JOŊ 21

Yeesu apibandar tsi kawok bërëk

1Bi ngëko ngan par bi, a Yeesu kaka pibandar tsi bafets, tsi kawok bërëk Tiberiadi. Iink di na pibandar run: 2Bë júk tsëloole, aci Simon Per, ni Tomaas, ni ka n jakee Diidimus, ni Natanael kanpënë-ni Kana di pëboos Galileeya, ni babuk Sebede, ni balon batëb tsi bafetsul. 3#Lúk 5.5A Simon Per ja bukul: “Mán tsëp babuëts.” A ba jaul: “Wund ka tsëp buts ni wi.” A ba pën ee gija kanawa. tsi bërëm bëmënts bun, bë mobats ko. 4Ujënts unu, a Yeesu nats tsul tsi kambaŋ bërëk. Maa bafets roots me ne aciul. 5A Yeesu ja bukul: “Upats! Cits nda kaats utsëb-a?” A ba yankul aja: “Nin a.” 6#Lúk 5.6Din, a na ja bukul: “Nda gutsari pëtseenk kajara kariir kanawa, ndë ka.” A ba guts pëtseenk, maa bë yëlaants pëtoti pul, par acum ngëtsëb mak. 7A nafets ni Yeesu ŋal unk ja Per: “Aci Ajug!” Bi Simon Per te bi u jaka aci Ajug, na tiema iŋiul, par aro tiemësar; a na cat ayër di bërëk. 8Maa, bafets bacints bukun bi ni kanawa katies, bu kë púuli pëtseenk ni ngëtsëb, par bë roots lawan kankay, aci ko pi ngëmetar useent. 9Bi bu kë katee bi kankay, a ba win tsul ijuas bërua, a ngëtsëb pafa tsi ruëts yul, ni upom. 10A Yeesu ja bukul: “Nda tsiji-e ngëlon tsi ngëtsëb ngi nda ru ba ink pëmob!” 11A Simon Per gija kanawa, a na puular pëtseenk kankay, pul pan cum pi ngëtsëb ngëwiak; aci ngëtsëb useent ni ngëntaaja kañan ni ngëtsëb ngëwaants. Maa ŋal bi ngëtsëb liing bank, pëtseenk tawaatsa. 12A Yeesu ja bukul: “Nda bili ndë re.” Nin naloole tsi bafets yeentsats pëyeparul na ja: “Wi m ci yën-i?” Par bë me u ci Ajug. 13A Yeesu bi, na jej upom, na wël bukul; a na ro unk buts ni ngëtsëb. 14A umënts wi ci uyaas uwaajantsan, wi Yeesu pibandar wi tsi bafets, bi na natsee bi di pëcäts.

Yeesu añakanaan Per

15Bi ba ba bi bariala, a Yeesu yepar Simon Per aja: “Simon, abuk Joŋ, m pe biki pëŋalin-a?” A na yankul, aja: “Eey-e Ajug, m me n ŋalu.” A Yeesu jaul: “Këmandi ngëbuk ngënkanel nji.” 16A na kaka yeparul uyaas utëbantsan, aja: “Simon, abuk Joŋ, m ŋalin-a?” A Per yankul, aja: “Eey-e Ajug, me ŋalu.” A Yeesu jaul: “Yafani ngënkanel nji.” 17A Yeesu kaka yeparul uyaas uwaajantsan, aja: “Simon, abuk Joŋ, m ŋalin-a?” A Per juatsan bi na jaul bi uyaas uwaajantsan: “M ŋalin-a?” A na yankul aja: “Ajug, wi m me ngëko bëlieng; m me n ŋalu.” A Yeesu jaul: “Këmandi ngënkanel nji. 18Mán leentsu ucär: Bi m do bi ci upaas, m do ja m doon kë tiemandar bërieru, kë tsëp tsi m ŋal tsi; maa utsafu, kë ja m colan iñan, nalon ka tiemanu, në tsëpandu tsi m ŋalats tsi.” 19Yeesu aja ko wan, pa pëpibanaan pëcäts pi Per kii rëmbanaan pi Nasien-batsi. Bi na ba bi pëja ank, a na jaul: “Fetsin.”

20 # Joŋ 13.25 Din a Per kë witsësa, a na win nafets ni Yeesu ŋal unk ci tsi pëfetsiul; nul ci-un nan do unk ragara tsi bëjínc Yeesu bi ba ci bi tsi kare ufëri a na jaul: “Ajug! Yën ci-un ni ka yaui ufets i?” 21Bi Per winul bi, a na ja Yeesu: “Ajug! A niintsi, we ka baandë-niul wun-i?” 22A Yeesu yankul aja: “Uci n ŋal na ci te ubi nji, wee m ka wun tsul? Wi, fetsin.” 23A ko wan ñakanaana tsi ban tsaar biki tsi Këristu, ajaka, nafets namënts un di ka cäts. Maa, Yeesu jaats, nafets namënts un di ka cäts; maa aja: “Uci n ŋal na ci te ubi nji, wee m ka wun tsul?”

24Nafets namëntsi, ci-un ni ka leents ink uleka ngëko ngi, a nul pican un ngul. A wund me, ko wi na leents wi aci ucär. 25Aka buts ngëlon ngëcumal ngi Yeesu ro ngi. Uci nga ro picana bëlieng uloole uloole, man fiaar, ngëlíbëru ngi kan picana ngi, di ka yëla ŋal umundu upëban.

Currently Selected:

JOŊ 21: KPKNT

Highlight

Copy