NGËRO 11

Per aleents Ngëriisia ko wi na par-na wi

1A bapostolu ni bafets Yeesu ban ci biki di Judeeya, te u jaka, ban cits biki Bajudeu ayank buts përim Nasien-batsi. 2Bi Per kata bi atsëp Jerusalem, a Bajudeu leentsarul aja: 3“M niaj di kato bawelaatsa-kambac, a m diala tsëloole ni bukul.”

4Din, a Per kur pëleents bukul bi na par bi ja, a aja bukul: 5“Bi n ci bi di përaasa Jope a ndu ñaan, a n te pën tsi nji, tsi bëwinal, a n win kalon kako kë welee di batsi, kan tana ki tsi imbiantëmb ibaakër, anaami unk kaleenj kawiak, a ka bi te tsi nji. 6A n kaŋan kul këkës, a n win ngëkoraar ngëcaam ngan tsij ngi këtsiim këbaakër, ni ngë n jar, ni ngi kan puula ngi tsi utsia, ni ngëko-ngëyits batsi. 7A n te buts përim a pa jain: ‘Natsaan, Per! Fiŋan, kë re.’ 8Maa, a n ja: ‘Nin a, Ajug! Par i netse re ko u niiranaatsa wi përea oo un tsop wi ka niaj ri mtum nji.’ 9A përim kaka yankës di batsi uyaas utëbantsan, aja: ‘Ko wi Nasien-batsi jëntsan wi, m kaats pëja atsop.’ 10A kako kamënts kundo unk te ngëyaas ngëwaants, a ka witsësa aniaj batsi.

11Tsi uler umënts wun, a bayënts bawaants ban pëni biki Seesareeya yëlee tsi nji nats tsi kato ki wund ciina ki. 12A uwejats jain tsëp ni bukul, nji tsë tsij ngëwejats ngëtëb. A batsaar tsi Këristu, bañaan paaj biki, tsëp buts ni nji, a wund niaj di kato niints namënts un. 13A na leents wund bi na win bi uwaanju nats di katoul, a u jaul: ‘Yëlan bañaan di Jope, pa ba rui Simon, ni ka n jakee Per, 14nii leentsu irim i kan bëëranu yi, wi ni bañaan katou bëlieng.’

15Maa, bi kur bi uñakan, Uwejats-ujënts welee tsi bukul, bi u welee bunk tsinja tsi ujuundi. 16#Ngë 1.5Din, a les përim Ajug bi na ja bi: ‘Tsi ucär, Joŋ amijanaan mlik, maa ind ndu mijanaana Uwejats-ujënts.’ 17Par, uci Nasien-batsi wël bukul utseend uloole wi na wëlnjawunk, n ja ba uwak biki tsi Yeesu Këristu, Ajug, nji man ci yën pa pëjaa man totëlar ni Nasien-batsi?”

18Bi ba te bi ko wan, a ba tsëkandar, bu kë rëmban Nasien-batsi koo ja: “Tsi ucär, Nasien-batsi awël ban cits biki Bajudeu kayaar-ibats, pa ba ka ubiira.”

Ngëriisia di Antiookia

19 # Ngë 8.1-4 Bañaan ban gara biki, undo pënoor-noorana pan baandi pi tsi uleka Estefan, tsëp te Feniisia, ni Cipëri, ni Antiookia, a bë leentsats ñaan përim, ucits Bajudeu baŋ. 20Maa, balon tsi bukul ban ciina biki Cipëri ni Sireeni, bë band Antiookia, ba ñakanaan buts Bagërek, aleents bukul Upetsan-uwar, uleka Yeesu, Ajug. 21Kañan Ajug ci ni bukul, a bacumal wak, ba witsësa pa Ajug.

22A bañaan Ngëriisia Jerusalem te ko un par-na wank bukul, ba yël Barnabas na tsëp Antiookia. 23Bi na band bi, a na win bëtseend Nasien-batsi, na lílan, a na liinc-liincan bukul ngëwaas bëlieng, pa ba mob ba liincan tsi Ajug, di ngëwaas bukul bëlieng. 24Par aci niints na waree, na cum Uwejats-ujënts, ni uwak. A kandënd bañaan kawiak ruka ci ni Ajug.

25A Barnabas pën atsëp Tarsu, pëtsas Sol; 26bi na winul bi, a na tsëpandul Antiookia. Tsi uwaanu upëban, a ba bof tsi Ngëriisia Antiookia, bu kë jukan kandënd bañaan kawiak. Di Antiookia di bafets Yeesu ru cakës pëjakaa Bañaan-Këristu.

27Tsi ngënu ngëmënts ngun, balon bayëlia pëni Jerusalem ajúŋee Antiookia; 28#Ngë 21.10a nalon ni ka n jakee Agabës natsa, a na ñakan tsi pëyëlan Uwejats, aleents ubon uwiak kii ci tsi umundu bëlieng; a u bi ci tsi uwal Klaudiu, nasien nawiak. 29Din, a bafets Yeesu baaraan pëja kara ñaan në pwël ko wi na yëlan wi, pa pëtsënk batsaar tsi Këristu ban ci biki di Judeeya. 30A ba ro unk. A ba wël bëtsënk bëmënts bun pa bajëŋal di Ngëriisia, Barnabas ni Sol tsëpand bukun bul.

Currently Selected:

NGËRO 11: KPKNT

Highlight

Copy