NGËRO 2

Uwejats-ujënts awelee

1 # Ija 23.15-21; Ulú 16.9-11 Bi unu Pentëkost baandi bi, a ba júk bëlieng tsi tsëko tsëloole. 2Ucar umënts wun, pëuur pëni di batsi pi ukëk ee cum bëlieng kato ki ba tsoarëna ki. 3Din ko cili pi indiamënt bërua a i gara pafar tsi kara ñaan tsi bukul. 4A ba cum bëlieng Uwejats-ujënts, a ba ci tsi pëñakan mlon mleents, bi Uwejats tsu bi bukul pëyëlan pë ñakan.

5A ka Bajudeu ban pëni biki Jerusalem, bañaan ba lënk biki Nasien-batsi pëni tsi ngëcaak bëlieng tsi utsia batsi. 6Bi ba te bi pëuur, a kandënd bañaan bi ee júk a bë katse me ko wi bu kë ro wi, uja nan dooni në te bu kë ñakan tsi pëleentsul bërierul. 7Bë katse me ko wi bu kë ro wi, ba pikra, a bu kë ja: “Nda teenan-e! Biki ka ñakan bikink bëlieng, bë cits iink bañaan Galileeya-a? 8Um di uja run kara ñaan tsi nja në te bu kë ñakan tsi pëleentsul bërierul pi na bukëna pi? 9Nja ban pënë-ni biki Partos, Medos, Elamit, ni ban tsoar biki di Mesopotaamia, ni Judeeya, ni Kapadoosia, ni Pontus, ni Aasia, 10ni Friijia, ni Panfiilia, ni Ejipët, ni këboos Liibia ka wok ki Sireeni, ni ban pëni biki Rooma ee tsoar tsi, 11ni Bajudeu, ni bañaan ngëcaak ba niaj biki bëga Bajudeu, ni bañaan Këreeta ni Araabia; a ngë te bu kë ñakan tsi mleents nja uleka ngëko Nasien-batsi ngëpikranuël.” 12Bu pikra bëlieng, a bë katse me ko wi bu kë ro wi, a bu kë jaalar tsi ba ci tsi: “We ci wun umënts wi-o?”

13Maa balon kë riat koo ja: “Bë kuj këkuj pëwat!”

Per añakanaan kandënd bañaan

14Din, Per natsa ni untaaja bukun ni naloole, na kat përim, aja bukul: “Bayënts Bajudeu, ni bañaan Jerusalem bëlieng, nda mean ko wi, ndë cikëndën irim nji. 15Bañaan biki kujats, bi nda ci bunk tsi pëwejats, par aru ci ngëler këwas ni ulon ngi bëfa. 16Maa ko wi, aci wi Joel, nayëlia ro wi ja: 17#Joe 3.1-5Nasien-batsi aja: ‘Tsi ngënu ngëtuami,

mán koŋi Uwejats nji,

tsi bañaan bëlieng.

Babuk ind bayënts ni bakaats, bu kee ru leents ngi Nasien-batsi;

ipaas ind kee ru ka bëwinal,

ngëtsaf ind kee ru tsaafi.

18Ucar, tsi ngënu ngëmënts ngan, mán koŋi Uwejats nji

tsi baleemp nji bayënts ni bakaats;

bu kee ru leents ngi Nasien-batsi.

19Mán do ngëko ngan pikran ngi di ruëts batsi,

ni ngëpibanaani tsi utsia tsi:

Pëñaak, bërua, ni uwamël urú.

20Unu ka witsa u ci karëm,

pëli ka witsa pëñaak,

tsini uruka ka baandi unu uwiak Ajug, wi përëmb.

21Din, uja nandui ba këru katim Ajug,

në buer.’

22Bayënts Israel, nda cikëndëni irim yi! Yeesu Kanpënë-ni-nasaret, niints ni Nasien-batsi niirani tsi bërun ind, tsi undo bawitsa, tsi ngëko ngan pikran ngi, ni ngëpibanaani ngi Nasien-batsi roona ngi tsi nul tsi pëncuaf ind, ind bërier nda me; 23#Mat 27.35; Mar 15.24; Lúk 23.33; Joŋ 19.18nul agutsara ind, bi Nasien-batsi ro bi baaraan u rola, tsi utsaagul ni tsi kacar-umeul; a nda rieŋul di kruus afiŋënul iñan bamabats. 24#Mat 28.5,6; Mar 16.6; Lúk 24.5Maa Nasien-batsi natsaniul, bi na pacul bi mkorente pëcäts, par yilaatsa bëjaa pëcäts amobul a tsijëna. 25#Iya 16.8-11Par Dawid aja tsi ulekaul:

‘Ma n ja n doon koo n win Ajug sandëndën, tsi bërun nji,

par aci tsi kariir nji, pa nji përits siints-siintsana.

26Wul ka wun uwaas nji ci tsi ulílan,

a pëndiamënt nji ci tsi mkita;

ŋal uliaf nji buts ka naakësa tsi uwats.

27Par, m di kë bër uwaas nji di mcats,

te m di kë wët najëntsu na nooy.

28M tsuin a me iga ubiira;

kë cumanin ni ulílan tsi bërunu.’

29Batsaar ni nji! Nda wëtin man leents ind jëntsan, tsi uleka Dawid, asin nja; nul a cäts a na mooya, pëbukul awama ci tsi ucaak nja te unu untsari. 30#Iya 132.11; 2Sam 7.12,13Nul aci nayëlia, a na me Nasien-batsi ro baaja aja, tsi pëtsoari-pësienul, ka tsoaran nalon ni kan pënë-nii tsi kajërul. 31Dawid aro car awin ko wi Nasien-batsi kii ro wi, wul ka wun na leents uleka unatsaree Këristu di pëcäts aja: ‘Nul wëtaatsa di mcats, nin uliaful nooyats di pëbuk.’

32Yeesu namëntsi, Nasien-batsi anatsaniul di pëcäts, a wund bëlieng aci ba maatir biki umënts wi. 33Nasien-batsi ariangul tsi kariirul, a na yank Uwejats-ujënts di Asin, undo wi watsana; na koŋi wul, bi nda win bink a nda teend. 34#Iya 110.1Par Dawid payaatsa batsi, maa nul bërierul aja:

‘Ajug aja Ajug nji: Tsoaran tsi kariir nji,

35aa ka tsu babëru ba ci pëpafëni iyotsu.’

36Bañaan kato Israel bëlieng aka pëme, Yeesu ni nda rieŋ ink di kruus, Nasien-batsi atsuul na ci Ajug, na ciind Këristu.”

Bacäk ba witsësa biki aniiran Yeesu Këristu

37Bi bañaan te bi ko wan, a ngëwaas bukul juatsan mak, a ba ja Per ni bacintsul bapostolu: “Batsaar ni wund! We wi wund kë ro wun?”

38A Per yankës bukul aja: “Nda wëtani bëci ind, uja kara ñaan tsi ind në mijana tsi katim Yeesu Këristu, pa pëjampësaa ngëjubanul, ndë yank utseend Uwejats-ujënts. 39Par, ind biki Nasien-batsi watsan bukun wul, ni upäts ind, ni ba wama biki lawan bëlieng, ban ci biki, biki Nasien-batsi nja Ajug, kë rui biki.”

40A Per leents ngan par ngi ni ilon irim icumal, a na liinc-liincan bukul ngëwaas aja: “Nda buerani iyeen ind tsi bañaan ntsari, bukul ba waraatsa biki.” 41A ba niiran biki përimul mijana; tsi unu umënts wun, bëruakan bañaan ngëmiil ngëwaants (3.000).

Ubíira bacak ba uwak biki tsi Yeesu Këristu

42Bu mob tsi bëjukan bapostolu, ni tsi manteelar, ni tsi katawës upom, ni tsi bëñaan. 43Uja kara ñaan në lënk; a bapostolu kë ro ngëko ngëcumal ngan pikran ngi, ni ngëpibanaani. 44#Ngë 4.32-35Ba wak biki bëlieng ci tsëloole, a ba bofara ngëko ngi ba ka ngi bëlieng. 45Ba ja ba waap bëka bukul, ni ngëko ngi ba tsij ngi, bu ka faar ko wi ba ka wi, kara ñaan bi na fier bi. 46A ba baar pëloole, uja kara unu bu ka mob tsi pëci di kato-kayëman, bu kë tawës upom di kara kato, bu kë re bariala bukul ni ulílan, ni kajuab-uwaas. 47Bu kë bëndan Nasien-batsi, a bañaan lílandër bukul bëlieng. Uja kara unu, Ajug kë watsës tsi bukul ban buëri biki.

Currently Selected:

NGËRO 2: KPKNT

Highlight

Copy