MARKU 13

Yeesu añakan uleka ugarara Kato-kayëman

(Mat 24.1-2; Lúk 21.5-6)

1Bi Yeesu pën bi di kato-kayëman, a nalon tsi bafetsul jaul: “Najukan! Teenan-e ilaak yi bi i rëmb bi, ni ito mtaa yi bi i wara bi!” 2A Yeesu jaul: “M win ito mtaa iwiak yi-a? Nin pëlaak di kee wam tsi ruets pëcints pul tsi, pan dits pi kee garaa.”

Unoor, ni pënoor-noorana

(Mat 24.3-14; Lúk 21.7-19)

3Bi Yeesu tsoar bi di ruets untunda Mëoliwa, u mabular wi ni kato-kayëman, Per ni Jakob ni Joŋ ni Andëre patsandul a ba yeparul aja: 4“Leents wund-e, ngëko ngan ka ci lum-i? A uwom upibanaani kee piban wun ngëko ngan kii ci bëlieng?”

5Din, a Yeesu kur pëja bukul: “Nda rukan ibats, pa ñaan tsë fal ind. 6Par bacumal ka biini tsi katim nji, bu kë ja: ‘Aci nji.’ Bu ka fal bañaan bacumal. 7Maa, uwal wi ndu te wi ukam kë kamaa, a bañaan kë ñakan ngi kan par ngi tsi ukam, ind tsë lënk; ngëko ngëmënts ngan aka pëci, maa netse ci utuami. 8Par ucaak ka natsara pëkaman ucaak ucints, pësien ka natsara pëkaman pësien pëcints. Utsia koo siintsar tsi ngëleka ngëcumal, ubon kuu ci buts. Ngëmënts ngan aci ujuundi urear uliaf-kabuk.

9 # Mat 10.17-20; Lúk 12.11,12 Nda rukan ibats, par bu ka gutsar ind ito kawat-pëleents, a di ito-ijúki, bu ka tucan ind. Tsi undo nji, nduu tsëpanda tsi bërun ba tsijëna-këboos, ni tsi bërun basien; unk, ndë piban bukul nda ci ba maatir biki ngan dola ngi. 10Maa, Upetsan-uwar aka bërun pëleentsa bañaan ban cits biki Bajudeu bëlieng. 11Uci ba tsëpand ind ee gutsar bukul, ind tsë wejats ko wi nda ka wi pëja. Maa, ko wi nda a wi pëja tsi uwal umënts wun, nda jaan; par cits ind ka ñakan bukun, maa Uwejats-ujënts. 12Ñaan ka mob ni ba tsaari, në gutsarul na fiŋa; niints-nambukari ka mob napätsul në gutsarul na fiŋa; upäts ka natsara ban buk biki bukul, bu ka tsu bukul ba fiŋa. 13#Mat 10.22Bañaan bëlieng, bu ka bër ind undo katim nji; maa nan tambandari te tsi utuami, në buerana.

Unoor uwiak

(Mat 24.15-28; Lúk 21.20-24)

14 # Dan 9.27; 11.31; 12.11 Uwin ind uñutsanuel ucok-ko ci tsi tsëko tsi u kaats tsi pëci, nalayir na rukan ibats! Din, ban ci biki di Judeeya, ba tukari ngëntunda. 15#Lúk 17.31A nan ci di pëfër di ruets kato, nul tsë welee, te nul tsë niaj katoul pëjej ko. 16A nan ci di bëreeŋ, nul tsë kak ufets pëwitsara kaŋiul ki bëtiem. 17Cay bakaats ban seempa biki, ni biki kan buatan biki, tsi ngënu ngëmënts ngan! 18Nda ñaandëri umënts wan përits ci tsi uwal ujoonts. 19#Dan 12.1; Upi 7.14Par tsi ngënu ngëmënts ngan, unoor ka ci; te pënak pëntsa, unoor u liing wi pi netse ro ci, ki ujuundi umundu wi Nasien-batsi leemp wi, te di kee u ci kak yaas. 20Uci Ajug roots rukës ngënu ngëmënts ngan, nin ñaan di ka buer. Maa, undo bañaan ban data biki, ngënu ngëmënts ngan kee nga rukësa. 21Din, a uci ñaa n ja ind: ‘Këristu, nuu ni tsi!’ Oo: ‘Këristu, nul nun dun!’ Ind tsë Uwak. 22Par barata batsup, ni bayëlia batsup, bu ka natsa, bu kë ro ngëpibanaani, ni ngëko ngan pikran ngi, pa puu falëna bañaan, te ŋal ban data biki, uci u yëla bëro. 23Nda rukan ibats, man car aleents ind ngul bëlieng.

Ubi Yeesu, Abuk ñaan-najin

(Mat 24.29-31; Lúk 21.25-28)

24 # Isa 13.10; Joe 2.10; 3.4; 4.15; Upi 6.12 Isa 13.10; Ese 32.7 Maa tsi ngënu ngëmënts ngan, upar unoor umënts wun, unu ka witsa u rëmënts, pëli di ka ufac pul, 25#Isa 34.4; Upi 6.13 Joe 2.10ngëpesaj ka pëni di batsi nga yëri, myëlan man ci mi di batsi ka siints-siintsana. 26#Dan 7.13; Upi 1.7Din, bañaan ka win Abuk ñaan-najin, bi nu bi bi tsi isa, ni pëyëlan pëwiak, ni përëmb. 27Din, në yël ngëwaanju, ngë jukëlën bayiicul ban data biki tsi ngëbuuru ngëbaakër ngun ngi umundu, pëpën tsi untsañi utsia te di untsañi batsi.

Përim pan tiba pi anaamanaana bufíigu

(Mat 24.33-35; Lúk 21.29-33)

28Nda jukan përim pan tiba pink anaamanaana bufíigu. Aja uwal wi ina bul witsa wi ayoj, ito ka kur pëjabani, ndë me uwal uyëki wokani. 29Unk ind buts, uwal wi nda win wi ngëmënts ngan baandi, nda mean na ruka wokani, acii tsi ilëman. 30Mán leents ind ucär: Bañaan ntsari biki, bu ri ka cӓts ba ba, te ngëmënts ngan bëlieng baandatsi. 31Batsi ni utsia ka par, maa irim nji di ka par yaas.

Ñaan meets nin unu, nin uwal

(Mat 24.36-44; Lúk 21.34-36)

32 # Mat 24.36 Maa, tsi uleka unu umënts oo uwal umënts, ñaan meets; nin ngëwaanju di batsi, nin Abuk, aci koon Asin.

33Nda rukan ibats, nduu waay, nduu ñaan, par nda meets uwal wi uu ci wi.

34 # Lúk 12.36-38 Aci pi ñaan ni kan tsëpi bëyaas: Aruk katoul, a na tsu baleempul ko wi ba ka wi përo, kara ñaan ni uleempul; a na tsu nawaay-pëlëman na waay. 35Bi u ci bank, nda moban tsi kawaay, par nda meets uwal wi ajug kato kë baandi wi; u ci ank bëtakala, oo myëŋ ucaak, oo uwaan uguk, oo bëfa búŋ bi nu baandi bun; 36pëlënk pëjaa, upúutsiul wun pëbaandi, në tsënki nda ci tsi bëŋooy. 37Ko wnja ind wi, ma nja pa bañaan bëlieng: ‘Nda waayan!’”

Currently Selected:

MARKU 13: KPKNT

Highlight

Copy