MARKU 15

Yeesu tsi bërun Pilaatus

(Mat 27.1-2,11-14; Lúk 23.1-5; Joŋ 18.28-38)

1Ujënts unu, a bawiak-bajakan, júk abaar pëloole ni bawiak Bajudeu, ni bapican-ngëtsua, ni kato kawat-pëleents kawiak bëlieng. A ba tan Yeesu, ba tsëpandul ee gutsar Pilaatus. 2A Pilaatus yeparul aja: “Wi ci-un nasien bajudeu-a?” A Yeesu yankësul aja: “Wi ja ank.”

3Din, a bawiak-bajakan kë tumtsarul ngëcumal. 4A Pilaatus kaka yeparul, ajaul: “M kaats ko wi kë yankës wi-a? Teenan-e ngi bu kë jaaru ngank bëlieng!” 5Maa Yeesu yankësats kak ko, a Pilaatus pikra mak.

Yeesu alacana pa pëfiŋa

(Mat 27.15-26; Lúk 23.13-25; Joŋ 18.39—19.19)

6A Pilaatus ro Uwakëtsa pëja tsi kara ufesta, në wëtandar bukul narica naloole, ni bañaan yepi. 7Maa, a u ka nalon ni ka n jakee Barabas; arica ni ba natsa biki agusëlan ucaak a ba fiŋ ñaan, tsi uwal umënts wun. 8A kandënd bañaan tsëp ee kur pëyep Pilaatus na roor bukul ko wi na ro wi Uwakëtsa përo. 9A Pilaatus yankës bukul aja: “Nda ŋal nji pëwëtandar ind nasien bajudeu-a?” 10Par Pilaatus ame u ci-undo bi ba koc bi Yeesu, ka wun bawiak-bajakan gutsarul nul. 11Maa a bawiak-bajakan sualan kandënd bañaan ba yep Pilaatus na wëtandari bukul Barabas. 12A Pilaatus kaka yepar bukul, aja: “We wi ndu ndo wun ni ndu ru ink nasien Bajudeu?” 13A ba lië kak aja: “Rieŋanul di kruus!” 14Maa Pilaatus ja bukul: “We wi na ro wun u waraatsa wi?” A ba ru pe këpe pëlië koo ja: “Rieŋanul di kruus!”

15A Pilaatus ŋal pëtsu kandënd bañaan ba lílan, a na wëtandari bukul Barabas; a na tsu Yeesu a na tucana a uu ba, na gutsar bukul nul, pa na rieŋa di kruus.

Basondaari ci tsi përiat Yeesu

(Mat 27.27-31; Joŋ 19.2-3)

16A basondaari tsëpand Yeesu di bametsu kato-pësien. A ba rui kampañ basondaari bëlieng a ba júk. 17A ba tiemanul kaŋí kajankal caw, a ba sier ucape-pësien wi iyu, a ba tsuul tsi been. 18A uu ba, ba kur përiatul koo ja: “Man leenu, nasien Bajudeu!” 19A bu kë kobënul pëko pëjaam tsi been, a ba tújarul, ba jintëla a bu kë rëmbanul. 20Bi ba ba bi përiatul, ba tiemësul kaŋí kajankal kun, a ba tiemanul iŋiul, ba cil andul pa pii rieŋul di kruus.

Yeesu arieŋa di kruus

(Mat 27.32-44; Lúk 23.26-43; Joŋ 19.17-27)

21 # Roo 16.13 Aka nalon ni ka n jakee Simon, apënë-ni Sireeni, aci asin Aleksandër ni Rufus. Bi na pëni bi di bëreeŋ a nu par, ba forsaarul na lap kruus Yeesu. 22A ba tsëpand Yeesu di tsëko tsa n jaka tsi Golgota; uci pa colësiaara, aci Tsëko Kankunkaloŋ. 23Ba ul pëwat pan gëbëlëna pi ni #15.23 Bëmiira: Aci bunin bëlon bëko ban tsij bi pëñal pëlilal. Bajudeu ja ba roon bu kë bamanaan bul puum.bëmiira, maa yankats pul. 24#Iya 22.19Din, a ba rieŋul di kruus. Bi ba júgats bi kako tsi ba ci tsi, pa pëme ko wi kara ñaan kë jej wi, a ba faar iŋiul yi bëtiem.

25Bi Yeesu kë rieŋa bi di kruus, a u ci umai unu ni ulon ngi bëfa. 26A bëpic ban piban bi ko un ka wi na lacana tsua tsi ruetsul, aja: “NASIËN-BAJÚDEU.” 27#Isa 53.12Bë rieŋul di kruus ni ngëwayu ngëtëb, nalon tsi kariirul, a nacints tsi kamayul. 28A u rolaa bi Bëpicando bi ja: “Abofana tsi baro-ngëko-kawaraatsa.” 29#Iya 22.8; 109.25 Mar 14.58; Joŋ 2.19A biki kan par biki kë karul, a bu kë siints iyeen koo ja: “Yoo! Wi ni kan gari kato-kayëman, kë kakan kul ka niew tsi ngënu ngëwaants; 30welee-e di kruus kë bueran beenu!”

31Unk buts, a bawiak-bajakan, ni bapican-ngëtsua kë riatul tsi ba ci tsi, koo ja: “Abueran balon, a yilaants pëbueran beenul! 32Mesia, Nasien Israel, na welee-e inkri di kruus, pa n ja pëwin, nja ka Uwak!” A ban dieŋa biki buts ni nul di kruus, kë karul.

Pëcӓts Yeesu

(Mat 27.45-56; Lúk 23.44-49; Joŋ 19.28-30)

33Uson unu, a karëm jëk utsia bëlieng, te mfuts unu. 34#Iya 22.2Tsi ngëleer ngëwaants, a Yeesu kat përim alie, aja: “Eli, Eli, lema sabaktani?” Uci pa colësiaara aci: “Nasien-batsi nji, Nasien-batsi nji, we ka wun a m bërin?” 35A balon tsi ban ci biki tsul te ko wan, a ba ja: “Aci tsi përu Eliyas.” 36#Iya 69.22A nalon tsi bukul túk ee jej kapoons, atsu tsi bujul pëjaam, a na yuag kul di buneegar, na bandan kul Yeesu na raan, na ja: “Nda wëtan, nja ka teen ne Eliyas ka bi ank në welaniul!” 37Maa Yeesu kat përim alië uyaas ucints, a na juab.

38 # Pëp 26.31-33 A uridu kato-kayëman tawee di ruets te di utsia aro itawar itëb. 39A kapëton basondaari, nul na natsi tsi bërun Yeesu, win bi na juab bi, a na ja: “Tsi ucär, ñaan ni aro ci Abuk Nasien-batsi!”

40 # Lúk 8.2,3 A u ka buts balon bakaats, ban nats biki alawan, a bu kë teeni. Tsi bukul, aci Maaria kanpënë-ni Magëdala, ni Maaria anin Jakob mties ni Jose, a u ci Salome, 41bukul bando biki ka fetsul, a bu kë këmandul bi na ro bi ci di Galileeya. A balon bakaats bacumal tsëp ni nul pa Jerusalem.

Pëmooy Yeesu

(Mat 27.57-61; Lúk 23.50-56; Joŋ 19.38-42)

42Uyër pëcaal, bi u ci bi unu pëyecis, un ci wi wi kan par wi rin, ufaantsan Unu-pënaakësa ka baandi, 43a Juse kanpënë-ni Arimateeya baandi; nul aci ñaan kato kawat-pëleents kawiak na rëmbanee, a na ro ka lip buts pësien Nasien-batsi. Ayeents, a na tsëp di Pilaatus ee yepul puum Yeesu. 44Maa, Pilaatus pikra undo bi Yeesu cӓts bi ba; a na rui kapëton basondaari ee yeparul ne ajon ki na cӓts ki. 45Bi kapëton basondaari leentsul bi u ci unk, a na niiran Juse na jej puum. 46Bi na weeli bi kaleenj, a na welani puum, na fay pul ni kaleenj, na mooy pul di baar ban jëpa bi tsi bulaak; a na kël pëlaak ee sëts tsi mtum pëbuk. 47A Maaria kanpënë-ni Magëdala, ni Maaria anin Jose, win tsi na mooya tsi.

Currently Selected:

MARKU 15: KPKNT

Highlight

Copy