JOŊ 19

1Din, a Pilaatus yank Yeesu a na tsuul na lumbajaa. 2A basondaari sier ucape-pësien, wi iyu, a ba paful wul tsi been, a ba tiemanul kapantu kajankal caw. 3A bu kë bi tsi nul, a bu kë jaul: “Man leenu, nasien Bajudeu!” Bu kë waŋul iñan tsi imbakats.

4A Pilaatus kaka cili utsand, a na ja bukul: “Nda teenan-e, man pënandar ind nul utsand, pa ind pëme ne, nji n winats nin ulaci tsi nul.” 5Din, Yeesu pëni utsand, awúree ucape-pësien un sierëna wunk iyu, ni kapantu kajankal caw. A Pilaatus ja bukul: “Ñaan namënts, nuu ni!” 6Bi bawiak-bajakan ni baleemp win bi Yeesu, a ba lië aja: “Rieŋanul di kruus! Rieŋanul di kruus!” A Pilaatus ja bukul: “Nda tsëpandiul, ind bërier ind, ndii rieŋul! Par nji n winats nin ulaci tsi nul.” 7A Bajudeu yankul aja: “Wund aka ulua; pa përo bi ulua ja bi, nul aka pëcäts, par atsu beenul aci Abuk Nasien-batsi.” 8Bi Pilaatus te bi përim pan, a na ru pe këpe pëlënk. 9A na kaka niaj di kato-pësien, a na yepar Yeesu aja: “M pënë-ni tsum?” Maa Yeesu yankatsul. 10Din, a Pilaatus jaul: “M di kë ñakanaanin-a? Meets n ka pëyëlan pa pëwëtanu, a n ka pëyëlan pa përieŋu di kruus-a?” 11A Yeesu yankul aja: “M bitse kë ka nin pëlon pëyëlan tsi nji, uci pa roots pënë-ni ruets awëlau; wul ka wun, nan gutsini tsi iñanu, aro ujuban uwiak.” 12Pëkur tsi uler umënts wun, a Pilaatus kë tsas bi nu wëtanul bi. Maa, Bajudeu kë lië koo ja: “Uci m wëtan namëntsi, m cits bëfetsar Seesar! Par ñaan nan tsui ba këtsu beenul aci nasien, anatsara pëkaman Seesar.” 13Bi Pilaatus te bi irim yan, a na pënand Yeesu utsand, a na tsoar tsi pëtsoari kawat-pëleents, tsi tsëko tsi ka n jaka tsi #19.13 Litoostërotu, oo Gabata: Aci përim tsi Uyebëreu, ko wi pa pac aci, “tsëko-ilaak.”Litoostërotu; a tsuu jaka Gabata, tsi pëleents Bayebëreu. 14A u ro ci-unu pëpaariir Ufesta-pëbuër, uwokan uson-unu. A Pilaatus ja bajudeu: “Nasien ind, nuu ni!” 15Maa, ba lië bëlieng aja: “Fiŋan! Fiŋan! Rieŋanul di kruus!” A Pilaatus ja bukul: “Man ka n doon ka rieŋ nasien ind di kruus-a?” A bawiak-bajakan yankul aja: “Wund kaats nalon nasien, ucits ba Seesar.” 16Din a Pilaatus gutsar bukul nul na rieŋa di kruus. A ba yank Yeesu a tsijëna.

Yeesu arieŋa di kruus

(Mat 27.31-56; Mar 15.21-41; Lúk 23.26-49)

17A Yeesu lap kruus bërierul, a na pënar tsëko tsi ka n jaka tsi kankunkaloŋ, a tsuu jaka Golgota tsi pëleents Bayebëreu. 18tsul, a ba rieŋul di kruus, nul ni balon batëb; ni tsi kajara ki, nun tsi kajara kun, a Yeesu ci tsi pëncuaf. 19A Pilaatus pican përim atsu di ruets kruus; iink di pa ci run: “YEESU KANPËNËNI-NASARET, NASIËN BAJÚDEU.” 20Bajudeu bacumal alayir përim pëmënts pun, par tsëko tsi Yeesu rieŋëna tsi awokan përaasa; a përim pëmënts picaa tsi Uyebëreu, ni tsi ulatin, ni tsi ugërek. 21A bawiak-bajakan tsi Bajudeu ja Pilaatus: “cäts pic ja: ‘Nasien Bajudeu,’ maa pica n ja: Namëntsi aja: ‘Nji n ci-un nasien Bajudeu.’” 22A Pilaatus yank aja: “Man pican ko wi n pican wi.”

23Bi basondaari ba bi përieŋ Yeesu di kruus, a ba jej iŋiul i bëtiem ataw aro ita‎‎wësar ibaakër; a ba faar, a uja kara nasondaari në ka katawësar. A ba jej buts kapantuul, kul kaats ulët; aci kaleenj kaloole di ruëts te utsia. 24#Iya 22.19A ba jaalar tsi ba ci tsi: “Nja tsë taw kul, maa ngë júgatsar kul, nja ka teen ni kan dukandee kul.” Arola ank, pa pëbandan ko wi Bëpica n ja wi: “Bu faar iŋi nji i bëtiem, a ba júgatsar kapantu nji.” Unk di basondaari ro run. 25tsi kawok kruus Yeesu, a anin Yeesu ro nats tsul, nul ni nan tsaari ni nul, Maaria, aar Këlopas, ni Maaria kanpënë-ni Magëdala. 26A Yeesu win aninul nats tsul, ni nafets ni na ŋal unk, a na ja: “Ŋaats, abuku nuu ni.” 27A na ja nafets: “Aninu nuu ni.” Pëkur tsi uler umënts wun, a nafetsul namënts un welan anin Yeesu di katoul.

Pëcäts Yeesu

(Mat 27.45-56; Mar 15.33-41; Lúk 23.44-49)

28 # Iya 69.22; 22.16 A uu ba, a Yeesu win ngëko bëlieng ba përolaa; pa pëbandan ko wi Bëpica n ja wi, a na ja: “Ulof përaan a tsijin.” 29A pëliiki pëlon do ci tsul pan cum pi bëneegar. A ba jej kapoons ayuag di bëneegar, a ba buats kul tsi pëko, atsënkanul kul tsi mtum. 30Bi Yeesu mel bi bëneegar, a na ja: “Ngëko bëlieng aba përolaa.” A na ŋëpan been, a na juab.

31Aci-unu pëyecis Unu-pënaakësa. Bajudeu ŋalats muum pëwëta unk di kruus tsi Unu-pënaakësa. Par, Unu-pënaakësa umënts wun aci-unu uwiak. Din, a ba tsëp ee buara Pilaatus pa ba cët imboj, muum ka pënana di kruus. 32A basondaari tsëp ee cët nacak nun imboj, ni nacints, bukul ban dieŋa bukunk ni Yeesu. 33Maa, bi ba band bi tsi Yeesu, a ba win na cäts ba, a bu cëtatsul imboj. 34Maa, nalon tsi basondaari luŋanul katiañ ni kañaku, din a pëñaak pëni ni mlik. 35Na winuli, aleents ko un par wi; a ko wi na leents wi, aci ucär. Nul ame ko wi na ja wi ci ucär, pa ind pëwak buts. 36#Pëp 12.46; Ngëp 9.12; Iya 34.21Ko wan arolaa, pa pëbandan përim pi Bëpica n ja pink: “Nin kaloole tsi imuaul di ka cëta.” 37#Sak 12.10; Upi 1.7A Bëpican kaka ja: “Bu kee maban këkës tsi ni ba lúŋan unk.”

Pëmooy Yeesu

(Mat 27.57-66; Mar 15.42-47; Lúk 23.50-56)

38Upar ko wan, a Juse kanpënë-ni Arimateeya buara Pilaatus na niiranul pëpënani puum Yeesu; nul aro ci nafets Yeesu, maa ñaan meets. A Pilaatus niiranul. Din, a Juse kanpënë-ni Arimateeya tsëp ee pënani puum Yeesu.

39 # Joŋ 3.1,2 A Nikodemus, nul nan do unk ya ee winar ni Yeesu bërëm, bi buts, na tsiji ko un duakan wi ngënkilu ngëntaaja ngëwaants ni ngënkilu kañan, ngi ulícar miira, un gëbëlana wi ni ulícar “#19.39 Aloes: Aci bëlon bëko bi ka leempa bi ulícar, a buu cuunkan mmaak mcumal.aloes.” 40A ba jej puum Yeesu abuats ni ileenj, ba tsuund uucuraay. Bu ro bi Bajudeu wakëtsa bi përo, uyecis bukul pëmooy. 41A u ro ka uwoorta un ci wi tsi tsëko tsi Yeesu rieŋëna tsi di kruus, a pëbuk pëwalu ro ci di uwoorta umënts wun, a ñaan netse mooya di pul. 42tsul tsi ba mooy tsun Yeesu, undo bi Bajudeu ci bi tsi pëyecis pa Unu-pënaakësa, ni undo bi pëbuk pëmënts pun woki bi tsul.

Currently Selected:

JOŊ 19: KPKNT

Highlight

Copy