MAKUX 7

Pa Seeing Mai Pa Singax

(Mat 15:1-20)

1Pharishie khankix mai pui tiiem lai tix blah kaoh khaing veng Yerusaliem khrawm paox tix hoek ka Nawh Cao. 2Kix yaox kawncau Nawh tix blah, ih blah ka taix pa seeing, mai taix pa ang khoek, kix deuh phimap kah heue. 3Mawh kheu Pharishie khankix mai pui Yudax khawmuik ang ih pa ih, ka ang kix nyang khoek taix tix mhawm mhawm, kheu kix hawt been tax yiex miex keeing kix heue. 4Yam hoek kix khaing daux lah, ka ang kix nyang heem tokaux tix, kix ang ih pa ih, lheu khaing nan kawn koe been tang ceu tom nie pa hoik rieb kix ti teei ti hawt, pa mawh been phak kawk mai aw mai klong tawng khankix heue. 5Pharishie mai pui tiiem lai khankix chawk ka Nawh Cao ah nin, “Kheu kawncau Maix khankix ang hawt been tax yiex miex keeing mai teei taix pa seeing brai ih blah cie kix?” 6Nawh Cao ah nin ka kix, “Cao jhai Isayax hoik grux krai mhawm mhawm grawh grawng pex pa mawh pui pie lhen ah nin, pui ceu in yungyi Aux ka siyieb jheeh tix, viang mawh nan rhawm kix singai khaing Aux heue. 7Kix krub ka Aux giex going, kheu sidiex gau kix been pa yuh kawn pui heue. 8Pex tik vud lox tawm jhawm krai Siyiex mai giex been kawn pui tom sied heue.” 9Nawh Cao baox ah nin ka kix, “Pex tik mhawm mhawm lox pa hoik nhie Siyiex pex yuh, yuh ka mawx sonsang pon hawt pex been pex. 10Mawh kheu Mose hoik ah nin, “Yungyi ka miex maix mai keeing maix heue, kaw pa map ka miex ka keeing tix tak kieh nawh yum tete heue. 11Viang mawh nan, pex ah, Phan pui tix kaux ah nin ka miex tix, phan ang mawh nan, ka keeing tix, cie aux ceu patix ang ah pa lo mai pa sang koe bwanson, son maix mawh Kawban, pa ah nan, sang ah ka pa hoik tan hoik tawx ka Siyiex. 12Pex ang baox kieh nawh yuh tix ceu kawx son miex keeing nawh. 13Mawh kheu nan pex yuh laux gumlox Siyiex, kheu been pex pa toe ti tawx tix ju hoik tix ju heue. Pex yuh pa awm in tom nie ceu heue.”

Pa Ang Kieh Kawn Pui Singax

(Mat 15:10-20)

14Yam an Nawh Cao kok pui khawmuik hoek ka tix mai ah nin ka kix, “Pex khawmuik nghiet mai enn ti tawng heue. 15Pa koe plak praix kawn pui ang koe tix ceu kawx, pa chix laig daux nawh mai kieh nawh seeing, viang mawh nan mawh ceu pa lih khaing daux kawn pui pa chix kieh nawh seeing heue. 16Pui mawx ang ah, phan nawh koe yhaok ti mhong, kieh nawh mhong heue.” 17Yam lih Nawh Cao khaing cub pui hun mai hoik laig daux nyiex tix nyiex, kawncau Nawh khankix chawk grawh grawng lox tiag an ka Nawh heue. 18Nawh Cao ah nin ka kix, “Pex kawx ang chix tawng ti nghiet lie? Pex ang tawng grawh grawng ceu pa ot plak praix mai laig ka daux kawn pui, ang chix kieh nawh seeing lie? 19Mawh kheu ceu an khankix ang laig ka daux rhawm nawh, viang mawh nan laig ka daux vaig nawh mai baox lih hu ka daux, daux iang heue.” Pa krai Nawh nan, Nawh sang ah pa ih khawmuik mawh pa singax heue. 20Nawh Cao baox ah nin, “Mawh ceu pa lih khaing daux kawn pui pa chix kieh nawh seeing heue. 21Kheu mawh khaing plak daux, daux rhawm kawn pui pa chix keud ceu pa ang mhawm ang mhiem khankix heue. Pa mawh ceu pa lud mai moeng pui, ceu pa lud vao mai bun, ceu pa pah pui yum, 22Ceu pa briex mai ceu pa ghoing ka cie pui mai ceu pa yuh pa caox khankix, ceu pa pie lhen, ceu pa mie ti yuh ceu pa ang khaw ang jiet, ceu pa boh rhawm pa khoi mai ceu pa salao ka Siyiex, ceu pa ting rhawm, pa yuh ceu pa daox aw khankix heue. 23Ceu pa ang mhawm mhiem ceu in khawmuik, mawh ceu pa lih khaing plak daux mai kieh pui seeing heue.”

Bun Kwe krax Yum Rhawm

(Mat 15:21-28)

24Nawh Cao kaoh khaing tan mai hu daux haktiex veng Turux mai veng Sidom mai laig ka daux nyiex tix nyiex, Nawh ang rhawm kieh pui tawng, viang mawh nan Nawh ang pon ti mox heue. 25Bun tix kaux pa koe kawn bun iak tix kaux pa laig phi pa seeing, mhong grawh grawng Nawh Cao mai hoek krub dex caong Nawh heue. 26Bun an mawh ceu pui Helasax, pui meung Suripinik kiex khyox khaw ka Nawh Cao, nhie Nawh grheu phicaox an lih khaing kawn bun tix heue. 27Nawh Cao ah nin ka kiex, “Kieh kawn praix sawm tom sak ka ha, mawh kheu ang khaw ti teei blah cie kawn praix khankix taing ka sox heue. 28Viang mawh nan bun an deeh pawk lox mai ah nin ka Nawh Cao, “Mawh heue, Simiang eue, viang mawh sox khankix kawx, ih pa cod pa roik greem pheen sawm kawn praix khankix heue.” 29Nawh Cao baox ah nin ka kiex, “Mawh kheu gumlox in pax hu heue. Phicaox hoik lih hu khaing daux kawn bun pax heue.” 30Bun an deeh ing ka nyiex tix mai yaox kawn nyawm an it piang ku mai phicaox hoik lih hu heue.

Pai Pui Lheet Pui Kle Moi

31Nawh Cao baox lih hu khaing haktiex Turux mai hu preeng meung Sidom mai hu preeng sinax meung Dekapolix mai sidah hoek ka rawm nhawng Galilie heue. 32Kix viex pui pa lheet yhaok mai kle yam sikah tix kaux mai kix khyox khaw ka Nawh Cao, nhie Nawh deuh taix tix piang kaw an heue. 33Nawh Cao teei nawh lih hu khaing cub pui hun, dee ang pui ot mai Nawh Cao teei gien taix tix sau daux yhaok kaw an mai Nawh Cao baig rawm mya mai teeh ka dak nawh heue. 34Nawh maong plak raoma mai ngia ah nin ka kaw an, “Ephathax”. Pa ah nan, sang ah, “Paoh” heue. 35Yhaok nawh paoh heue. Mai siniag dak nawh deeh gah mai nawh chix sikah sidawng heue. 36Nawh Cao tawm lox ka kix, son ang kix krai ka pui tix kaux kawx. Viang Nawh Cao tawm lox ka kix miex ding, kix nie kieh nawh tah hu heue. 37Kix kied daox deng ka tete tom ang chix tiag chix krai ah nin, “Nawh hoik yuh khawmuik mhawm mhawm heue. Viang mawh pui pa lheet yhaok kawx Nawh deeh cox kieh chix mhong, pui aw kawx, deeh kieh chix sikah heue.”

Currently Selected:

MAKUX 7: WCL

Highlight

Copy