NGËRO 12
12
Pënoor-noorana kak
1A tsi uwal umënts wun, Eroodis, nasien kur pëmob balon bañaan Ngëriisia koo noor-nooran. 2Na tsu Jakob, nan tsaari ni Joŋ, na fiŋënaa ulaac. 3A na win ko umënts líl Bajudeu, na kaka wejats pëmob buts Per; aro ci-unu kare-upom un tsijats wi bëko-bëlëntëntsaani. 4#Pëp 12.1-27Bi na mobul bi agutsar ukalabus, ba tsu itawar ibaakër yi bawaayul, kara ngërúp a tsij basondaari babaakër; aro ŋal pii pibanul tsi bërun bañaan, upar ngënu Ufesta-pëbuër. 5Unk a Per ríca di ukalabus, maa, bañaan Ngëriisia wëtanats pëtambandar pëñaan Nasien-batsi pa nul.
Per apënanee di ukalabus
6Bi Eroodis kë yecis bi pii biindiul tsi bërun bañaan, tsi bërëm bëmënts bun, Per tanaa ni këkorenti këtëb a nuu ŋooy tsi pëncuaf basondaari batëb, a bawaay ci tsi pëlëman, bu kë waay ukalabus. 7Maa, ulon uwaanju Ajug baandi, a ufac fiets di ukalabus; a uwaanju kërara Per tsi kabuuru a wambël, u jaul: “Natsaan ucar!” Din, a mkorante pën tsi iñanul ayër. 8A uwaanju jaul: “Tanan katël, kë tsu iraala.” A na ro unk. A u jaul kak: “Waan kapantu, kë fetsin.” 9Din na pën afets wul, meets ne ko wi uwaanju tsuul wi përo aci ucär; maa, na ja ne aci bëlon bëwinal. 10Bi ba par bi nawaay nacak, ni natëbantsan, a ba band di pëlëman ifeeru, pan cil pi përaasa, a pa waantsar bërier pul. Ba pën, ba yandaar a bu kë ba urawa, uyëk umënts a uwaanju patsësaul.
11Din, a uwejats Per witsee tsi nul, a na ja: “Inkri man me, tsi ucär, Ajug yëli un uwaanjuul, a u buëranin tsi iñan Eroodis ni ko wi bañaan-ucaak Bajudeu ro wi ka lip bëlieng.” 12Per yëkëran bi ko wi na ciina wi, na tsëp kato Maaria, anin Joŋ ni ka n jakee Marku, di bañaan bacumal juk ri a bu kë ñaan. 13Bi na kob-koban bi pëlëman pëbëëm, a nalon nampëli naleemp, ni ka n jakee Rode bi pii cikëndën ñaan namënts; 14a nu yëkëran përim Per, na lílan mak, te waantsatsul pëlëman na niaj, maa na túk awitsa ee leents bañaan Per ci tsi pëlëman. 15A ba jaul: “M cits uwar, wi!” Maa, na piaka tsi pëja aci ucär. A ba ja: “Aci uwaanjuul.” 16Maa, Per wama ka kob-koban; bi ba waants bi pëlëman, ba winul, a ba lënk. 17Maa, a na wiil bukul kañan pa ba yëŋandar, na leents bukul bi Ajug pënaniul bi di ukalabus, a na ja: “Nda leentsan Jakob ko umënts wi, ni batsaar ni inja.” A na pën tsul atsëp ulon uburu.
18Unu kë fa, a u ka mantotëlër mwiak tsi pëncuaf basondaari, undo ko un par-na wi Per. 19Bi Eroodis tsasul bi a winatsul, na yepar bawaay, a uu ba, na tsu bukul ba fiŋaa. Eroodis pën di Judeeya atsëp Seesareeya, na ro rul ngënu.
Pëcäts Eroodis
20Eroodis ro riabatsar mak ni bañaan Tiiru, ni biki Sidon. Maa, ba baar pëloole, pii bi tsi nul. A ba kaaya Bëlaastu, nan ci naleemp di kato nasien, a ba ñaan Eroodis ba ro pëfac, par pëboos bukul ka yankëna ngëko bariala di pëboos nasien.
21Tsi unu un tsua wi, a Eroodis tiema iŋi pësien a na tsoar tsi pëtsoari kawat-pëleents, a na ñakanaan bañaan bëlieng. 22A bañaan kë lië koo ja: “Pi, aci përim nalon nasien-batsi, cits pi ñaan-najin!” 23Tsi uyëk umënts wun, ulon uwaanju Ajug kob Eroodis, undo bi na rëmbanats bi Nasien-batsi, a ngëkuc reul, na cäts. 24A tsi uwal umënts wun, përim Nasien-batsi ru pe këpe pëwiaka ni pëlaar.
25Bi Barnabas ni Sol ba bi përo uleemp, ba pën di Jerusalem pëwitsa. A ba tsëpand Joŋ, ni ka n jakee Marku.
Currently Selected:
NGËRO 12: KPKNT
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.
