NGËRO 13

Ngëriisia ayël Barnabas ni Sol

1Di Ngëriisia Antiookia, aka rul bayëlia, ni bajukan: aci Barnabas, ni Simeon ni ka n jakee buts Niger, ni Lusiu kanpënë-ni Sireeni, ni Manayen, nan kusee tsëloole ni Eroodis nasien kajara Galileeya, ni Sol. 2Bi ba ci bi tsi përëmban Ajug a ba bërand mlik, Uwejats-ujënts ja: “Nda patsandi Barnabas, ni Sol, pa uleemp wi duuri wi bukul.” 3Bi ba ba bi kabër-mlik, ni bëñaan, a ba paf bukul iñan, ba wëtan bukul ba tsëp.

Barnabas ni Sol, bë band Cipëri

4A Uwejats-ujënts yël bukul, a ba tsëp Seleusia. Dul, a ba paat alutar Cipëri. 5Bi ba band bi Salamiina, a ba leents përim Nasien-batsi di ito-ijuki Bajudeu. A ba ro tsëpand buts Joŋ, pa pëci natsënk bukul.

6A ba par-na unjiu bëlieng te di Pafus, ba win nalon napene, nan ci nayëlia natsup; aci Najudeu, a nuu jaka Bar-Yeesu. 7Aciina kabëuru ki Serjius Pol sien ki, nul niints nalipal. Serjius rui Barnabas ni Sol, par aŋal pëte përim Nasien-batsi. 8Maa Eliimas, napene, (par wul wi katimul pac wun), ŋalats ko wi bu kë ro wi; a nuu tsas pëwitsës uwak nasien. 9Din, a Sol ni ka n jakee buts Pol, cum ni Uwejats-ujënts, a na kaŋanul këkës, 10na ja: “Abuk Ujabël, nan cumi ni ngëko kafal, ni kawaraatsa bëlieng, nabër ko u mab wi; m di kë wëtan pëwítsës iga Ajug imabal-a? 11Inkri, kañan Ajug aci tsi ruëtsu, kë ci nakuël, m di kë win unu te ulon uwal.” Tsi uyëk umënts wun, katse win ko, a na ci tsi karëm. A nuu witsësar tsi na ci tsi, koo tsas ni ka mobëli kañan në tsëpand.

12A bi nasien win bi ko un par wi, na wak tsi Yeesu, a na pikra tsi bëjukan Ajug.

Barnabas ni Sol, bë band Antiookia Pisiidia

13A Pol ni bacintsul pën di Pafus, a ba paat aband Pergi di pëboos Panfiilia. Maa, Joŋ patsësa bukul a na witsee Jerusalem. 14Maa bukul buts, ba par-na Pergi aband Antiookia di pëboos Pisiidia. A tsi ulon Unu-pënaakësa, ba niaj ee tsoar di kato-kajuki. 15Bi ba ba bi bëjuk ko un pica wi tsi Utsua, ni tsi ko wi bayëlia pic wi, a bawiak kato-kajuki ja bukul: “Batsaar ni wund, uci nda ka pëlon përim pa pëliinc-liincanaan ngëwaas bañaan, nda ñakani pul.”

16A Pol natsa, na taar bukul kañan pa ba yëŋandar, na ja: “Bayënts Israel, ni ind ba lënk biki Nasien-batsi, nda cikëndëni-e! 17#Pëp 1.7 Pëp 12.51Nasien-batsi bañaan Israel biki, arat basin nja a na riang bañaan bi ba ci bi batsooŋ di pëboos Ejipët; maa, na pënani bukul rul ni pëyëlanul. 18#Ngëp 14.34; Ulú 1.31A na miira bëci bukul bi kawaraatsa, tsi ko un duakan wi ngëwaanu ngëntaaja ngëbaakër di ulaalats. 19#Ulú 7.1 Jos 14.1Bi na ba bi ni ngëcaak paaj ngun ni ulon, ngi ban cits biki Bajudeu, di pëboos Kanaan, a na wël bukul pul pa ba rukanda. 20#Baw 2.16 1Sam 3.20Ko wan bëlieng aro ngëwaanu ngan duakan ngi ngëseent ngëbaakër ni ngëwaanu ngëntaaja kañan. A uu ba, Nasien-batsi wël bukul bawat-pëleents te tsi uwal Samuel, nayëlia.

21 # 1Sam 8.5 1Sam 10.21 Din, a ba yep nasien, a Nasien-batsi wël bukul Sol, abuk Kis, nan pënë-nii pëbuka Be n jamin; na sien aro ngëwaanu ngëntaaja ngëbaakër. 22#1Sam 13.14 1Sam 16.12; Iya 89.21Bi na pënan bi Sol, na natsandari bukul Dawid na ci nasien, nul ni Nasien-batsi ñakandari buts ulekaul aja: ‘Man win Dawid abuk Jese, niints nan ci pi uwaas nji, ni kan doi uŋal nji bëlieng.’ 23Tsi pëbukaul tsi Nasien-batsi pënandari tsun Israel Nabuëran, un ci wi Yeesu, bi na ro bi watsan. 24#Mar 1.4; Lúk 3.3Aruka ka baandi, a Joŋ cakës aleents bañaan Israel bëlieng uleka bëmijan kayaar-ibats. 25#Joŋ 1.20 Mat 3.11; Mar 1.7; Lúk 3.16; Joŋ 1.27Maa, bi Joŋ kë bandan bi uleempul a na ja: ‘Yën ni nda wejats un pëja man ci? In citsul; maa, nalon ka bi tsi ufets nji, in tsënkaants pëjaa man pac iraala itsiimul.’

26Batsaar ni nji, ind pëbuka Abraam, ni ban ci biki tsi pëncuaf ind ba lënk biki Nasien-batsi, ja wëlee bukun përim pëbuër pi. 27Bañaan ban ci biki di Jerusalem, ni bawiak bukul bë meets ko Yeesu ci wi, bi ba lacanul bi, ba bandan irim bayëlia nja yi i roon, i ru jukaa tsi kara Unu-pënaakësa. 28#Mat 27.22,23; Mar 15.13,14; Lúk 23.21-23; Joŋ 19.15Ŋal bi ba winats bi ko ulon wi kan tsuul wi na fiŋa, ba yep Pilaatus na tsuul na fiŋa. 29#Mat 27.57-61; Mar 15.42-47; Lúk 23.50-56; Joŋ 19.38-42Bi ba ba bi pëbandan ko un picana wi bëlieng tsi ulekaul, ba welaniul di pëmul ee tsuul di pëbëk. 30Maa, Nasien-batsi natsaniul di bacäts, 31#Ngë 1.3a ban do bukunk ci ni nul di Galileeya pa Jerusalem, winul ngënu ngëcumal; a inkri, tsi bërun bañaan, bukul ci bukun ba maatir biki ngiicul pa pëleents bañaan.

32 # Iya 2.7 Wund aci tsi pëleents ind Upetsan-uwar u watsana wi basin nja 33bi Nasien-batsi bandan bi wul tsi nja babukul, bi na natsanii bi Yeesu di pëcäts, bi u picana bi buts di Uya-ubëndan utëbantsan aja:

‘Wi ci-un Abuk nji;

ntsari man bëku.’

34 # Isa 55.3 Nasien-batsi anatsaniul di bacäts, pa yaas a në nooy, wul ka wun na ja:

‘Mán wël ind ngëwar ngi watsan ngi Dawid, ngëyëman,

ngan fiaara ngi.’

35 # Iya 16.10 Wul ka wun na ja buts di ulon Uya-ubëndan:

‘M di kë wët Nayëmanu na nooy.’

36Par tsi ucär, Dawid tsi uwalul, aleemp tsi uŋal Nasien-batsi, na cäts a na mooya tsëloole ni basinul, a uliaful nooy. 37Maa, ni Nasien-batsi natsani unk di pëcäts, uliaful nooyats.

38Batsaar ni nji, nda ka pëme u ci tsi Yeesu tsi nda leentsënaa tsun përim kajampësa ngëjuban; a tsi ngëko bëlieng ngi ulua-Moises yëlants ngi pëtsu ind bamabal, 39tsi nul, na waki ba këwak atsua namabal. 40Nda roon bëwaar pa ko wi bayëlia ro wi ja urits baandë-ni ind:

41 # Aba 1.5 ‘Nda teenan-e, ind batsuuts-ñaan-ko!

Nda pikraan, nda niaman!

Par tsi ngënu ind, mándo uleemp,

uleemp wi nda rits wi ka fiaar, uci ñaan leents ind.’”

42Bi bu kë pëni bi di kato-kajuki, a ba ñaan Pol ni Barnabas pa ba kaka ñakan irim imënts yun, tsi Unu-pënaakësa wi kan bi wi. 43Bi bëjuk garandar bi, Bajudeu bacumal, ni ba niiran biki bëga Bajudeu a ba lënk Nasien-batsi, fets Pol ni Barnabas; a Pol ni Barnabas kë ñakanaan bukul a bu kë tsu bukul ba niiran pëtambandar tsi bëtseend Nasien-batsi.

44Tsi Unu-pënaakësa ucints, anats pi aci bañaan përaasa bëlieng bi bukun ee júk pa pëcikëndën përim Ajug. 45Maa, Bajudeu kë win indënd bañaan, ba cum ni mankocar, bu kë ñakan irim ikar koo pok ko wi Pol kë ja wi. 46Din, Pol ni Barnabas ñakanaan bukul ni bëyeentsal, aja: “Ind ka bukun pëleentsa përim Nasien-batsi ucak; maa, bi nda bër bink pul, a nda wejats bërier ind pëja nda tsënkaants pëyank ubiira un dits wi ka ba, inkri wund ka witsësa pa ban cits biki Bajudeu. 47#Isa 42.6; 49.6Par, unk di Ajug wund wël wund run ulai aj: ‘Man tsuu ufac ci pa ban cits biki Bajudeu, pa wi pëtsëpand pëbuër te di untsañi ucaak.’”

48A ban cits biki Bajudeu kë te ko wan, ba lílan a ba ci tsi përëmban përim Ajug; a ban do biki jaakara ubiira un dits wi ka ba, wak bëlieng.

49A përim Nasien-batsi laar ajëk ucaak. 50Maa, Bajudeu sualan bakaats ba lënk biki Nasien-batsi a ba ciind ban dëmbana biki, ni bawiak përaasa, a ba natsara pënoor-nooran Pol ni Barnabas, ba ruak bukul di pëboos bukul. 51#Mat 10.14; Mar 6.11; Lúk 9.5; 10.11A Pol ni Barnabas raafar bukul kandëpe iyots bukul, ba pën atsëp Ikooniu. 52Maa, bafets Yeesu ban ci biki di Antiookia, cum ni ulílan ni Uwejats-ujënts.

Currently Selected:

NGËRO 13: KPKNT

Highlight

Copy