लूका 13
13
मंन फैरा या नाश भुआ
1तैस टैंमा किछ मैहणु जै तैठि थ्यै तैन्हैं यीशु सिंउ बौलु, कि रोमी राज्यपाल पिलातुसै गलील जिल्हेरै किछ मैहणु मारी छडथियै, जेख्णी सै मंदरा मझ बलिदान चाढ़तै थ्यै। 2ऐक्यु शुणि करि यीशु तैन्हांं सिंउ बौलु, “क्या तुवे ऐहीं समझतै कि ऐक्यै गलील प्रदेशेरै मैहणु बाकि सभनियांं गलीली मैहणुवां किना ज्यादा पापी थ्यै? कि तेन्हैरी ऐ हालत भुई।” 3आंउ तुहां सिंउ बोलता अगर तुवे बि बुरै कम छडि करि अपड़ा मंन परमेश्वरा धेरै ना फेरेलै ता तुवे बि ऐहियें-चारै नष्ट भूंणैं जिहीं सैक्यै नष्ट भोरै थ्यै। 4तुवे तैन्हांं अठाहरा मैहणुवां केरै बारै मझ कितु सोचतै, जैन्हां पनि शीलोहेरै इलाके मझ घौड़ा केरी सभनियांं उथड़ि कंन्थ छिढ़ि, जां सै सारै तैस थल्लै गहि करि मरि ग्यै; ता क्या सै यरूशलेम शहरा मझ रींहणारा किना जादै पापी थ्यै? 5आंउ तुहां सिंउ बोलता, कि ना; पण अगर तुवे अपड़ै पापा किना मंन ना फेरेलै ता तुवे सभ बि तिहियें-चारै नष्ट भूंणै।
बिना फल बाउ अंजीरेरू बुट्टैरा उदाहरण
6फिरी यीशु एकि होरै उदाहरणा मझ बौलु, “एकि मैहणु अपड़ै अंगूरेरै बगीचै मझ अक अंजीरेरू बुट लाउरू थियु, जां सै हर साल तकांणा ग्या कि क्या तैस पन कोई फल अत्तै कि ना, पण तेसनी किछ ना मेईंतु। 7तां तेनी बगीचेरै पेहरेदारा सिंउ बौलु, तका मूं त्रा साल भौ ग्यै ऐस अंजीरेरू बुटा पन फल तौपणा ऐईंता, पण आज तेईनी ऐस पन फल ना मैऐ। ऐठणीरै तेईनी ऐस बढि सुट, ऐनि ऐहियें बेकार मझ बधिया जगा रौकि रखौरी आ, ऐसेरी जगाय कोई होरू बुट ला छडतै। 8पेहरेदारै मालका सिंउ बौलु, हे मालिक! अक साल ऐस बुटा होरू रींहणा दै, आंउ ऐसनि थोड़ी खाद बगैरा सुटता जां जरा ऐसेरी अच्छी तराहि सिंउ देखभाल काता। 9अगर अगलै साला बि ऐस पनि फल ना लगै ता मूं ऐ बढि दींणु।”
आरामेरी धियाड़ि कुबड़ि जनांनि ठीक कांनी
10अक बारी यीशु आरामेरी धियाड़ि एकि यहूदी सभा घरा मझ उपदेश काता थ्या। 11तैन्हैं तैठि अक जनानि तकाय, जै अठाहरा साला किना दुष्टआत्माय अपंग करि रखौरी थी, सै जनांनि कुबड़ि थी जां सै सिधि खड़ी ना भौ सकींथी। 12यीशु तैस तका करि सै ऐपु किनि शदाय जां बौलु, “हे नारी! तु अपड़ि ऐस बिमारी किना ठीक भौ गैई!” 13तां तेनी तेसै पन हत्थ रखा, जां सै इकदम सिद्धि खड़ी भौ गैई जां परमेश्वरेरी बडियेई कांना लगी। 14ऐठणीरै तेईनी कि यीशु सै आरामेरी धियाड़ी ठीक क्यौरी थी, तां यहूदी सभा घरैरा सरदार यीशु पनि गुस्सै भौ ग्या जां मैहणुवां सिंउ बोलणा लगा, हफ्तेरी छी धियाड़ि भूंती जैन्हां मझ असुनि कंम कांनेरी अनुमति भूंती, जां तैन्हांं धियाड़िया मझ अईछी करि ठीक भूंणु चेहिंथु, पण आरामेरी धियड़ि ना। 15ऐक्यु शुणि करि प्रभु यीशु उत्तर दिता, “हे कवटियो! क्या तुवे सभ आरामेरी धियाड़ि अपड़ै दाँदा या गधा खुन्डा किना खोलि करि पांणी पिवांणनि ना नींतै? 16ऐ जनानि ता अब्राहमेरै वंशा किना आ, जै अठाहरा साला किना शैतानेरै वशा मझ थी, क्या ऐकेई आरामेरी धियाड़ी तैस किना मुक्त कांनी जरूरी ना थी?” 17जेख्णी यीशु ऐकेई गलै बोलि ता, यीशुरा विरोध कांनारै सारै मैहणु शर्मिन्दा भौ ग्यै, जां सारी भीड़ तेसेरै महान कम तका करि जै सै करींथ्या खुशी मंनाणा लगै।
राईरै दांणैरा उदाहरण
(मत्ती 13:31-33; मरकुस. 4:30-32)
18फिरी यीशु बौलु, “परमेश्वरैरा राज्य कोस सैयि आ? जां आंउ ऐसेरी तुलना कोस सिंउ करूं? 19परमेश्वरैरा राज्य तैस पट्टि मझ बाउरू राईरू दांणा सैयि आ; सै मोटी करि बुट बंणी गांहथु, जां सुरगेरै सारै पंछी अईछी करि तैसेरिया डाईया पन बेशतै जां गुल्है बणांईथ्यै।”
खमीरैरा उदाहरण
20यीशु फिरी बौलु, परमेश्वरैरा राज्य कोस सैयि आ? जां आंउ ऐसेरी तुलना कोस सिंउ करूं? 21“स्वर्गेरा राज्य खमीरेरै समान आ, जै कुनिक्यै जनेनी लै करि दश किलो आटु मझ मिला दिता जां थोड़ी हांणी बाद सै सारू आटु मझ फैलता।”
हिटु दुवार
22यीशु अपड़ा चैला सेईतै नगरा-नगरा, ग्राँ-ग्राँ भौ करि उपदेश काता यरूशलेम शहरा धेरै गांहथा थ्या, 23ता कुनिक्यै तैस किना पुच्छु, “हे प्रभु! क्या परमेश्वरा थोड़ा मैहणुवां केरा बचाव कांना?” तां यीशु तैन्हांं सिंउ बौलु, 24परमेश्वरेरै राज्य मझ हिटु दुवारै बत्तै गांहणु मुशिकल आ, केईनी कि आंउ तुहां सिंउ बोलता कि बड़ा सारा मैहणुवां गांहणैरी कोशिश कांनी, पण तैन्हेरै बोलै अंदर ना गहियूंणु। 25जेख्णी परमेश्वर जै घरैरा मालिक आ उठिकरि दुवार बंद करि दिया, जां तुवे भेईर खड़ै भौ करि दुवार खड़का करि विनती करेलै, हे प्रभु! असेड़ै तेईनी दुवार खौल। पण तैस तुहांनि बोलणु, आंउ तुहां ना जांणता, तुवे कोठां यौउरै अत्तै? 26तां तुहां बोलणु, असै ताउ सेईतै बेशि करि रोटी खई जां तीं असेड़ै बजारा मझ उपदेश केया। 27पण तैस बोलणु, आंउ तुहां सिंउ बोलता, आंउ तुहां ना जांणता तुवे कोठां किना अत्तै। “हे अधर्म कांनारो! तुवे सभ मूं किना चलि गहा। 28तैठि रूंणु जां दंत चापणै भूणै, जेख्णी तुवे अपड़ै पूर्वजा अब्राहम जां इसहाक जां याकूब जां सभ भविष्यवक्तै परमेश्वरेरै राज्य मझ बेठोरै तंकाणै, जां अपड़ै आपा भेईर कढौरै तकालै, 29फिरी पूरब जां पश्चिम; उत्तर जां दक्षिण किना सारै संसारेरै मैहणु अईछी करि परमेश्वरेरै राज्यरी धामि मझ शामिल भूंणै। 30जां तका, जै अपड़ै आपानि महान समझतै सै तुच्छ भूंणै, जां जैस मैहणु तुच्छ समझतै सैक्यै महान भूंणै।”
हेरोदेसेरी दुशमणी
31तेसै टैंमा कुछ फरीसियै अईछी करि यीशु सिंउ बौलु, “ऐठां किना निकोहि करि चलि गा, केईनी कि राजा हेरोदेस ताउ मारी छडणा चांहथा।” 32यीशु तैन्हांं सिंउ बौलु, गहि करि तैस गिदड़ा सैयि दुष्ट मैहणु सिंउ बोलि दै, कि तका आंउ आज जां दोत्तीं बुरी आत्माईया कढ़ता जां बिमार मैहणुवां ठीक काता, जां त्रीं धियाड़ि मूं अपड़ा कम पूरा करि लींणा। 33तां बि मूं आज जां दोत्तीं जा परशुईं अपड़ि बत्तै मझ चलणु जरूरी आ, केईनी कि परमेश्वरैरा भविष्यवक्ता सिर्फ यरूशलेम शहरा मझ ऐ मारियूंणा।
यरूशलेमेरै तेईनी विलाप
34हे यरूशलेम शहरेरै मैहणुवो! “जै तु अपड़ा भविष्यवक्ता केरा जै बड़ै पेहिलै थ्यै खून कातै, जां परमेश्वरैरा संदेश भेईजणै वा पन घौड़ बजतै! केत्थरी बारी मीं चाहु कि जिहीं कुखड़ि अपड़ै बच्चा अपड़ै पंखा हैट किठैति, तिहियें आंउ बि तिंडा बच्चा किट्ठा करूं, पण तीं ऐहीं ना चाहु। 35तका, तुवाड़ु घर तुवाड़ै तेईनी उजाड़ छड़तै, जां आंउ तुहां सिंउ बोलता, तुवे मूं अगली बारी तेख्णी तकालै जेख्णी तुवे बोलेलै, ‘धन्य आ सै जै परमेश्वरैरा नाँ लै करि ऐईंता।’ ”
Currently Selected:
लूका 13: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
