यहुन्ना 5
5
अठात्तिया सालैरा रोगी ठीक कांना
1ऐन्हां गला किना कुछ टैंमा बाद यीशु यहूदिया केरै कोसक्यै त्यौव्हारेरै मौकै पन यरूशलेम शहरा ग्या। 2यरूशलेम शहरा मझ भेड़-फाटका किनि अक कुण्ड आ, जेसैरू नाँ इब्रानी भाषाय मझ बैतहसदा आ, तेसेरै पंज बरांडै अत्तै। 3ऐन्हां मझ बड़ै-सारै कांणै, लटै जां अधरंगेरै बिमार मैहणु बेठोरै (जै पांणी हिलणैरा इन्तजार कातै) रिहींथ्यै। 4केईनी कि प्रभुरा दूत टैंमा-टैंमा पन कुंडा मझ उतरि करि पांणी हिलाईंथ्या, पांणी हिलणा किना बाद जै मैहणु सभनियांं पेहिलै तेत मझ उतरींथ्या सै ठीक भौ गहींथ्या, चाहै सै कोई बि बिमारी भुईया। 5तैठि अक मैहणु थ्या जै अठात्तिया साला किना बिमार थ्या। 6यीशु सै तैठि झुलोरा तका जां ऐ पता लगा कि सै बड़ै टैंमा किना ऐड़ि ऐहींयै-चारै बेठौरा। यीशु तैस किना पुच्छु, “क्या तु ठीक भूंणा चांहथा।”
7तेनी बिमार मैहणु यीशु सिंउ बौलु, “हे प्रभु! मिंडा कौ ना, जै पांणी हिलणा पन मूं कुंडा मझ उतारिया, आंउ कुंडा मझ गांहणैरी कोशिश काता ता आ पण मूं पुजणा किना पेहिलै ऐत मझ होरै उतरि गांहथै।”
8यीशु तैस सिंउ बौलु, “उठ! अपड़ु बिछांण चुक जां अपड़ै घरेनी गा।” 9तेसै टैंमा सै मैहणु ठीक भौ ग्या जां अपड़ु बिछांण चुकि करि हँठणा-चलणा लगा। सै आरामेरी धियाड़ि थी। 10जेधियां सै ठीक भुआ तेधियां आरामेरी धियाड़ि थी, ऐठणीरै तेईनी यहूदी अगुवे तेसनी बोलणा लगै, “आज आरामेरी धियाड़ि आ, ऐठणीरै तेईनी बिछांण चुकणु तिंडै तेईनी ठीक ना।” 11तेनी उत्तर दिता, “जेनि आंउ ठीक केया, तेनी मूंनी बौलु, अपड़ु बिछांण चुक जां चल फिर?” तैन्हैं तैस किना पुच्छु, सै केणु आ, जेनि ताउ सिंउ बौलु, 12तैन्हैं तैस किना पुच्छु, “सै केणु आ, जेनि ताउ सिंउ बौलु, अपड़ु बिछांण चुक जां चल फिर?” 13पण सै ठीक भौरा मैहणु ना जांणीथ्या कि सै केणु आ, केईनी कि तैस जगाय मैहणुवां केरी बड़ी भीड़ भूंणेरै कारण यीशु तेठां चलि गहींथ्या। 14कुछ टैंमा बाद यीशुनि सै मंदरेरै आंगणा मझ मैआ। यीशु तैस सिंउ बौलु, “तका, तु ठीक भौ ग्या, फिरी दुबारे तु पाप मेईं काता। नता किहींक्यै ऐहीं ना भुईया कि ताउ पन ऐठां बि बडा कौ संकट पुईया।”
15तेनी मैहणु गहि करि यहूदी अगवो सेईतै बोलि दित्तु कि जेनि आंउ ठीक क्यौरा सै यीशु आ। 16यहूदी अगुवे ऐठणीरै तेईनी यीशु संताणा लगै केईनी कि सै ऐतियै कम आरामेरी धियाड़ि करींथ्या। 17यीशु तेन्हांनि ऐ बौलु, मिंडा पिता परमेश्वर हालै-तेईनी कम काता जां आंउ बि लगातार कम काता। 18केईनी कि यीशु ऐ गल बोलि ता यहूदी अगुवे तैस मांनेरै तेईनी मौका तौपणा लगै केईनी कि सै सिर्फ आरामेरी धियाड़िया केरै नियमा ना त्रोणींथ्या पण परमेश्वरा अपड़ा पिता शुणा करि ऐपु बि परमेश्वरा समान शुणाईंथ्या।
पुत्रैरा अधिकार
19ऐत पन यीशु तैन्हांं यहूदी अगुवो सिंउ बौलु, आंउ तुहां सिंउ सच-सच बोलता, पुत्र मतलब आंउ ऐपुवै अकैला किछ ना करि सकता, सै सिर्फ सैहै करि सकता जै पिता कातै तकांता, केईनी कि जै-जै कम पिता काता सै कम आंउ बि काता। 20केईनी कि पिता परमेश्वर मूं सिंउ प्रेम काता, केईनी कि जै कम सै काता सै मूंनी बि लुहाता, जां मूं तैस किना बि बडै अद्धभुत कम लुहानें जेनि ला तुवे हैरान भौ गांहणै। 21जिहीं-चारै पिता परमेश्वर मौरा मैहणुवां दुबारे जींतैता, तिहियें-चारै आंउ बि जैसनि चांहू, तैस जींतैरी सकता; 22केईनी कि पिता कोसेरा फैसला ना काता। तेनी फैसला कांनेरा सारा हक मूंनी दितौरा। 23ऐठणीरै तेईनी कि सारै मैहणु जिहीं पिता परमेश्वरैरा आदर कातै, तिहियें पुत्रैरा मतलब मिंडा बि आदर करिया। जै मैहणु मिंडा आदर ना कातै, सै तैस पिता परमेश्वरैरा बि आदर ना कातै जेनि आंउ भेईजौरा।
24आंउ तुहां सिंउ सच-सच बोलता, जै मिंडी गलै शुणि करि मिंडै भेईजणारै पन विश्वास करैला, तेसनी अनन्त जीवन मेईंणा; जां तैस पन सजायरी आज्ञा ना भूंती, पण सै हमेशा मोउती किना बचि करि पेहिलै किना ऐ नवें जीवना मझ प्रवेश करि बेठोरै अत्तै। 25आंउ तुहां सिंउ सच-सच बोलता; कि सै टैंम ऐईंणारा, पण चलि यौउरा, जैस मझ आत्मिक तरीकै सिंउ मौरै मैहणु परमेश्वरेरै पुत्रैरी यानि मिंडी आवाज शुणैलै, जां जै शुणैलै तेन्हांनि अनन्त जीवन मेईंणा। 26केईनी कि जेसै रीति पिता परमेश्वर अपड़ै आपा मझ जीवन रखता, तीहैं तेनी मूंनी बि ऐक्या अधिकार दितौरा कि अपड़ै आपा मझ जीवन रखूँ। 27जां केईनी कि आंउ मैहणुरा पुत्र आ, ऐठणीरै तेईनी पिता परमेश्वरै मूंनी सभनियांं मैहणुवां केरा न्याय कांनेरा बि अधिकार दितौरा।
28ऐ सभ शुणि करि हैरान मेईं भौ, केईनी कि सै टैंम ऐईंता कि सै सभ मैहणु जै मौरै अत्तै, सै मिंडी आवाज शुणि करि कब्रि किना भेईर निकोहि ऐईंणै। 29जैन्हैं भलाई क्यौरी थी सै अनन्त जीवनेरै तेईनी जींतै भौ गांहणै, जां सै जै बुराई मझ जीवन जिईंथ्यै, सै दोषी बणांणैरै तेईनी जींति गांहणै।
यीशुरै बारै मझ गवाहि
30आंउ ऐपु किछ बि ना करि सकता। आंउ जै शुणता, तैस शुणि करियै फैसला काता जां मिंडा फैसला सच्चा आ; केईनी कि आंउ अपड़ि मर्जी ना पण जेनि आंउ भेईजौरा तेसैरी मर्जी पूरी कांना चांहथा।
31“अगर आंउ अपड़ै बारै मझ गवाहि दींता ता मिंडी गवाहि सच्ची ना। 32मिंडी तरफि सिंउ अक हौरा; पिता परमेश्वर जै मिंडै बारै मझ गवाहि दींता, जां मूं पता कि जै मिंडी गवाहि सैक्या दींता सै सच्ची गवाहि आ। 33तुहैं मैहणुवें यूहन्ना बपतिस्मा दींणै बाऐ किनि पुछणनि मैहणु भेईजै जां तेनी सच्चाईरै बारै मझ शुणाउ। 34पण आंउ अपड़ै बारै मझ मैहणुवां केरी गवाहि ना चांहथा; तां बि ऐ सारी गलै ऐठणीरै तेईनी बोलता कि तुवाड़ा उद्धार भुईया। 35यूहन्ना तैस दीयै सैयि थ्या जै जअता थ्या, तेसैरू प्रगड़ु मझ तुहां मैहणुवां थोड़ी देर खुश भूंणु अच्छु लगु।
36पण जै मूं किनि गवाहि आ सै यूहन्नेरी गवाहि किना बि बडी आ; केईनी कि जै कम पिता परमेश्वरै मूंनी पूरा कांननी दितौरा, सैहै मिंडै बारै मझ गवाहि दींता। जै कम आंउ काता, सै कम मिंडी गवाहि दींतै कि पिता परमेश्वरै आंउ भेईजौरा। 37जां पिता परमेश्वरै जेनि आंउ भेईजौरा, तेनिऐ मिंडी गवाहि दितोरी आ। तुहैं मैहणुवें कदि ना तेसैरा वचन शुणौरा ना तुहैं कदि तेसैरा रूप लधौरा। 38जां पिता परमेश्वरैरा वचन अपड़ै मंना मझ ना रखतै, केईनी कि तुवे मूं पन विश्वास ना कातै, जै परमेश्वरै भेईजौरा। 39तुवे पवित्र शास्त्रा मझ ध्यान सिंउ पढ़तै, केईनी कि तुवे समझतै कि अनन्त जीवन तेत मझ मेईंता, पण ऐ सारै पवित्र शास्त्र मिंडी गवाहि दींतै। 40फिरी बि तुवे अनन्त जीवन पांणैरै तेईनी मूं किनि ना ऐईंणा चाहंथै अत्तै।
41आंउ मैहणुवां किना आदर ना चांहथा। 42पण आंउ तुहां जांणता कि तुवे अपड़ै मंना मझ परमेश्वरा सेईतै प्रेम ना कातै। 43आंउ अपड़ै पिता परमेश्वरा किना अधिकार लै करि यौउरा, जां तुवे मूं ना मंनतै; पण अगर कोई हौरा अपड़ु नाँ लै करि ऐईछिया ता तुवे तेसैरी गलै मनि लींतै। 44तुवे मूं पन विश्वास ना करि सकतै केईनी कि तुवे योकिया किना अपड़ि तारीफ शुणना पसंद कातै, पण तुवे असली परमेश्वरा किना तारीफ शुणनैरी कोशिश ना कातै।
45ऐ मेईं सौचा कि मूं अपड़ै पिता परमेश्वरेरै सांमणै तुहां पन दोष लांणा; तुहां पन दोष लांणार ता मूसा, जैस पन तुहैं आशा रखौरी आ। 46केईनी कि अगर सच-मझ तुवे मूसै पन विश्वास कातै भूंतै ता तुहां मूं पन बि विश्वास कांना थ्या, ऐठणीरै तेईनी कि तेनी मिंडै बारै मझ लिखोरू आ। 47पण अगर तुवे तेसैरी लिखोरिया गला पन विश्वास ना कातै, ता मिंडिया गला पन किहीं विश्वास करेलै?”
Currently Selected:
यहुन्ना 5: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
