लूका 11
11
चैलानि प्रार्थना कांनी शिख्रांणी
(मत्ती 6:9-15)
1अक धियाड़ि यीशु एकि जगाय प्रार्थना काता थ्या। जेख्णी यीशु प्रार्थना काता थ्या, ता तेसेरै चैलै मझांं एकि चैलै बौलु, “हे प्रभु! जिहीं-चारै यूहन्ने अपड़ै चैलैनि प्रार्थना कांनी शिख्राय तिहियें तु बि असुनि शिख्राय दै।” 2तां यीशु अपड़ा चैला सिंउ बौलु, “जेख्णी तुवे प्रार्थना करा ता ऐहीं बौला: ‘हे असेड़ै पिता! तु जै स्वर्गा मझ आ तिंडु नाँ पवित्र मनियो तिंडा राज्य ऐईछिया 3असुनि हर धियाड़िरी रोटी खांणिनी दियां कर 4जां असेड़ै पाप माफ कर केईनी कि असै बि अपड़ै अपराधियनि माफ कातै जै असेड़ै विरूद्ध पाप कातै जां असु परीक्षाय मझ मेईं लैई।’ ”
प्रार्थनायरै बारै मझ यीशुरी शिक्षा
(मत्ती 7:7-11)
5फिरी तेनी तैन्हांं सिंउ बौलु, “मनि ल्या कि तुहां मझ कौअधि राती अपड़ै मित्रा किनि गहि करि बोलिया ‘मित्र मूंनी त्रा रोटी उधारा दै। 6केईनी कि मिन्डा अक मित्र सफर काता मिंडै ऐड़ि पुजौरा आ, तेसनी खंलाणनि मूं किनि किछ बि ना।’ 7जां सै घरा अंदरा किना बोलता, ‘मूंनी दुख मेईं दैई अबै ता मीं दुवार बि बंद करि छडोरू आ जां मिंडै बच्चै मूं किनि बिछांणा मझ झुलोरै अत्तै, ऐठणीरै तेईनी आंउ तांउनि उठिकरि किछ ना दी सकता?’ 8आंउ तुहां सिंउ बोलता अगर सैकिया मैहणु तेसैरा मित्र भौ करि बि तेसनी उठिकरि ना दिया, तां बि सै बिशर्म भौ करि मगिया ता तैस तांउनि ज्यौति जरूरत भुई खड़ै भौ करि दींणु। 9ऐठणीरै तेईनी आंउ तुहां सिंउ बोलता; कि परमेश्वरा किना मग्गा, ता तुहांनि दींणु, परमेश्वरा तौपा ता सै तुहांनि मेईंणा, द्वार खड़का ता तुवाड़ै तेईनी द्वार खोलियूंणु। 10केईनी कि जै कौ परमेश्वरा किना मगता, सै तेसनी दींता, जां जै तैस तौपता तेसनी सै मेईं गांहथा, जां जै द्वार खटखटांता तेसेरै तेईनी द्वार खोली गांहणु, 11तुहां मझ ऐतिया केणु बब भूंणा, कि तेसैरा पुत्र रोटी मगिया ता सै तेसनी घौड़ दिया, या मछली मगिया ता तेसेरै बदलै कीड़ा दिया? 12या अंढ़ेरू मगिया ता बिच्छु दिया? 13तुवे बुरै भौ करि अपड़ै छोकरूवनी अच्छी चीजै दींणा जांणतै ता स्वर्गेरा पिता अपड़ै मगणारानि पवित्र आत्मा किना दैला।”
यीशु जां शैतान
(मत्ती 12:22-30; मरकुस. 3:20-27)
14फिरी यीशु एकि मैहणु मझांं गुंगी बुरी आत्मा कढी; जेख्णी बुरी आत्मा तैस मझांं निकोहि गैई ता गुंगा मैहणु बिचाना लगा जां सारै मैहणु हैरान भौ ग्यै। 15पण तैन्हांं मझांं किछ मैहणु बोलणा लगै, “ऐता बुरी आत्माईया केरै सरदारा शैतानेरी मजति ला मैहणुवां मझांं बुरी आत्माय कढ़ता।” 16होरनियें तैस परखणेरै तेईनी तैस किना सुरगैरा अक चिन्ह मगा।
17पण तेनी तेन्हैरै मंनेरी गल समझि लैई जां तैन्हांं सिंउ बौलु, अगर एकि देशेरै मैहणु योकिया मझ झगड़ीयूंतै रींहथै, ता सै दैश उजड़ि गांहथा। जां जैस घरेरै मैहणु योकिया मझ ना बंणतै सै घर तबाह भौ गांहथु। 18जां अगर शैतान अपड़ै भूता केरै विरोधा मझ भिड़ियो, ता तेसैरू राज ऐपुवै खत्म भौ गांहणु, केईनी कि तुवे मिंडै बारै मझ ता बोलतै अत्तै कि आंउ शैतानेरी मजति ला बुरी आत्माईया कढ़ता। 19जां अगर ऐ सच आ कि आंउ शैतानेरी मजति ला बुरी आत्माईया कढता, ता तुवाड़ै बच्चै कोसेरी मजति ला बुरी आत्माईया कढतै? ऐठणीरै तेईनी तुवाड़ा बच्चा तुवाड़ा न्याय कांना। 20पण अगर आंउ परमेश्वरेरी आत्मायरी शक्ति ला बुरी आत्माय कढता, ऐनि ला ऐ साबित भूंतु कि परमेश्वरैरा राज्य तुहां नीड़ अईछी गियौरा।
21जेख्णी शक्तिशाली मैहणु हथियार लै करि घरैरा पेहरा दींता ता तेसैरी धन-दौलत कौ ना चोरी सकता। 22पण जेख्णी तैस किना कौ जादा शक्तिशाली मैहणु तैस पकड़ी करि बंन्ही लींता जां तेसेरै हथियार हरि लींता जैन्हां पन तैस विश्वास भूंता तां सै तेसैरू घर आराम सिंउ लुटि सकता। 23जै मूं सेईतै ना सै मिंडै विरोधा मझ आ, जै मूं सेईतै बटौता ना सै उशारी छडता।
अधै सुधारै ला विपत्ति
(मत्ती 12:43-45)
24“जेख्णी बुरी आत्मा मैहणु किना निकोहि गांहथी ता सै थाकि कांनेरै तेईनी निराई जगा तोपती, जां जेख्णी तैस जगा ना मेईंती ता बोलती, मूं अबै अपड़ै तेसै मैहणु मझ चलि गांहणु जैस मैहणु किना निकौरी थी। 25जां जेठां किना यौउरी आ तैस मैहणुरी जिन्दगी सै तैस घरा सैयि तकांती, जै साफ-सुथरू क्यौरू थियु। 26तां सै ऐईंती जां ऐपु सेईतै होरनियां सत्ता बुरी आत्माईया लै ऐईंती जां अईछी करि तैस मैहणु मझ चलि गांहथी जां तैस मैहणुरी हालत, जै तेसैरी हालत पेहिलै भूंती तेठां किना बि जादा माड़ी भौ गांहथी।” 27जेख्णी यीशु ऐन्हां गला बोलता थ्या, ता मैहणुवां केरी भीड़ि मझांं अक जनांनि जौरै-जौरै बोलणा लगी, “धन्य आ सै जनानि जेनि ताउनि जन्म दित्ता, जां जेसैरू तीं दुध पित्तु।” 28तेनी बौलु, “हाँ; पण धन्य अत्तै सै जै परमेश्वरैरा वचन शुणतै जां तेसैरा पालन कातै।”
सुरगेरै चिन्हेरी मांग
(मत्ती 12:38-42; मरकुस. 8:12)
29जेख्णी मैहणुवां केरी भीड़ किट्ठी भूंती गैई ता सै बोलणा लगा, “ऐस युगेरै मैहणु बुरै अत्तै; सै चिन्ह तोपतै, पण योना भविष्यवक्तेरै चिन्हां छडि करि होरा कोई चिन्ह तेन्हांनि ना दियूंणा। 30जिहीं परमेश्वरेरी तरफि सिंउ भविष्यवक्ता योना नीनवे नगरेरै मैहणुवां केरै तेईनी अक चिन्ह ठहराईया, तिहियें आंउ मैहणुरा पुत्र बि इस युगैरै मैहणुवां केरै तेईनी अक चिन्ह आ। 31दक्षिणेरी राणीं न्याएरी धियाड़ी इस टैंमेरै मैहणुवां सेईतै खड़ी भौ करि, सैक्यै दोषी ठहरांणै, केईनी कि सै राजै सुलेमानैरा ज्ञान शुणनेरै तेईनी बड़ै दूरां किना यैई, जां तका, ऐठि सै आ जै राजै सुलेमाना किना बि बडा आ। 32नीनवे नगरेरै मैहणु न्याएरी धियाड़ी ऐस टैंमेरै मैहणुवां सेईतै खड़ै भौ करि, सैक्यै मैहणु दोषी ठेहरांणै, केईनी कि तैन्हैं भविष्यवक्ता योनैरा प्रचार शुणि करि पापा किना मंन फैरा, जां तका ऐठि सै आ जै योना भविष्यवक्ता किना बि बडा आ फिरी बि तैन्हैं मंन ना फैरा।
शरीरैरा दीया
(मत्ती 5:15; 6:22-23)
33कोई मैहणु दीया जाई करि तैस टोकरी हैट या मंजै हैट ना रखता, पण दीउंटा पन रखता कि अंदर ऐईंणारा मैहणुवंनी प्रगड़ु भुईया। 34तुवाड़ु टीर तुवाड़ै शरीरेरै तेईनी एकि दीयै सैयि आ, केईनी कि ऐ तुहां हर चीज तकाणेरै काबिल बणातु, अगर तु चीजै तिहियें तका सकता जिहीं परमेश्वर तका सकता, ता तुवाड़ा सारा शरीर बि ठीक ढंग सिंउ कम करैला। 35ऐठणीरै तेईनी याद रखा कि जै प्रगड़ु तुहां मझ आ सै अंधारू ना भौ गहिया। 36ऐठणीरै तेईनी अगर तिंडा सारा शरीर उजियाला भुईया जां ऐसेरा कौ भाग अंधारा ना रिय्हा, सारैरा सारा ऐतिया उजियाला भूंणा, जेतियु तैस टैंमा भूंतु जेख्णी दीया ऐपड़ि चमकी ला ताउनि उजियाला दींता।”
शास्त्रिया जां फरीसियानि धिक्कार
(मत्ती 23:1-36; मरकुस. 12:38-40; लूका 20:45-47)
37जेख्णी सै गलै काता थ्या कि एकि फरीसी मैहणु तैस सिंउ विनती की, कि असेड़ै इदि रोटी खांणा आ, जां सै अंदर गहि करि रोटी खांणा लगा। 38फिरी फरीसी मैहणु ऐ तका करि हैरान भौ ग्या कि यीशु रोटी खांणा किना पेहिलै यहूदी रिवाजेरै मुताबिक हत्थ-पैयिड़ ना धोतै। 39प्रभु यीशु तैस सिंउ बौलु, “हे फरीसी मैहणुवो, तुवे अपड़ै आपानि धर्मी बणांतै पण तुवाड़ा मंन अंदरा किना लालचै जां दुष्टताय ला भरौरा।” 40“हे निर्बुद्धियो! जेनि भेईरियां भाग बंणाउरा आ, क्या अंदरियां भाग बि तेनिऐ ना बणाउरा?” 41ऐठणीरै तेईनी जै किछ मंना अंदर आ तैस दीन मैहणुवंनी दै देया फिरी तिंडै तेईनी सभ किछ पवित्र भौ गांहणु।
42“हे फरीसियो धिक्कार आ तुहां मैहणुवां पनि! तुवे अपड़ि हल्की किना हल्की कमाईरा यानि सोंफ, जीरा जां पुदीनेरा जां शाग-पातैरा दशुवां हैसा दींणा ना भुलतै, पण तुवे न्याय जां परमेश्वरैरा प्रेम भुलि गांहथै। ऐ ठीक आ कि तुवे अपड़ि कमाईरा दशुवां हैसा दींतै, पण जै ऐत किना बि जरूरी गल आ तुवे तैस कांना मेईं भुला। 43हे फरीसियो धिक्कार आ तुहां मैहणुवां पनि! केईनी कि तुवे यहूदी सभा घरा मझ बधिया-बधिया कुर्सी तोपतै जां बजारा मझ मैहणुवां किना इज्जती सिंउ नमस्ते करांणा चांहथै। 44धिक्कार आ तुहां मैहणुवां पनि! केईनी कि तुवे तैन्हांं छपोरिया कब्रिया सैयि अत्तै, जै लाधी ना ऐईंती जां मैहणु तैन्हांं पन चलतै पण सै ना जांणतै कि थल्लै कब्रि अत्ति।”
45तां एकि व्यवस्थापकै तेसनी उत्तर दिता, “हे गुरू! ऐकेई गलै बोलि तु असेड़ि बि निंदा काता आ।” 46यीशु बौलु, “हे व्यवस्थापको, धिक्कार आ तुहां मैहणुवां पनि! केईनी कि तुवे मैहणुवां पन बड़ै नियम लागु कातै जैन्हैरा पालन कांना कठिन आ, सैक्यै मैहणुवां तैन्हांं पनि चलणनी मजबूर कातै; पण तुवे ऐपु तैन्हांं नियमा पनि ना चलतै।” 47हे कवटी शास्त्रियो जां फरीसियो तुहां पन धिक्कार आ! तुवे भविष्यवक्ता केरै तेईनी जै तुवाड़ै पूर्वजै बड़ै पेहिलै मारी छडोरै थ्यै तैन्हेरी कब्रि बणांतै अत्तै। 48ऐनि तराहि तुवे अपड़ै पूर्वजा केरै कुकर्मा केरी गवाहि दींतै अत्तै जां तेन्हैरै कंमा सही साबित कातै। केईनी कि तैन्हैं सै मारी दितोरै थ्यै, जां तुवे तेन्हैरी कब्रि बणांतै। 49परमेश्वरै अपड़ि बुद्धी ला ऐहीं बौलु, मूं तैन्हांं किनि भविष्यवक्तै जां खास चैलै भेईजणै, पण तैन्हांं-तैन्हांं मझांं किछ मारी छडणै, जां किछ सतांणै। 50ताकि जैत्थरा बि भविष्यवक्ता केरा खून संसारेरी शुरूवाति किना बहायोरा आ, तैन्हांं सभनियांं केरा लेखा-जोखा इस युगेरै मैहणुवां किना लियूंणा। 51धर्मी हाबिलेरै खूना किना लै करि बिरिक्याहेरै पुत्रा भविष्यवक्ता जकरयाहेरै खूना तेईनी, जै तुहैं मैहणुवें मंदरा जां वेदिरै बिच मारी छडौरा थ्या, आंउ तुहां सिंउ सच बोलता आ कि तेन्हैरा लेखा-जोखा इस युगेरै मैहणुवां किना लियूंणा। 52हे कवटी शास्त्रियो जां फरीसियो तुहांनि धिक्कार आ! केईनी कि स्वर्गनि गांहणेरी बत्तैरा पता थ्या, पण तुवे अपुवै तेनी बत्तै ना चलै, जां होरै मैहणु बि तेसै बत्तै गांहणा किना रौकै। 53यीशु जेख्णी अपड़ि गलै बोलि बेठा, ता शास्त्री जां फरीसी तेसेरी ऐस गलै पन बड़ै निराज भुवै। तेसै टैंमा तैन्हैं यीशु किना बड़ै-सारै सवाल पुच्छै, 54जां सै ऐस गलेरी ताकि मझ बेठै, कि तेसेरै मुहां किना बोलोरी कौ गल पकड़िया।
Currently Selected:
लूका 11: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
