MAKUX 6

Ang Rieb Ka Yesux

(Mat 13:53-58; Luk 4:16-30)

1Nawh Cao lih hu khaing tan mai hoek ka daux meung tokaux tix, kawncau Nawh khankix hawt Nawh Cao heue. 2Yam hoek singaix twah Nawh Cao jah ti sidiex gau ka daux nyiex sidiex mai pui hun pa mhong Nawh Cao, kied daox deng ah nin, “Pui in pon ceu in khankix dee mawx? Hoik tawx pingnya cuyi, pa yuh ka mawx ka Pui in? Kaing pa ting sibrawm ceu in chix mawh daux tawm taix Nawh yuh ka mawx? 3In mawh Kaw pa chix kaing khaox, Kawn Marix, puxke Yakop, Yose, Yudax mai Simon khankix ang mawh lie?” Kix laux rhawm ka Nawh Cao heue. 4Yesux ah nin ka kix, “Cao jhai ang mawh pa ang koe min plakngai, lheu khaing daux meung tokaux tix mai sinax paox ru tix mai ka daux nyiex tokaux tix heue.” 5Nawh Cao ang pon yuh kaing pa ting sibrawm tan, lheu khaing teei taix tix deuh piang pui pa koe jhawm saux tix blah mai kieh kix moi. 6Nawh Cao daox deng ka krax pa ang kix yum rhawm heue. Nawh Cao hu lai ling ti sidiex gau ka daux yaong khankix sivie siveng tan heue.

Ploi Kawncau Hu Sidiex Gau

(Mat 10:5-15; Luk 9:1-6)

7Nawh Cao kok kawncau Nawh kao ra kaux hoek ka tix mai ploi kix hu tix cub ra kaux, ra kaux. Nawh Cao tawx sibrawm ka piang kix sonsang grheu phi pa seeing khankix heue. 8Nawh Cao tawx lox ka kix, nhie kix paw vi viex tidtix hu, son yam hu daux krax, lheu khaing khaox gix. Paw vi viex bau mai blah mai mau daux hau maox khlax. 9Ceep kiep mai paw vi ceep sibex ra pheen heue. 10Nawh Cao ah nin ka kix, “Pex laig ka daux nyiex dee mawx ang ah, ot tan tom lih hu pex khaing tan heue. 11Dee mawx ang ah, pa ang rieb pex mai dee ang kix nghiet lox pex, yam lih hu pex khaing tan khruah phawng tiex pa koe greem caong pex, som sang mawh mhai rug ka kix heue.” 12Kix lih hu mai sidiex gau, yuh ka mawx kawn pui sang doh keud ka phimap heue. 13Kix grheu phicaox lih tom nie mai kix groi rawm bee ka pui saux haoh hun mai cox kix moi heue.

Grawng Yum Yohan

(Mat 14:1-12; Luk 9:7-9)

14Mawh kheu hoik tawng grawh grawng ceu kaux Nawh Cao kudah dee, simiang Herut kawx, mhong mai nawh ah nin, “Yohan cao cubcom hoik deeh kaoh im khaing krax yum, mawh kheu nan sibrawm khankix tom yuh kaing ka daux nawh heue.” 15Pui tang kaux tix blah ah, “Mawh Eliyax heue.” Tang kaux tix blah ah, “Mawh Cao jhai, awm cao jhai khankix tix kaux kaux pa koe phao ka heue.” 16Yam mhong Herut grawh grawng ceu an nawh ah nin, “In mawh Yohan pa hoik kid aux kaing nawh, pa hoik deeh kaoh im heue.” 17Grawh grawng nawh, tokaux Herut hoik ploi pui hu giex Yohan mai phyawk nawh sau daux thawng. Kheu Herodix moeng pux nawh Philipux, mawh kheu hoik teei nawh ti moeng heue. 18Kheu Yohan hoik ah nin ka Herut, “Pa teei maix moeng pux maix, ang khaw mai been heue.” 19Tokaux Herodix koeng ka nawh mai koe rhawm ti sang pah nawh yum, viang mawh nan ang kiex pon yuh. 20Herut lhat ka Yohan, kheu tawng nawh grawh grawng mawh nawh pui rahsee mai pa singax singeh mai nawh kia ngien nawh heue. Yam nawh nghiet lox nawh, nawh kied sivix rhawm, viang mawh nan nawh koe rhawm gaux rhawm ti sang nghiet nawh heue. 21Yam hoek bawg yam pa yie pa khaw tix ngaix, yam Herut yuh pawie singaix keh tix, son simiang nawh mai pui giex kaing naing mai pui pa ting lhaong daux meung Galilie khankix. 22Yam hoek kawn bun Herodix mai yuh graoh, Herut mai pui khankix pa ngawm sawm tau mai nawh khaw rhawm mai simiang ah nin ka bunkrih an, “Maix mie ceu patix ang ah, rawg ka aux mai aux tak tawx ka maix heue.” 23Nawh tiextu mai baox ah nin ka nawh, “Maix rawg mhaing ceu patix ang ah ka aux, tom hoek haktiex aux tix plak kawx, aux tak tawx ka maix heue.” 24Bun an lih hu chawk ka miex nawh ah nin, “Aux sang rawg mhaing ceu patix?” miex nawh pawk lox ah nin, “Rawg kaing Yohan cao cubcom heue.” 25Bun an grhawm ti laig ka simiang dom mawx dom an mai rawg mhaing ah nin, “Aux mie maix tawx kaing Yohan cao cubcom daux tawg ka aux yam in heue.” 26Viang simiang kied khi rhawm kawx, kheu lox pa hoik tiex tu nawh mai kheu pui pa ngawm sawm tau mai nawh khankix, nawh ang rhawm lheu lox bun an heue. 27Dom mawx dom an simiang ploi pui naing pa pau tix, tix kaux hu mai nhie nawh hu viex kaing Yohan hoek. Kaw an hu kid kaing Yohan ka daux thawng. 28Viex kaing nawh daux tawg tawx ka bunkrih an heue. Bun an deeh tawx ka miex tix heue. 29Yam mhong kawncau Yohan khankix, kix hoek mai teei tokaux yum nawh mai hu sipaung deuh nawh daux simeeig heue.

Tawx Pui Phuan Rheng Ih

(Mat 14:13-21; Luk 9:10-17; Yo 6:1-14)

30Kawncau pa ting khankix khrawm paox tix hoek ka Yesux mai krai ka Nawh Cao grawh grawng khawmuik, pa hoik yuh kix mai pa hoik sidiex gau kix heue. 31Nawh Cao ah nin ka kix, “Pex hoek ka daux tiag dee ang pui ot mai laux lee tivud heue.” Kheu pui hun hoek hoek hu hu, tom ang kix koe bawg yam sawm heue. 32Kix brug reu hu daux tiag tix dah dee ang pui ot. 33Yam yaox pui kix hu mai tawng mawh kix, pui khrawm paox tix to hu ka caong tix, khaing yaong khaing veng khawmuik mai hoek ka sivoe kix heue. 34Yam lih Nawh Cao Nawh yaox cub pui hun mai Nawh Cao caux rhawm ka kix, mawh kheu awm kix yung pa ang koe cao liang cao kia mai Nawh Cao sidiex gau ka kix tom nie ceu heue. 35Yam uik dex sang hoek ponbo, kawncau Nawh khankix hoek ka Nawh Cao ah nin, “Ka dee in mawh ka daux tiag heue. Mai dex sang hoek yam ponbo. 36Kheu nan kieh pui khankix hu ka daux yaong khankix pa koe sivie siveng tin, yuh ka mawx sonsang liag kix pa ih son tokaux kix heue.” 37Nawh Cao pawk lox ah nin ka kix, “Pex tawx kix ih heue.” kix baox ah nin ka Nawh Cao, “Ex sang teei mau denari ra yieh hu liag blah mai tawx kix ih lie?” 38Nawh Cao baox ah nin ka kix, “Pex koe blah miex lon? Hu jhak ti yaox.” Khaix hoik tawng kix, kix ah nin, koe blah phwan lon mai kax ra mu heue.” 39Nawh Cao nhie pui khawmuik yuh cub caw mai ngawm piang rib pa klai heue. 40Kix ngawm daux cub caw pa koe been tix yieh mai pa koe been tixphwan tix cub heue. 41Nawh Cao teei blah phwan lon mai kax ra mu, maong ka raoma mai Nawh nawb bwan, Nawh sivit lon blah mai tawx ka kawncau khankix, sonsang viex kix ti tawx ka pui khankix heue. Nawh Cao gwieh kax an ra mu ka pui khawmuik heue. 42Kix khawmuik ih mai sak heue. 43Kix deeh khrawm ti teei blah pa max pa phawng mai kax, naog kao ra phliex heue. 44Pui pa ih blah an simex giex koe phwan rheng heue.

Yesux Hu Piang Rawm

(Mat 14:22-33; Yo 6:15-21)

45Khaix an dom mawx dom an Nawh Cao nhie kawncau Nawh khankix laig daux reu mai hu sivoe Nawh plak toi rawm ka veng Biesedax. Yam kawn ploi tokaux Nawh Cao cub pui hun khankix hu. 46Khaix hoik ploi Nawh Cao pui khankix, Nawh haok ka gawng sonsang rawg bwan heue. 47Yam hoek ponsawm reu an ot ka sigreung rawm nhawng mai Nawh Cao ot ka haktiex nong nong heue. 48Nawh Cao yaox kawncau Nawh khankix kha rhawm tix vai reu, kheu ang caw plak bhaung. Yam hoek bawg yam pa tah pon taix, yam ponsawm Nawh Cao hu ka caong tix piang rawm nhawng hoek ka kix mai Nawh yuh awm pa sang luan hu khaing kix heue. 49Yam yaox kix Nawh Cao hu ka caong tix piang rawm nhawng, kix ce mawh miang mai kix tom riag yo, 50kheu kix khawmuik yaox Nawh mai die lhat kah dom mawx dom an Nawh Cao sikah ka kix ah nin. “Gaux rhawm heue, mawh Aux, paw vi lhat ka” 51Nawh Cao hoek dee ot kix laig daux reu mai bhaung yiien mai kix kied daox deng kah, ka daux tokaux tix heue. 52Mawh kheu ang kix tawng grawh grawng lon blah khankix, rhawm kix tom kien heue.

Pai Pui Saux Moi

(Mat 14:34-36)

53Yam hoik tiang kix plak an, kix hoek ka haktiex meung Giennesarit mai phyawk reu ka praok heue. 54Yam lih kix khaing daux reu dom mawx dom an pui khankix tawng mawh Nawh Cao, 55mai to hu kudah dee ka daux haktiex an. Kix mhong grawh grawng Nawh Cao ot dee mawx ang ah, kix klawm pui saux khankix piang ku hoek tan heue. 56Nawh Cao laig daux yaong, daux veng, daux ma khankix, dee mawx ang ah, kix deuh pui saux khankix daux lah daux cau mai khyox khaw ka Nawh Cao, yuh ka mawx sonsang pon teeh kix caong sibex Nawh khaing heue. Pa pon teeh ka Nawh Cao ku kaux daux pui moi heue.

Currently Selected:

MAKUX 6: WCL

Highlight

Copy