JOŊ 20

Yeesu anatsee di pëcäts

(Mat 28.1-10; Mar 16.1-8; Lúk 24.1-12)

1tsi unu ucäk kanëm, tsi ufa-unu, tsëko wama rëmënts, a Maaria kanpënë-ni Magëdala tsëp di pëbuk, a na win pëlaak pënana tsi pëbuk. 2Din, a na túk atsëp di Simon Per, ni nafets ni Yeesu ŋal unk, a na ja bukul: “Ajug apënanaa di pëbuk, wund meets tsi na tsua tsi!” 3A Per pën ni nafets nacints nun, a ba tsëp di pëbuk. 4A ba túk bëlieng bukul batëb, maa nafets nacints nun pe Per pëcar, a na bandul bërun di pëbëk. 5A na ŋëp, a na win ileenj tsi i júkana tsi, maa niajats. 6A Simon Per runaniul, a na baandi ee niaj di pëbëk, a na win buts ileenj tsi i júkana tsi. 7Pëfaal pando pi tsua tsi been Yeesu, cits tsi ileenj, maa abuatsa apatsana tsi kalon kaleka. 8Din, a nafets nacints nun, nan cakës unk pëband pëbëk, niaj buts, a na win, a na wak. 9Par, bë netse ro me ko wi Bëpican pac wi, bul ban piban bi Yeesu ka na roon në natsee tsi bacäts. 10A bafets bamënts bukun pën atsíis.

Yeesu apibandar tsi Maaria kanpënë-ni Magëdala

(Mat 28.9-10; Mar 16.9-11)

11A Maaria nats di utsand tsi kawok pëbëk, a nuu rug. Bi na ci bi tsi irug, a na ŋëpar uleka bametsu pëbëk, 12a na win ngëwaanju ngëtëb nga tiema ngi iŋi ifaacal, a nga tsoar tsi tsëko tsi puum Yeesu ro tsi tsuaa; ulon atsoar tsi ubuuru been, a ucints tsoar tsi ubuuru itsiim. 13A nga ja Maaria: “Ŋaats, wee kë rug wun?” A na yank ngul aja: “Bë tsëpand Ajug nji, a nji n meets tsi ba tsuul tsi.” 14Bi na ba bi pëja ko wan, a na witsësëra ufets, na win Yeesu nats, maa meets ne aci Yeesu. 15A Yeesu jaul: “Ŋaats, wee kë rug wun? Yën ni kë tsas un?” A na ja ne aci nawaay uwoorta, a na jaul: “Ajug, uci wi jejul un, leentsin tsi m tsuul tsi, ka jejiul.” 16A Yeesu jaul: “Maaria!” A Maaria witsësa ajaul tsi ulíingu uyebëreu: “Rabëni!” Un ci wi, Najukan. 17A Yeesu jaul: “tsë kërarain, par nji n netse n paya di Asin nji. Maa tsëpan di ban tsaar biki ni nji, kë ja bukul, mán paya di Asin nji, nul Asin ind, di Nasien-batsi nji, nul Nasien-batsi ind.” 18Din, a Maaria kanpënë-ni Magëdala tsëp ee leents bafets na win Ajug, a Ajug jaul ngëmënts ngan.

Yeesu apibandar tsi bafetsul untaaja

(Mat 28.16-20; Mar 16.14-18; Lúk 24.36-49)

19tsi uyër pëcaal unu umënts wun, un ci wi unu ucäk kanëm, a ilëman tsëko tsi bafets ci tsi nigana, undo bë lal Bajudeu. A Yeesu baandi ee nats tsi pëncuaf bukul, a na ja bukul: “Pëfac pa ciin ni ind!” 20Bi na ja bi ko wan, a na piban bukul iñanul, ni katiañul. A bafets lílan, undo bu win Ajug. 21A Yeesu kaka ja bukul: “Pëfac pa ciin ni ind! Bi Asin nji yëliin bink, unk buts di n du n yël ind run.” 22Bi na ba bi pëja ko wan, a na futsar bukul, na ja bukul: “Nda yankan Uwejats-ujënts. 23#Mat 16.19; 18.18Biki nda jampësa biki ngëjuban, bu ka jampësaa; a biki nda jampësaats biki, bë ri ka jampësaa.”

Kakaats-uwak Tomaas

24A Tomaas, nul nan ci nalon tsi untaaja bukun ni batëb, a nuu jaka #20.24 Diidimus: Aci përim tsi ugërek, a ko wi pa pac wi ci, NatantëmbDiidimus, roots ci ni bukul uwal wi Yeesu bi wi tsi bukul. 25A bafets bacints buku n jaul: “Wund awin Ajug!” Maa a Tomaas ja bukul: “Uci n winats ba ngëlu iregu tsi iñanul, a n tsuuts pëkuanj tsul, a n tsuuts kañan tsi katiañul, in di ka n fiaar yaas.”

26A u par ngënu këwas, a bafetsul kaka ci di bametsu, a Tomaas ci ni bukul. Ŋal bi ilëman nigana bi, a Yeesu baandi ee nats tsi pëncuaf bukul, a na ja: “Pëfac pa ciin ni ind!” 27Din a na ja Tomaas: “Baandani pëkuanju tsi, kë teen iñan nji; baandani kañanu kë tsu tsi katiañ nji. cäts ci narika-wak, maa ciin nawak.” 28A Tomaas yankul, aja: “Ajug nji, Nasien-batsi nji!” 29A Yeesu jaul: “Tomaas! Undo m winin, a m wak-a? Bu naak, ba winats biki a ba uwak.”

30Yeesu aroond ngëlon ngëpibanaani ngëcumal tsi bërun bafetsul, ngan picanaatsa ngi tsi ulibëru wi. 31Maa, ngëko ngi apicanaa, pa ind pëfiaar u ci Yeesu ci-un Mesia, Abuk Nasien-batsi, pa uwal wi nda ci wi tsi pëwak, ndë ka ubiira tsi katimul.

Currently Selected:

JOŊ 20: KPKNT

Highlight

Copy