoul.

28Mán leents ind ucär: Ngëko bëlieng ka jampësaa babuk bañaan-bajin: Ngëjuban, ni ikar i bu kë kar yi ba këkar Nasien-batsi. 29#Lúk 12.10Maa nan kari ba këkar Uwejats-ujënts, di ka jampësaa yaas; par ulaciul aci pa sandëndën.” 30Aja ank undo bi ba ja bi: “Aniaja ucaay.”

Anin Yeesu, ni ban tsaar biki ni nul Yeesu

(Mat 12.46-50; Lúk 8.19-21)

31Anin Yeesu, ni ban tsaar biki ni nul Yeesu, bë baandi, a ba nats di utsand, a ba mandaar përuiul. 32A kandënd bañaando tsoar afayul, a na jaka: “Teenane, aninu, ni ban tsaar biki ni wi bayënts ni bakaats, bukul bukun di utsand a bu kë tsasu.” 33Din, a na yank bukul aja: “Yën ci-un anin nji, a bokoom ci bukun ban tsaar biki ni nji?” 34A ban tsoar biki afayul, na teen bëkul ajëkëlan, a na ja: “Bukul biki, anin nji, ni batsaar ni nji. 35Wul ka wun, nan ci ba këci tsi përo uŋal Nasien-batsi, namënts un aci nan tsaari ni nji, niints, ni nan tsaari ni nji, ŋaats, ni anin nji.”

Currently Selected:

MARKU 3: KPKNT

Highlight

Copy