MARKU 14

Bajudeu ci tsi pëtsas bi bu kë ro bi aa bu ka fiŋ Yeesu

(Mat 26.3-5; Lúk 22.1-2; Joŋ 11.45-53)

1 # Pëp 12.1-27 A u ruka ngënu ngëtëb, pa Ufesta-pëbuer ni ufesta kare-upom un tsijats wi bëko-bëlëtsatsaani ka baandi. A bawiak-bajakan, ni bapican-ngëtsua kë tsas bi bu kë par-na bi kafӓl, aa bu ka mob Yeesu ba fiŋ. 2Maa, a ba ja: “Kaats pëci tsi unu ufesta, pa mangúsëlar përits ci tsi bañaan.”

Nalon ŋaats atular Yeesu ulicar tsi been

(Mat 26.6-13; Joŋ 12.1-8)

3 # Lúk 7.37,38 Bi Yeesu ci bi di Betaania, a ba tsoar bariala di kato Simon, na maaki kantseul-kajankal. A u ka ŋaats na niajii, a tsiji pëjaam #14.3 Alabastëru: Aci pëjaam ulicar pan niewa pi këniewa, oo pan feja pi këfeja.alabastëru, pan tsij pi ulicar un gëbëlanaatsa wi, uñatsal, u leempëna wi ni #14.3 Bënardu: Aci bëko; bul ka leempaa ulicar uñatsal.bënardu. A na fam pëjaam alabastëru atular Yeesu ulicar tsi been. 4A balon tsi ban ci biki tsul riabats, a uja nandooni në ja bacints: “We ci wun kacok ulicar ki? 5Par ulicar umënts wi aro yëlan pëwaapara ngëseent ngëwaants Dinaariu, u aa baranj.” A ba ŋoman ŋaats. 6Maa a Yeesu ja: “Nda wëtanul; We ka wun a ndu nooranul? Nul aro ko uwar tsi uleka nji. 7#Ulú 15.11Par, nda ci ni baranj ngënu bëlieng; nda yëlan përoor bukul uwar, uwal wi nda ŋal wi. Maa nji, nda ri ka ci ni nji ngënu bëlieng. 8Nul, aro ko wi na yëlan wi përo. Acar atular uliaf nji ulicar, pa pëmooy. 9Mán leents ind ucär: Tsi Upetsan-uwar kë leentsaa tsi, tsi umundu bëlieng, ko wi ŋaatsi ro wi, ka leentsaa buts pa pëlesënaul.”

Judas Iskarioti ayecis pëya Yeesu ufets

(Mat 26.14-16; Lúk 22.3-6)

10Judas Iskarioti, nan cii nalon tsi bafetsul untaaja bukun ni batëb, atsëp di bawiak-bajakan, pii gutsar bukul Yeesu. 11Bi ba cikëndënul bi, a ba lílan, ba watsanul pëul uncaam. A Judas kë tsas bi në ro bi aa në guts Yeesu tsi uwal u wara wi.

Yeesu ayecis pa përe Ufesta-pëbuer ni bafetsul

(Mat 26.17-30; Lúk 22.7-23; Joŋ 13.21-30; 1Kor 11.23-29)

12Tsi unu ucak ufesta upom un tsijats wi bëko-bëlëtsatsaani, wi Ufesta-pëbuer kë jakanaa wi, bafets Yeesu jaul: “Tsum tsi m ŋal tsun wund pëtsëp pii yecis ngëko pa wi përe Ufesta-pëbuer?” 13Din, a na yël bafetsul batëb, aja bukul: “Nda tsëpan di përaasa, niints na yuuntsi pëliiki mlik ka jëk ni ind. Nda fetsanul; 14tsi na niaj tsi, ndë ja ajug kato: ‘Najukan aja: Pëfër nji pi pëtsooŋ, tsi ndu n deena tsi Ufesta-pëbuer ni bafetsin, aci tsum?’ 15Në piban ind pëfër pëwiak di ruets kato, pan yecisa pi ngëko-ngëro; nda yecis ngëko ufesta rul pa n ja.” 16A bafets pën atsëp përaasa, a ba tsënk ngëko bëlieng bi Yeesu ja bi bukul; a ba yecis Ufesta-pëbuer.

17Uyër pëcaal, a Yeesu band ni untaaja bukun ni batëb. 18#Iya 41.10Bi ba tsoar bi bariala, a Yeesu ja bukul: “Mán leents ind ucär: Nalon tsi ind, nan cii tsi bariala ni nji, ka yain ufets.” 19A ba kur pëjuatsan, a uja nandooni në jaul: “Aci nji-a?” 20Yeesu yankës bukul aja: “Aci nalon tsi ind untaaja ni batëb, ni ka yuagi kañan ni nji di pëkanda. 21Abuk ñaan-najin ka tsëp, bi u ro bi picanaa tsi ulekaul. Maa cay ñaan ni kan ya ank Abuk ñaan-najin ufets! Aro pe pëmat ñaan namënts përoots bëka yaas.”

22Bi ba ci bi tsi bariala, a Yeesu jej pëpom, a na ja-gëwar a nu ba, a na cëtës pul a bafetsul, a na ja: “Nda yankan, ko wi aci uliaf nji.” 23A na jej karaani, a na baran a nu ba, a na bukul kul, a ba raan bëlieng tsi kul. 24#Pëp 24.8 Jer 31.31-34A na ja bukul: “Ko wi aci pëñaak nji, pëñaak karo-pëloole, pan tulaa pi pa bañaan bacumal. 25Mán leents ind ucär: In katse ka n daan pëwat mbuk bëbiiñu, te unu wi ndu n daan wi pul pëwalu, di pësien Nasien-batsi.” 26Bi ba ba bi pëya uya-ubëndan, a ba pën atsëp untunda Mëoliwa.

Yeesu acar aleents Per kë fatsul ufets

(Mat 26.31-35; Lúk 22.31-34; Joŋ 13.36-38)

27 # Sak 13.7 A Yeesu ja bukul: “Ndii yër bëlieng, par ko wi picana wun: ‘Mán kob nayafan, din ngënkanel ka garandar.’ 28#Mat 28.16Maa unatsee nji di pëcӓts, ka yër ind bërun pëtsëp Galileeya.” 29A Per jaul: “Ŋal bañaan ka yër bëlieng, maa di ka ci nji.” 30A Yeesu yankësul aja: “Mán leentsu ucär: Bërëm buntsari bi, uguk ka ruka ka aan ngëyaas ngëtëb, kë bërin aa ngëyaas ngëwaants.” 31Maa, Per mob tsi pëjaul: “Ŋal ank ka ka pëcӓts ni wi, nin in di ka n bëru.” A bafetsul bëlieng ja pëloole pan.

Yeesu di Getsësemani

(Mat 26.36-46; Lúk 22.39-46; Joŋ 18.1)

32Bi ba band bi tsëko tsi kanjaka tsi Getsësemani, a Yeesu ja bafetsul: “Nda wamaan nda tsoar tsi, mán tsëp buñaan.” 33A na tsëpand Per ni Joŋ ni Jakob; a na kur pëte unjuatsia, ni pëlënk pëwiak. 34A na ja bukul: “Uwaas nji ajuatsan mak, aa ndu n tsas pëcӓts. Nda rukaan tsi, nduu waay.” 35A na kikara bërun ko uties, na jintëla tsi utsia, a na ñaanar uci u yëla bëro, uwal umënts wi ka lawanul. 36Aja: “Aba, Paapa! M yëlan përo ngëko bëlieng; lawanin karaani kan ci kink ki unoor; tsë ci ko wi n ŋal wi, maa wi m ŋal wi.” 37A na witsee tsi bafetsul, na tsënk ba ci tsi bëŋooy; a na ja Per: “Simon, m ŋooy-a? M yëlaants koon pëwaay, nin uwal uloole-a? 38Nda waayan nduu ñaan, pa nda rits yër tsi mteen-teenana. Par uwejats ayecis, maa uyamats araf.” 39A na kaka kika, na ñaan akaka ja përim pëloole pëmënts pun. 40A na witsee, na kaka tsënk ba ci tsi bëŋooy, par këkës bukul aritsan, a bu meets përim pi bu kë yankul pi. 41A na witsee uyaas uwaajantsan, a na ja bukul: “Nda wama ka ŋooy a nduu naakësa! Aliing! Uwoora band wink, wi Abuk ñaan-najin kë gutsa wi tsi iñan bajuban. 42Nda natsaan! Nda ju ngë tsëp! Ni ka yaini ufets wokani ink.”

Yeesu amoba

(Mat 26.47-56; Lúk 22.47-53; Joŋ 18.2-12)

43A bi Yeesu wama bi ka ñakan, din a Judas, nan cii nalon tsi untaaja bukun ni batëb baandi; acii ni kandënd bañaan kawiak, a ba tsiji ngëlaac ni ngëndog. Bawiak-bajakan, ni bapican-ngëtsua, ni bawiak Bajudeu yëli bukun bukul. 44Ni ka yauli ufets ro leents bukul upibanaani, aja: “Ni ndu n wúnkëree, aciul; nda mobanul nda liincan, ndë tsëpandul.” 45Ubaandiul wun, din a na kika awok Yeesu, a na jaul: “Rabi!” A na wúnkëraul. 46Din, ba yërand Yeesu amob. 47Nalon tsi ban ci biki tsul, toti ulaac a na tib naleempar nan pei pëci nawiak-bajakan, afalul kabats. 48A Yeesu ja bukul: “Nda bi ni ngëlaac ni ngëndog, pii mobin pi uwayu-a? 49#Lúk 19.47; 21.37Man ci ni ind ngënu bëlieng di kato-kayëman, a ndu n jukan, a nda mobatsin. Maa ko wi arolaa, pa u ci bi u ro bi picanaa.” 50Din, a ba bërul bëlieng, ba túk atsëp. 51A u ulon upaas ro ka fetsi Yeesu, buleenj rin bi na kula bun. A bu kë mobul, 52na bërar bukul buleenj, na túk bëruent.

Yeesu di kato kawat-pëleents, kawiak

(Mat 26.57-68; Lúk 22.63-71; Joŋ 18.13-24)

53A ba tsëpand Yeesu di nan pei pëci nawiak-bajakan, ee júk rul bëlieng ni bawiak-bajakan, ni bawiak Bajudeu, ni bapican-ngëtsua. 54Per rukaul tsi ufets alawan, te di bulay nan pei pëci nawiak-bajakan. A na tsoar ni bawaay a na ci tsi pëtama tsi kawok bërua.

55A bawiak-bajakan, ni kato kawat-pëleents kawiak bëlieng, kë tsas përim pi ka lacan pi Yeesu na fiŋa; maa bë kaats. 56Par bacumal ajaarul ngan cits ngi ngëcar, maa irim bukul yërëlarats. 57A balon natsa pëjaarul ko un cits wi ucär, a ba ja: 58#Joŋ 2.19“Wund ate na ja: ‘Nji, mán gar kato-kayëman ki kañan ñaan-najin leemp kink; tsi ngënu ngëwaants ka niew kalon ki kañan ñaan-najin leempats ki.’” 59Ŋal bi u ci bank, ngëko ngi ba ja ngi yërëlarats.

60A nan pei pëci nawiak-bajakan natsa tsi pëncuaf bañaan, a na yepar Yeesu aja: “M kaats ko wi kë yankës wi, tsi ngëko ngi biki kë jaaru ngink-a?” 61Maa a Yeesu yëŋandar tsi na yëŋandar tsi, yankësats ko. A nan pei pëci nawiak-bajakan kaka yeparul aja: “Wi ci-un Mesia, Abuk Ka n jaara ngëwar-a?” 62#Dan 7.13A Yeesu jaul: “Nji n ciul un; te ndii win Abuk ñaan-najin tsoar di kariir Kanpe pëyëlan-ngëko bëlieng, në pafari tsi isa batsi pëbi.” 63Din, nan pei pëci nawiak-bajakan taw iŋiul yi bëtiem, a na ja: “Wee ngë fierar wun kak bamaatir? 64#Ija 24.16Ind te bakank bi na kar bi Nasien-batsi! We wi nda wejats wun?” A ba lacanul bëlieng pa na fiŋa, aka na roon në cӓts.

65A balon kur pëtújarul, ba kúndul këkës, ba kobul ngësuk, ba jaul: “Leentsan-e!” A bagaarir mobul awaŋul tsi imbakats.

Per apok meets Yeesu

(Mat 26.69-75; Lúk 22.54-62; Joŋ 18.15-18,25-27)

66A Per ro ci tsi utsia di bulay. A nalon tsi bampëli baleempar nan pei pëci nawiak-bajakan baandi; 67a na win Per kë tama, na teenul ajuŋaman a na jaul: “Wi buts, m do ci ni Yeesu Kanpënë-ni-nasaret.” 68Maa, a Per pokul, aja: “Nji n meets, a te nji n mobats ko wi m ja wi.” A na pën tsul atsëp uleka pëlëman pëwiak. A uguk aan.

69A nampëli naleemp namënts un winul a na kaka ja ban ci biki tsul: “Namëntsi aci nalon tsi bukul.” 70A Per kaka pok. Jonats, ban ci biki tsul ja Per: “Tsi ucär, m bof ni bukul; a te m ci ñaan Galileeya!” 71Maa, a na kur pëñaan ngënjuatsia nga roon ngë baandë-niul, a nuu baaja koo ja: “Nji n meets niints namëntsi, ni ndu ñakanaan ink ulekaul.” 72Uyëk umënts wun a uguk aan uyaas utëbantsan. Din a Per les përim pi Yeesu ro pi jaul: “Uguk ka ruka ka aan ngëyaas ngëtëb, kë pok m meetsin aa ngëyaas ngëwaants.” A Per yëlaants pëmiira, na ci tsi irug.

Currently Selected:

MARKU 14: KPKNT

Highlight

Copy