लूका 12
12
पाखण्डैरै खिलाफ चेतावनी
1तेसै टैंमा तैठि हजारों मैहणुवां केरी योउती भीड़ किट्ठी भौ गैई कि सै योकिया मझ ढक्का-मुक्की कांना लगै, तां यीशु सभनियांं पेहिलै अपड़ा चैला सिंउ बोलणा लगा, “फरीसिया केरै खमीरा जां कवट कांनारा किना बचि करि बेशै।” 2केईनी कि जै गलै छापाउरी अत्ति सै गलै अक धियाड़ी परमेश्वरा सभनियांं केरै सांमणै अंणनी; जां कुछ गलै जै चोरी-छपि भूंती सै अक धियाड़ी हर मैहणु तकांणी। 3ऐठणीरै तेईनी जै गलै आंउ तुहांनि गुप्त मझ शुणाता, सै प्रगड़ु शुणाईयूंणी जां जै तुहैं कमरै मझ बेशि करि योकिया केरै कन्नां मझ बोलोरू आ, तेसैरा छत्ति पन प्रचार करियूंणा।
कोस किना डरूं?
(मत्ती 10:28-31)
4“हे मित्र! तैन्हांं हैरी मेईं डरै जै तुहां जांनि किना मारी छडणां चांहथै अत्तै, सै सिर्फ तुवाड़ै शरीरा मारी सकतै, ऐठां किना जादा दुख ना दी सकतै। 5आंउ तुहांनि शुणांता कि, कोस किना डरीणु चेहिंथु, तैस धेरै डरा जैस मझ तुहां माना किना बाद नरका मझ सुटणैरा अधिकार आ। 6चिड़िया केरै बारै मझ सौचा, ऐन्हैरी कीमत योउती घट आ कि एकि पेंईसै मझ दो खरीदी सकतै, फिरी बि परमेश्वरेरी मर्जी बगैर तैन्हांं मझांं अक बि ना मरि सकती केईनी कि परमेश्वर ता सभ किछ जांणता। 7परमेश्वर तुवाड़ै जीवनेरी हर-एकि गलेरी परवाह काता, सै ऐ बि जांणता कि तुवाड़ु शिरा मझ कियोतै शिरवा अत्तै। ऐठणीरै तेईनी डरा मेईं, तुवे चिड़िया किना बि जादै कीमति अत्तै।”
यीशु मंनणा या ना मंनणा
8“आंउ तुहां सिंउ सच बोलता कि जै कौ मैहणुवां केरै सांमणै निडर भौ करि मनि लींता कि आंउ तेसैरा चैला, ता सैक्या मूं मैहणुरै पुत्रा बि स्वर्गा मझ बेशणारै अपड़ै पिता परमेश्वरेरै स्वर्गदूता केरै सांमणै अपड़ा चैला मनि लींणा। 9पण जै कौ मैहणुवां केरै सांमणै मिंडा चैला भौ करि मिंडा नमां करैला, ता तेसैरा मूं मैहणुरै पुत्रा बि परमेश्वरेरै स्वर्गदूता केरै सांमणै नमां कांना कि सै मिंडा चैला ना।
10जै कोई मिंडै, मैहणुरै पुत्रेरै विरोधा मझ कौ गल बोलेला तेसैरा ऐ अपराध माफ भौ गांहणा, पण जै कौ पवित्र आत्मायरी निंदा करैला परमेश्वरा तेसनी कदि माफ ना कांनु। 11जेख्णी मैहणुवां तुवे यहूदी सभा घरा मझ जां राज्यपालेरै सांमणै तुहां पन मुकदमा चलांणेरै तेईनी लै गांहणै ता ऐस गलेरी चिंता मेईं कातै कि असु तैन्हांं किना बंचणेरै तेईनी कितु बोलणु। 12केईनी कि पवित्र आत्माय तुहांनि तेसै टैंमा शिख्राय दींणु कि कितु बोलणु।”
एकि अमीर मैहणुरा उदाहरण
13भीड़ि मझांं एकि मैहणु यीशु सिंउ बौलु, “हे गुरू! मिंडै भाई सिंउ बोल कि असेड़ै बबेरी सम्पति मूं सिंउ बंडि दै।” 14तेनी तैस सिंउ बौलु, “हे मैहणु, तुवाड़ी संम्पति बंडणैरा न्याय कांना मिंडा कम ना।” 15जां यीशु तैन्हांं सिंउ बौलु, “ध्यान रखा, कि जै किछ तुहां किनि ना, तेसैरा लालच मेईं करा, केईनी कि जादा धन-दौलत कोसेरी जान ना बचा सकती।” 16यीशु तैन्हांं सिंउ अक उदाहरण होरा बोला, “कोसक्यै अमीरेरी पट्टि मझ बड़ी जादा फसल भुई। 17तां सै अपड़ै आपा मझ सौचणा लगा, कि अबै मूं ना पता कि कितु कांनु चेहिंथु? केईनी कि मूं किनि ता ऐस योउती फसलि रखणैरै तेईनी जगा ऐ ना।” 18जां तेनी बौलु, मूं पता आ कि मूं कितु कांनु चेहिंथु; मूं अपड़ि तूंणी पुटि करि दुबारे तैन्हांं किना बडी बणैणी, जां तैठि अपड़ि सारी फसल रखणी। 19“तेठां किना बाद मूं सुखै सिंउ बेशणु जां अपड़ै आपानि बोलणु, मूं किनि बड़ा साला केरै तेईनी अबै बड़ी फसल किट्ठी भौ गियोरी आ, अबै आराम सिंउ खा-पी जां सुखै सिंउ बेश।” 20पण परमेश्वरै तैस सिंउ बौलु, “हे मूर्ख! तु ता ऐसै राती मरि गांहणार आ! तांउ मरि गांहणा किना बाद जै किछ तीं किठु क्यौरू आ सै कोसैरू भूंणु? 21ऐतियु ऐ तैस मैहणु सिंउ बि भूंणु जै अपड़ै तेईनी दुनियां भरैरी धन-दौलत किट्ठी काता, जां परमेश्वरेरी सेवाईरै तेईनी अपड़ि धन-दौलत ना लांता।”
परमेश्वरा पन भरौसा रखा
(मत्ती 6:25-34; 6:19-21)
22फिरी यीशु अपड़ा चैला सिंउ बौलु, “ऐठणीरै तेईनी आंउ तुहां सिंउ बोलता, कि अपड़ै तेईनी चिंता मेईं करा कि असु कितु खांणु; ना अपड़ि जांनिरै तेईनी कि असु कितु लाणु। 23केईनी कि रोटिया किना प्रांण, जां लिकड़ा किना जांन बधि करि आ। 24पंछिया पन ध्यान देया सै ना बांतै, ना बढ़तै ना तैन्हेरी तूंणी भूंती, तां बि परमेश्वर तैन्हांं पाता। तुवाड़ी कीमत ऐन्हां पंछिया किना जादी आ। 25तुहां मझ ऐतिया केणु आ जै चिंता कांने ला अपड़ि जिन्दगिरा अक पल बि बधैई सकता? 26ऐठणीरै तेईनी अगर तुवे यौउता त्या हल्का कंम बि ना करि सकतै ता जीवना मझ होरनियां गला केरी चिंता केईनी कातै?
27बंणेरै फुला धेरै तका कि सै किहीं मोटियूंतै, सै ना मैहनत कातै ना बुंणतै तां बि आंउ तुहां सिंउ सच बोलता कि, राजा सुलेमानेरै बोलै अपड़ि योउती सारी धन-दौलत भूंणा पन बि तैन्हांं मझांं कोस बि एकि फुला सैयि बधिया लिकड़ै ना लाईयै। 28ऐठणीरै तेईनी अगर परमेश्वरा मैदानेरू घाह जै आज आ, पण दोत्तीं आगी मझ सुटि दींणु, जां ऐहीं-चारै सजांता ता हे कमजौर विश्वासियो, सै तुहांनि तैस किना ज्यादै बधिया लिकड़ै किना लुवाला। 29जां ऐठणीरै तेईनी तुवे ऐहीं मेईं सौचा कि कितु खालै, कितु पीलै, ऐसेरी चिंता मेईं करा। 30केईनी कि संसारेरै मैहणु जै परमेश्वरा ना जांणतै ऐन्हां सभनियांं चीजा तोपतै रींहथै, जां तुवाड़ा परमेश्वर पिता जांणता कि तुहां ऐन्हां चीजा केरी जरूरत आ। 31ऐठणीरै तेईनी तेसेरै राज्यरी खोजि मझ रिय्हा, ता ऐकेई चीजै बि तुहांनि मेईं गांहणी।
स्वर्गीय धन
32तुवे मिंडी देखभाली मझ भ्रैडा केरै एकि हल्कै झुंडा सैयि अत्तै, ऐठणीरै तेईनी कोस बि गलैरै तेईनी मेईं डरा, केईनी कि जै तुवाड़ा पिता परमेश्वर आ तैस ऐहै बधिया लगु कि तुहांनि स्वर्गेरा राज्य दिया। 33अपड़ि संम्पति बैचि करि गरीबनी दांन करि दिया जां अपड़ै तेईनी ऐतियै बटुवै बंणा जै पुरांणै ना भूंतै, मतलब पेईंसेरी जगाय भलाईरै कम कर जै कि स्वर्गीय धन आ, जां तैस किठैरा जैस ना चौर चोरी सकता ना तेसनी कीड़ै लगी करि शड़ना। 34केईनी कि जेठि तुवाड़ा धन आ तैठि तुवाड़ा मंन बि लगी रींहणा।
बियुझै रिय्हा
(मत्ती 24:42-44)
35परमेश्वरेरी सेवा कांनेरै तेईनी हमेशा तियार बेशा जां सारी रात अपड़ै दीयै जाई करि मिंडै वापस ऐईंणेरै तेईनी तियार रिय्हा। 36जां तुवे तैन्हांं मैहणुवां सैयि बंणा जै अपड़ै मालिका ऐईंणैरा इन्तजार कातै रींहथै कि सै ब्याहा किना वापस अईछी करि जेख्णी दुवार खड़काईया ता सै झटपट तेसेरै तेईनी द्वार खोलि दिया। 37धन्य अत्तै सै दास, जैन्हैंरा मालिक तेसेरै वापस ऐईंणा तेईनी तैन्हांं बियुझा जां सेवा कांनेरै तेईनी तियार बेठौरा तकाईया; आंउ तुहां सिंउ सच बोलता कि मालिका एकि दासा सैयि लिकड़ै ला करि सैक्यै रोटी खांणनी बेशाने जां एकि-ऐकिनि रोटी प्रंजणी। 38अगर मालिक अधि राती या भियग भूंणा किना पेहिलै अईछी करि तैन्हांं बियुझै बेठोरै तकाईया ता सैक्या दास धन्य आ। 39पण ऐ बुझि लिया कि अगर घरैरा मालिक जांणता भूंता कि चौरा चोरी कांननी कोस टैंमा ऐईंणु ता तैस बियुझै बेशणु थियु, जां अपड़ै घरै चोरी ना थी भूंणा दींणी। 40ऐठणीरै तेईनी तुवे बि मिंडै वापस ऐईंणा तेईनी तियार रिहा, केईनी कि मूं मैहणुरै पुत्रा ऐतियै टैंमा स्वर्गा किना ऐईंणु, जैस टैंमा तुवे मिंडै ऐईंणेरै बारै सोचतै बि ना भूंणै।”
विश्वासयोग्य या अविश्वासयोग्य दास?
41तां पतरसै बौलु, “हे प्रभु! क्या ऐ उदाहरण तु असेड़ै तेईनी ऐ या सभनियांं केरै तेईनी बोलता?” 42दासै बौलु, “विश्वासयोग्य जां बुधिमान भण्डारी सैहै भूंता, जैसनि मालिक अपड़ै नौकरा-चाकरा केरा ख्याल रखणैरै तेईनी तैस तेन्हैरै मुखियै बंणाता कि सै तेन्हांनि टैंमा पन रोटी दिया। 43धन्य आ सै दास, जेसैरा मालिक अईछी करि तैस ऐतियु कातै तकांता। 44आंउ तुहां सिंउ सच बोलता; सैक्या दास तैस मालका अपड़ि सारी संम्पति पनि अधिकारी बणांणा, 45पण अगर सै दास सौचणा लगिया कि मिंडै मालका ऐईंणा मझ देर लगणी, जां अपड़ै साउगिया दासा सिंउ मार-पिटाई करि-करि बुरा व्यवहार काता, जां पियक्ड़ा सिंउ खांता-पींता। 46तां तैस दासेरै मालका तैस टैंमा ऐईंणु जेख्णी सै तैस भाता ना भूंणा, जां ऐतियै टैंमा ऐईंणु जैस टैंमेरा तैस पता ना भूंणा। तेसनी कठोर सजा दींणी। तैस-तैस जगाय पन रखा जेठि सै सभनियांं अविश्वसिया रखता। 47सै दास जै अपड़ै मालकेरी ईच्छाय जांणि करि बि तेसेरै तेईनी तियार ना बेठा जां तेसैरी मर्जी ना चला ता तेसनी बड़ी बुरी सजा मेईंणी। 48पण जेनि अंणजाणै मझ मार खांणेरै काबिल कम केया तैस थोड़ी मार खांणी। ऐठणीरै तेईनी जैसनि जादु दितोरू आ, तैस किना जादु मगियूंणु जां जैसनि बड़ु जादा दितोरू आ तैस किना बड़ुवे जादु लियूंणु।
यीशुरै ऐईंणैरा नतीजा
(मत्ती 10:34-36)
49आंउ धरती पन आग लांणा यौउरा जां आंउ चांहथा कि ऐ आग ऐम्हीं जयि गहिया। 50मूं बड़ी जल्दी ऐ भयांकर पीड़ा सहन कांनी आ जां जेख्णी तेईनी सै पीड़ा ना भुई त्यो-तेईनी आंउ बड़ा बेचैन रींहणा। 51क्या तुवे ऐहीं समझतै कि आंउ धरती पनि मिलाप करांणा यौउरा? आंउ तुहां सिंउ सच बोलता कि, मिलाप करांणा ना पण अलग करांणा यौउरा। 52केईनी कि ऐमिहां किना अगर एकि घरा मझ पंज मैहणु भुईया ता सै योकिया मझ अलग-अलग भूंणै, त्रा मैहणु जै मूं पनि विश्वास ना कातै तैन्हांं जै सै दो होरै भूंणै, तेन्हैरा विरोध कांना जै मूं पन विश्वास कातै। 53बब पुत्रा सेईतै, पुत्र बबा सेईतै विरोध रखैला, माँ छोकरी सेईतै, छोकरी मयि सेईतै, शशु नुहैं सिंउ, नुह शशु सेईतै विरोध रखैलि।”
टैंमेरै लछण
54यीशु भीड़ि सिंउ बि बौलु, “जेख्णी तुवे बदअ पशिचम किना उठतै तकांतै ता झट बोलतै कि झड़ी ऐईंणी, जां ऐहिंयो भूंतु। 55जां दक्षिण किना ब्यार चलती तकांतै ता बोलतै कि लूह चलणी, जां तींहै भूंतु। 56हे कवटियो! तुवे धरती जां सुरगेरै रूपा-रंगा मझ भेद करि सकतै पण ऐस युगा मझ परमेश्वर कितु काता आ, ऐस भेदा तुवे ना जांणतै?
अपड़ा दुशमणा सिंउ समझौता
(मत्ती 5:25-26)
57तुवे अपुवै फैसला किना करि लींतै कि, ठीक कितु आ? 58जेख्णी तु अपड़ै दुशमणा सिंउ अदालतिनि गांहथा ता बत्तै मझ तैस सिंउ राजी-नामा करि लै। ऐहीं ना भुईया कि सै ताउ जजा किनि छिकि करि लै गहिया, जां जज ताउ सिपहिया केरै हवालै करि दिया, जां सिपाहि ताउ जैल्ही मझ सुटि दिया। 59आंउ तुहां सिंउ सच बोलता कि ज्यो तेईनी तु पाई-पाई भरी ना दैला त्यो-तेईनी तेठां किना छुटि ना सकता।”
Currently Selected:
लूका 12: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
