यहुन्ना 6
6
पंजा हजारा मैहणुवंनी रोटी खलांणी
(मत्ती 14:13-21; मरकुस. 6:30-44; लूका 9:10-17)
1ऐत किना बाद यीशु गलील झीलि, मतलब तिबिरियास झीलिरै पार चलि ग्या। 2अक मैहणुवां केरी बड़ी-बडी भीड़ यीशु पिचोरै चलि, केईनी कि तैन्हांं मैहणुवां सै चमत्कारै बाऐ कम तकाउरै थ्यै, जै चमत्कार यीशु बिमार मैहणुवां पन क्यौरै थ्यै। 3यीशु पहाड़ा पन ग्या जां अपड़ा चैला सिंउ वेशि ग्या। 4यहूदिया केरा फसहैरा त्यौव्हार नीड़ थ्या।
5यीशु टीरै खड़ै करि तकाउ ता तेनी अक मैहणुवां केरी बड़ी-बडी भीड़ तकाय, तां यीशु फिलिप्पुसा सिंउ बौलु, “असुवां ऐन्हैरै तेईनी रोटी कोठां खरीदणी।” 6यीशु ऐ गल फिलिप्पुसा परखणेरै तेईनी बोलथी। यीशु ता पता थ्या कि तैन्हांं कितु कांनु आ। 7फिलिप्पुसै यीशु सिंउ बौलु, “दुवां शाउवा चाँदिरै सिक्का केरी बि योउती रोटी ना ऐईंणी कि सभनियांंनि थोड़ी-थोड़ी दी करि पुरी गहिया।” 8यीशुरै चैलै मझां एकि शमौन पतरसेरै भाई अन्द्रियासै बौलु, 9“ऐड़ि अक छोकरू आ, जैस किनि पंज रोटी जां दो मछली अत्ति, पण ऐत्थरा मैहणुवंनी ऐ किछ बि नति।” 10तां यीशु बौलु, मैहणुवां बिशाय देया, तैस जगाय बड़ु घाह थियु, मैहणु गहा पन बेशि ग्यै जै कि लगभग पंज हजार मड़द थ्यै। 11तां यीशु रोटी लै लेई जां परमेश्वरैरा धन्यवाद करि-करि बेठौरा मैहणुवां मझ बंडि दित्ती; तिहियें मछली बि जिहीं सै चांहथै थ्यै, बंडि दित्ती। 12जेख्णी सारै मैहणु खा करि रजि ग्यै, ता यीशु अपड़ा चैला सिंउ बौलु, “जै बचि गियोरै टुकड़ै अत्तै तैन्हांं बटौय ल्या, कि कौ बि रोटी ऐहियें बर्बाद ना भुईया।” 13ता तैन्हैं चैलै सै रोटी बटौई लेई, जां मैहणुवां रोटी खांणा किना बाद जै पंजा रोटिया किना बचोरी थी, तैन्हैं टुकड़ै ला बाराह खारी भरी लेई। 14मैहणु यीशुरा ऐ चमत्कारै वा कम तका करि बोलणा लगै, पक्का ऐ सैहै भविष्यवक्ता आ जै संसारा मझ ऐईंणार थ्या।
15जेख्णी यीशु तकाउ कि मैहणु अईछी करि तैस राजा बंणाणेरै तेईनी पकड़ना चांहथै अत्तै, ता सै अकैला ऐ पहाड़ा पनि चलि ग्या।
यीशुरू पांणी पण चलणु
(मत्ती 14:22-27)
16संन्हैरा भुआ तां यीशुरै चैलै झीलिरै किनारै पन यै। 17जां किश्ती मझ बेशि करि कफरनहूम नगरा धेरै झील लंघथै थ्यै, सै टैंम रातिरा थ्या जां हालै-तेईनी यीशु तैन्हांं किनि ना थ्या यौउरा। 18तां अजागै झीलि मझ तूफानेरी छालि ऐईंणा लगी, केईनी कि हवा बड़ी तैज चलोरी थी। 19लगभग पंज-छी किलोमीटर किश्ती चलांणा किना बाद चैलै तकाउ कि यीशु झीलि पन हँठि करि किश्ती नीड़ आ ऐईंता। तां सै डरि ग्या। 20पण यीशु तैन्हांं सिंउ बौलु, “डरा मेईं आंउ आ।” 21सै यीशु किश्ती पन चाढ़नै बाऐ थ्यै कि झट सै किश्ती तैठि किनारै पुजि गैई जेठिनी सै गांहथै थ्यै।
मैहणु यीशु तौपणा लगै
22जै मैहणु झीलिरै होरै पासै रेय्ही गियोरै थ्यै, तैन्हैं होरी धियाड़ि तकाउ कि तैठि सिर्फ अकै किश्ती थी जां यीशु अपड़ा चैला सेईतै तैस किश्ती मझ ना थ्या गियौरा, तेसेरै चैलै अकेलै गियोरै थ्यै। 23तां तिबिरियास नगरा किना किछ होरी किश्ती तैस जगायनी येई, जेठि प्रभु यीशु मसीह धन्यवाद करि-करि प्रार्थना किना बाद रोटी खईथी। 24जेख्णी मैहणुवें तकाउ कि तैठि ना ता यीशु आ, ना तेसेरै चैलै, ता सै मैहणु बि किश्तिया पण चढ़ै जां यीशु तोपतै कफरनहूम नगरा धेरै चलि ग्यै।
यीशु जीवनेरी रोटी आ
25तैन्हांं मैहणुवां झीलि पार गहि करि यीशु मैआ जां तैन्हैं यीशु सिंउ बौलु, “हे गुरू! तु ऐठि केख्णी या?” 26यीशु तेन्हांनि बौलु, “आंउ तुहां सिंउ सच-सच बोलता; तुवे मूं ऐठणीरै तेईनी नत्तै तोपतै कि तुहैं मिंडै चमत्कारै बाऐ कम तकाय, पण तुवे ऐठणीरै तेईनी तोपतै अत्तै कि तुहैं पैट भरी करि रज्जी रोटी खाउरी अत्ति। 27तैन्हांं रोटिया केरै तेईनी मैहनत मेईं करा जै अक धियाड़ि शड़ि गांहणी, पण तैन्हांं रोटिया केरै तेईनी मैहनत करा जेनि ला अनन्त जीवन मेईंता, जै रोटी मैहणुरै पुत्रा मतलब मूं दींणी; केईनी कि पिता परमेश्वरै मूंनी ऐ हक दितौरा।” 28मैहणुवें यीशु किना पुच्छु, कि “परमेश्वरेरै कम कांनेरै तेईनी असु कितु कांनु चेहिंथु?” 29यीशु तेन्हांनि उत्तर दिता, “परमेश्वरेरी ऐ मर्जी आ कि जै तेनी भेईजौरा, तैस पन तुवे विश्वास करा।” 30तां मैहणुवें तैन्हांं सिंउ बौलु, “तुवे असुनि केणु त्या चिन्ह लुहाय सकतै, जैस तका करि असै ताउ पन विश्वास करि लिया।” 31असेड़ै पूर्वजै रेगिस्थाना मझ मन्ना खाउरा थ्या, जिहीं पवित्र शास्त्रा मझ बि लिखोरू आ; मूसै तेन्हांनि खांणेरै तेईनी स्वर्गा किना रोटी दित्ती। 32यीशु तेन्हांनि बौलु, “आंउ तुहां सिंउ सच-सच बोलता कि मूसै तुहांनि सै रोटी स्वर्गा किना ना दित्ती, पण मिंडा पिता परमेश्वर सै सच्ची रोटी स्वर्गा किना दींता। 33केईनी कि परमेश्वरेरी दितोरी रोटी सै आ, जै स्वर्गा किना उतरि करि संसारैरा मैहणुवंनी जीवन दींति।”
34मैहणुवें यीशु सिंउ बौलु, “हे प्रभु! असुनि हमेशा ऐसै रोटी दियां कर।” 35यीशु उत्तर दित्ता, “अनन्त जीवन दींणै बाई रोटी आंउ आ, जै मूं किनि ऐईंता सै कदि भ्रुख्णां ना रींहणा, जै मूं पन विश्वास काता, तेसनी कदि त्रिश ना लगणी। 36पण फिरी बि जिहीं कि मीं तुहां सिंउ बोलोरू थियु, कि तुवे मूं तका करि बि मूं पन विश्वास ना कातै। 37जै मैहणु पिता परमेश्वरै मूनी दितोरै अत्तै, सै सभ मैहणु मूं ऐ किनि ऐईंणै जां जै कोई मैहणु मूं किनि ऐईला सै मूं कदि ना छडणा। 38केईनी कि आंउ स्वर्गा किना ऐठणीरै तेईनी ना या कि अपड़ि मर्जी पूरी करूं, पण आंउ ऐठणीरै तेईनी यौउरा कि अपड़ै भेईजणै बाऐ परमेश्वरेरी मर्जी पूरी करूं। 39जां मूं भेईजणै बाऐ परमेश्वरेरी मर्जी ऐ आ कि जै किछ तेनी मूंनी दितोरू आ कि तैस सारू आंउ संभाय करि रखूँ, जां मूं सै सभ मैहणु फैसलेरी धियाड़ि दुबारे जींतै कांने। 40केईनी कि मिंडै पिता परमेश्वरेरी मर्जी ऐ आ कि जै कौ मैहणु मूं तका करि मूं पन विश्वास करैला तेसनी अनन्त जीवन मेईंणा; जां मूं सै फैसलेरी धियाड़ि दुबारे जींतैरी दींणा।”
41ऐठणीरै तेईनी यहूदी अगुवे यीशु पन बड़बणांणा लगै, केईनी कि तेनी बोलोरू थियु, कि “जै रोटी स्वर्गा किना उत्तरोरि आ, सै आंउ आ।” 42जां तेनी बौलु, “क्या ऐक्या यूसुफेरा पुत्र यीशु ना, जेसेरै मयि-बबा असै जांणतै? ता सै अबै किहीं बोलि सकता कि आंउ स्वर्गा किना यौउरा?”
43यीशु तेसनी उत्तर दिता, “योकिया मझ मेईं बड़बड़ा। 44जेनि पिता परमेश्वरै आंउ भेईजौरा, ज्यो तेईनी तेसैरी मर्जी ना भुईया त्यो-तेईनी मूं किनि कौ बि ना अईछी सकता जां जै मूं किनि ऐईला सै मूं फैसलेरी धियाड़ि फिरी दुबारे मौरा मझां जींतैरी करि खड़ा कांना। 45भविष्यवक्ता केरिया किताबिया मझ ऐ लिखोरू आ कि, सै सारै परमेश्वरेरै शिख्राउरै भूंणै। जेनि बि पिता परमेश्वरा किना शुणु जां शिख्रु सै मूं किनि ऐईंता। 46कुनि बि पिता परमेश्वर ना लधौरा, आंउ अकैला जै पिता परमेश्वरै भेईजौरा जां मीं सै तकाउरा। 47आंउ तुहां सिंउ सच-सच बोलता कि जै कौ विश्वास काता अनन्त जीवन तेसैरा। 48अनन्त जीवन दींणै बाई रोटी आंउ आ। 49तुवाड़ै वुजुर्गै बंणा मझ मन्ना खा जां सै मरि गियोरै अत्तै। 50आंउ ऐ स्वर्गा किना उतरोरी रोटी आ जै ऐस रोटी खाला सै कदि ना मरना। 51जीवनेरी रोटी जै स्वर्गा किना उतरोरी आ सै आंउ आ, जै कौ ऐसै रोटी खाला ता सै हमेशा जींता रींहणा; जां जै रोटी मूं संसारेरै मैहणुवां केरै जीवनेरै तेईनी दींणी सै मिंडा शरीर आ।”
52ऐत पन यहूदी अगुवे योकिया मझ बहस करि बोलणा लगै कि, “ऐ मैहणु किहीं असुनि खांणेरै तेईनी अपड़ा शरीर दी सकता?” 53फिरी यीशु तैन्हांं सिंउ बौलु, “आंउ तुहां सिंउ सच-सच बोलता कि ज्यो-तेईनी तुवे मैहणुरै पुत्रैरा मतलब मिंडा शरीर ना खालै जां मिंडा खून ना पीलै त्यो-तेईनी तुहां मझ अनन्त जीवन ना भूंणा। 54जै मिंडा शरीर खांता जां मिंडा खून पींता, अनन्त जीवन तेसैरा ऐ आ; जां फैसलेरी धियाड़ि मूं सै मौरा मझां दुबारे जींतैरी करि खड़ै कांने। 55केईनी कि मिंडा शरीर सच्ची रोटी आ जां मिंडा खून सच मझ पींणैरी चीज आ। 56जै मिंडा शरीर खांता जां मिंडा खून पींता, सै मूं मझ रींहथा, जां आंउ तैस मझ रींहथा। 57बिल्कुल तिहियें जिहीं जीवित पिता परमेश्वरै आंउ भेईजौरा जां आंउ पिता परमेश्वरेरी वजहि ला जीवित आ। तिहियें सै बि जै मूं खांता सै मिंडी वजहि ला जींता रींहणा। 58ऐ सैहै रोटी आ जै स्वर्गा किना उतरोरी आ, ऐ रोटी तैस रोटी सैयि ना जै तुवाड़ै पूर्वजै खई जां मरि ग्यै; जै कौ ऐस रोटी खाला सै हमेशा जींता रींहणा।” 59ऐ गलै यीशु कफरनहूम नगरेरै एकि यहूदी सभा घरा मझ प्रचार कातै टैंमा बोलि।
अनन्त जीवनेरै वचन
60ऐठणीरै तेईनी यीशुरै चैलै मझां बड़ै ऐ शुणि करि बौलु, “ऐ शिक्षा ता बड़ी मुश्किल आ, ऐस पन केणु विश्वास करि सकता?” 61यीशु अपड़ै मंना मझ ऐ जांणि करि कि तेसेरै चैला ऐकेई गलै ठीक ना लगी, ऐठणीरै तेईनी यीशु तैन्हांं किना पुच्छु, “क्या तुवे ऐन्हां गला किना परेशान अत्तै? 62जां अगर तुवे मैहणुरै पुत्रा मतलब मूं जेठि आंउ पेहिलै थ्या, दुबारे तैबरै स्वर्गनि गांहथै तकालै ता केतियु भूंणु? 63परमेश्वरैरा आत्मा ता जीवन दींणारा, शरीरा किना कोई फायदा ना; जै गलै मीं तुहांनि बोलोरी अत्ति सै पवित्र आत्मायरी सामर्थी सिंउ बोलियुंति जां सै गलै मैहणुवंनी अनन्त जीवन दींति। 64फिरी बि तुहां मझ किछ मैहणु अत्तै जै मूं पन विश्वास ना कातै।” केईनी कि यीशु पेहिलै किना पता थ्या कि जै विश्वास ना कातै सै केणु अत्तै; जां मूं पकड़वांणै वा केणु आ। 65जां तेनी बौलु, “ऐठणीरै तेईनी मीं तुहां सिंउ बोलोरू थियु कि, त्यो-तेईनी मूं किनि कौ अईछी ना सकता ज्यो-तेईनी पिता परमेश्वर तेसनी मूं किनि ऐईंणैरी इजाजत ना दिया।”
पतरसैरा विश्वास
66ऐनि कारणै यीशुरै बड़ै सारै चैलै पीछै हठि ग्यै जां तैन्हैं यीशुरू साउग छडि दित्तु। 67ऐठणीरै तेईनी यीशु तैन्हांं बाराह चैला सिंउ बौलु, “क्या तुवे बि चलि गांहणा चांहथै अत्तै?” 68शमौन पतरसै तेसनी उत्तर दिता, “हे प्रभु! असु कोस किनि गांहणु? अनन्त जीवन दींणेरी गलै ता ताउ किनि अत्ति। 69जां असै ताउ पन विश्वास क्यौरा जां असु पता कि परमेश्वरैरा पवित्र पुत्र मसीह तुऐ आ।” 70यीशु तेन्हांनि उत्तर दिता, “क्या तुवे बारोह चैलै मीं ऐ नत्तै चुणोरै? तां बि तुहां मझां अक मैहणु शैतानेरै वंशा मझ आ।” 71सै शमौन इस्करियोतिरै पुत्रा यहूदेरै बारै मझ गल काता थ्या केईनी कि सै यीशुरा विरोधी बंणी करि तेसनी धोखा दींणार थ्या, केईनी कि सै बाराह चैला मझां अक थ्या।
Currently Selected:
यहुन्ना 6: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
