MAKUX 5

Yesux Pai Pui Koe Phi

(Mat 8:28-34; Luk 8:26-39)

1Kix hoek plak toi rawm nhawng, ka daux meung Gadarax. 2Khaix hoik lih Nawh Cao khaing daux reu dom mawx dom an, pui tix kaux pa koe phi pa seeing brai, lih khaing daux simeeig mai rieb Nawh Cao heue. 3Kaw an ot ka daux simeeig, pui tix kaux kawx ang pon phyawk nawh, pie ka maox ceng kawx ang pon. 4Mawh kheu hoik sax phyawk nawh ka ceng mai sau gang ka nawh law lawx glang ka an mai nawh hoik rud ceng mai gang khankix dud, pui tix kaux kawx ang koe riang ti kieh nawh nge heue. 5Yam ponngaix ponsawm nawh ot ka daux simeeig mai piang gawng khankix, nawh kok yo mai teei simaox pat tokaux tix ka jheung jheung heue. 6Yam yaox nawh Yesux dee singai nawh to hu mai krub ka Nawh Cao heue. 7Nawh kok yo lox sinum ah nin, “Yesux, Kawn Siyiex pa ting lhaong khaing khawmuik eue, aux koe pa yuh mai Maix ceu patix? Aux khyox khaw ka Maix ka daux ceu kaux Siyiex, paw vi tuktiak ka aux liak.” 8Kheu Nawh Cao ah nin ka nawh, “Phi pa seeing eue, lih hu khaing daux pui in heue.” 9Nawh Cao chawk nawh ah nin, “Ceu kaux maix kaux patix?” Nawh pawk lox ka Nawh Cao ah nin, “Ceu kaux aux kaux Liecong kheu kied haoh hun yix heue.” 10Nawh khyox khaw ka Nawh Cao tom nie, son ang Nawh sang grheu kix lih khaing daux meung an heue. 11Ka dee an koe cub lig pa kied hun sawm ka gawng tan heue. 12Kix khyox khaw ka Nawh Cao ah nin, “Ploi yix hu ka daux lig khankix, sonsang laig yix ka daux kix heue.” 13Nawh Cao tawx akhwang ka kix mai phi pa seeing khankix lih hu mai laig ka daux lig khankix mai cub lig an pa dex koe ra rheng, to lih ka dee nie rieh nie jun jee laig ka daux rawm nhawng mai nok yum ka daux rawm nhawng heue. 14Pui liang lig khankix to hu mai krai grawh grawng ceu an ka daux yaong daux veng khankix mai pui khankix hoek ti jhak grawh grawng pa hoik mawh an, 15Yam hoek kix ka Yesux mai yaox kaw pa hoik laig phicaox khankix glang ka in pa koe Liecong, ngawm tan mai ceep kraung mai nawh hoik deeh mhawm, kix lhat kah heue. 16Kix pa hoik yaox, krai pui khankix mhong grawh grawng pa hoik mawh ka kaw pa laig phicaox khankix mai grawh grawng lig khankix heue. 17Kix khyox khaw ka Nawh Cao nhie Nawh lih hu khaing daux meung kix heue. 18Yam laig Nawh Cao ka daux reu, kaw pa hoik laig phicaox ka glang ka an, khyox khaw mhaing ti ot tau mai Yesux. 19Nawh Cao ang tawx akhwang ka nawh, ah nin ka nawh, “ing ka nyiex maix mai puxaik kawn keeing maix, krai kix mhong grawh grawng pa ting lhaong pa caux rhawm Siyiex mai pa yuh bwanson, son maix heue.” 20Kaw an hu ka daux meung Dekapolix mai jah ti krai grawh grawng ceu pa ting lhaong pa hoik yuh Yesux son nawh mai pui khawmuik daox deng kah heue.

Bun Yum Mai Bun Lih Nham

(Mat 9:18-26; Luk 8:41-56)

21Yesux deeh hu plak toi rawm daux reu mai cub pui hun khrawm paox tix hoek ka Nawh, yam ot Nawh dex rawm nhawng tan heue. 22Pui giex kaing nyiex sidiex tix kaux, pa kaux Yairux, yam yaox nawh Yesux, nawh krub dex caong Nawh, 23mai khyox khaw ka Nawh Cao ah nin, “Kawn nyawm bun iak aux, dex sang yum, hoek sonsang deuh Maix taix tix piang nawh liak, yuh ka mawx sonsang deeh moi nawh mai im heue.” 24Nawh Cao hu tau mai kaw an mai cub pui hun hawt khaix Nawh mai theen ka Nawh Cao heue. 25Bun tix kaux pa hoik koe jhawm saux pa lih nham kao ra num. 26Pa hoik kham geu tom nie ceu daux tawm taix pui chix sidah khankix mai hoik cai can pa koe nawh khawmuik, viang mawh nan nawh ang moi ceeix kawx, baox nie khaing. 27Kheu hoik mhong nawh grawh grawng Yesux, nawh hoek daux cub pui plak khaix mai teeh kraung ceep Nawh Cao heue. 28Nawh keud ah nin, “Phan aux teeh kraung ceep Nawh Cao khaing, aux tak moi heue.” 29Nham nawh hit dom mawx dom an mai nawh tawng daux tokaux tix grawh grawng jhawm saux nawh hoik moi heue. 30Dom mawx dom an Yesux tawng daux tokaux tix, grawh grawng sibrawm hoik lih khaing Nawh mai Nawh Cao deeh gi cub pui an ah nin, “Pui mawx pa teeh kraung ceep Aux?” 31Kawncau Nawh khankix ah nin ka Nawh Cao, “Maix yaox cub pui hun nie ding nie dod theen ka Maix mai Maix chawk, Pui mawx pa teeh ka Aux lie?” 32Nawh Cao simi ti yaox vung viang Nawh, sonsang yaox pui pa hoik yuh ceu in. 33Bun an nawh hoik tawng pa hoik yuh ka tokaux tix, nawh tom lhat tom siyaung mai hoek mai krub sivoe Nawh Cao mai krai ka Nawh khawmuik rahsee heue. 34Nawh Cao ah nin ka nawh, “Kawn bun Aux eue, krax yum rhawm maix hoik kieh maix moi, hu mhawm mhawm heue. Kieh maix luan khaing jhawm saux maix heue.” 35Yam kawn sikah Nawh Cao, pui hoek khaing nyiex pui giex kaing nyiex sidiex ah nin, “Kawn bun maix hoik yum heue. Yuh patix maix lai kawn lak lheut ka Sara Cao gau?” 36Yesux mhong lox pa hoik krai an, ah nin ka pui giex kaing nyiex sidiex, “Paw vi lhat yum rhawm khaing heue.” 37Nawh Cao ang kieh pui tix kaux kawx hawt khaix tix, lheu khaing Petrux, Yakop mai Yohan pux Yakop heue. 38Kix hoek ka daux nyiex pui giex kaing nyiex sidiex mai Nawh Cao yaox pa sinum siaox mai pui hun nied ti yiiem riag heue. 39Khaix hoik laig Nawh Cao tan Nawh ah nin ka kix, “Yuh patix pex lai sinum siaox mai yiiem riag yuh nin? Kawn nyawm in hoik yum ang mawh, mawh ngie laig it nawh khaing” 40Kix nieb yuh pa ang nab yam nyiah ka Nawh Cao heue. Nawh Cao kieh pui pa ot tan khawmuik lih hu mai Nawh teei miex keeing kawn nyawm an mai kix pa ot tau mai Nawh, laig ka dee ot kawn nyawm an heue. 41Nawh Cao teei taix kawn nyawm an ah nin ka nawh, “Talita kumix” phan toe lox an dee bleeh ah nin, “Kawn nyawm bun eue, Aux krai ka maix, kaoh heue.” 42Dom mawx dom an kawn nyawm bun an kaoh mai hu, kheu ju nawh hoik koe kao ra num heue. dom mawx dom an kix kied koe krax daox deng kah heue. 43Nawh Cao tawm lox ka kix tom nie, paw kieh pui tix kaux kawx tawng grawh grawng ceu in. Nawh Cao nhie kix tawx nawh ih pa ih heue.

Currently Selected:

MAKUX 5: WCL

Highlight

Copy