NGËRO 1

Bapostolu atsana Uwejats-ujënts

1 # Lúk 1.1-4 Teofilu! Man pican ulibëru nji ucak a n leents ngi Yeesu juund ngi përo bëlieng ni pëjukan, 2te unu wi na tsëpanda wi batsi, bi na ba bi pëwël bapostolu ngëtsua tsi pëyëlan Uwejats-ujënts, bukul biki na rat biki. 3A tsi bamënts biki buts a na pibandar na kak aci nayësal, ni ngëpiban gëcumal bi na ba bi unoor, a nuu cili tsi bukul tsiun ngënu ngëntaaja ngëbaakër gun, a nuu ñakan ngëko pësien Nasien-batsi. 4#Lúk 24.49Bi na ci bi tsi bariala ni bukul, na ja bukul: “Ind tsë pën tsi Jerusalem; nda lipan ko wi Asin watsan wi, a nda te wul tsi mtum nji. 5#Mat 3.11; Mar 1.8; Lúk 3.16; Joŋ 1.33Par Joŋ amijanaan mlik, maa ind, tsini ngënu ngi, ndu mijana di Uwejats-ujënts.”

Yeesu tsëpanda batsi

6Din, bukul ban juk biki yeparul aja: “Ajug, ka ci uwal wi; wi kë kakan wun pësien Israel natsan-a?”

7Na yankës bukul aja: “Nda kaats pëme ngëwal oo ngënu ngi Asin tsu ngi, tsi pëyëlanul bërierul. 8#Mat 28.19; Mar 16.15; Lúk 24.47,48Maa ndu yank pëyëlan, uwelee Uwejats-ujënts tsi ind, din ndë ci bamaatir ngëmíñ, di Jerusalem, unk buts di Judeeya bëlieng, ni di Samaaria, te di ngëntsañi umundu.” 9#Mar 16.19; Lúk 24.50,51Ubaul pëja irim yan, a bu kë teenul, a nu tsëpanda ruets, a kasa bi ee kúndul tsi këkës bukul.

10Bi ba wama bi kaŋan këkës di batsi bi Yeesu kë tsëpanda bi, bayënts batëb ban tiema biki iŋi ifaacal cili tsi kawok bukul; 11a ba ja: “Bayënts Galileeya, we ka wun nda nats a nduu teen batsi? Yeesu, nul nan jeja ink tsi pëncuaf ind atsëpanda batsi, unk ri nu witsee run bi nda winul bunk a nuu tsëpanda batsi.”

12Din, a ba pën di untunda wi ka n jaka wi, Mëoliiwa u ci wi tsi ka wok Jerusalem, ba witsa Jerusalem. 13#Mat 10.2-4; Mar 3.16-19; Lúk 6.14-16Bi ba niaj bi përaasa, a ba paiya pëfër përuets di ba ro ri ka jukëna; aci Per ni Joŋ, Jakob ni Andëre, Filip ni Tomaas, Bartolomeu ni Mateu, Jakob abuk Alfeu, ni Simon nakamandar ucaakul, ni Judas abuk Jakob. 14A ba baar bëlieng pëloole a bu kë mob tsi bëñaan, ni balon bakaats, ni Maaria anin Yeesu, ni ban tsaar biki ni nul Yeesu.

Matias ayank pëlas Judas Iskarioti

15Tsi ngënu ngëmënts ngun, Per natsa tsi pëncuaf ban tsaar biki ni nul, ban juk biki aci ko pi bañaan useent ni ngëntaaja ngëtëb, a na ja bukul: 16“Batsaar ni nji! Ko un jaka wi di Bëpican, aka përolaa, bi Uwejats-ujënts tsu bi Dawid a na car ñakan tsi uleka Judas, nan ci bëga bi ba mob biki Yeesu par-na bi. 17Par nul, aro pina tsi nja a na ro ka kafaul tsi uleemp wi.” 18#Mat 27.3-8 A inkri Judas weelna bërig bëluk kamabatsul, na júŋee ayëri, a na tawa tsi pëncuaf, a ipësul garee bëlieng. 19Bañaan bëlieng ban ciina biki Jerusalem bi me ko wan. Wul ka wun, tsi ulíingu bukul, bërig bëmënts bun kë jaka Akelëdama, un ci wi, bërig-pëñaak.

20 # Iya 69.26 Iya 109.8 “Par, iink di u picana run di ulibëru Uya-ubëndan, aja:

‘Katoul; ka rukan kajënts;

ñaan tsë ci di kul.’ A u kaka jaka:

‘Nalon na yankan uleemp wi na ro wi tsua.’

21 # Mat 3.16; Mar 1.9; Lúk 3.21 Mar 16.19; Lúk 24.51 Bi u ci bank, awara u roon, tsi bayënts ban do biki ci ni nja uwal bëlieng, wi Yeesu Ajug kë yandaar wi tsi pëncuaf nja 22pëkur-ni tsi bëmijan Joŋ, te tsi unu wi Yeesu tsëpanda wi ruëts, nalon tsi bukul aka pëci ni nja tsi puu leents uleka pënatsee Yeesu di pëcäts.”

23Din, a ba piban batëb: Juse ni ka n jakee Barsabas, a nuu jakaa kak Justus; ni Matias. 24A ba ñaan aja: “Wi Ajug, na mei ngëwaas bañaan bëlieng, pibani ni m dati tsi batëb biki, 25pa na yank pëlas tsi uleemp wi ni tsi kayëlia, pi Judas wëtan pi a na tsëp tsëko tsan ci tsi tsíicul.” 26Ba júgatsar bukul iko, a kako yër tsi Matias, din a na pinanda ni bapostolu untaaja bukun ni naloole.

Currently Selected:

NGËRO 1: KPKNT

Highlight

Copy