LUKAX 17

Phimap Phighram

(Mat 18:6-7,21-22; Mak 9:42)

1Nawh Cao ah nin ka kawncau Nawh khankix, “Phan dee sideeing ang hoek ang doh mawh, viang mawh nan kaw pa kieh koe dee sideeing caong khankix, tak kha rhawm heue. 2Son kaw an, phan preue simaox mhaw ka ngawg nawh mai taing nawh ka daux rawm sigrit sigra lheu mhawm khaing kieh nawh kawn nyawm iak khankix tix kaux sideeing caong tix heue. 3Tokaux pex rien rhawm tix heue, phan puxaik maix lud, ne nawh ka, phan nawh deeh doh keud, ploi phimap nawh heue. 4Phan nawh lud maix daux tix ngaix, tom aliah bawg mai deeh tieh ti hoek ka maix aliah bawg ah nin, Aux deeh doh keud ka phimap heue. Pluat ploi phimap nawh heue.”

Krax Yum Rhawm

5Kawncau pa ting Nawh khankix ah nin ka Simiang, “Kieh krax yum rhawm ex baox nie ting liak” 6Simiang deeh ah nin, “Phan pex koe krax yum rhawm pon ding mu simie sok taux klaox tix mu, pex ah ka khaox liah in, maix reeig khawm riah tix mai hu jung ka daux rawm sigrit sigra heue. Khaox an tak nghiet lox pex heue.

Kaing Pa Caw Siliex Tiyuh

7Phan pex koe siliex pa thai ma ang ah, pa liang yung ang ah, yam deeh hoek nawh khaing ma, hoek dom in mai ngawm ti sawm heue. Kadaux pex koe pa nghaox ah nin lie? 8Jalao sang ah nan, nawt maox rawd nyoi maix mai khre ceu pa sang sawm aux mai khan kheu tom hoik sawm rheep aux, maix koe sawm rheep khaix aux. Tee sang ah nin ka nawh ang mawh lie? 9Mawh kheu siliex an hoik yuh ceu pa hoik nhie nawh yuh khankix, nawh khex sang yaog yaw bwanson nawh kah lie? 10Awm an pex kawx, khaix hoik yuh pex ceu pa hoik nhie pex yuh khawmuik. Ah nin, ex mawh ngie siliex pa ang koe bwanson, ex hoik yuh ceu pa khaw ex ti yuh khaing heue.”

Yesux Pai Pui Sipawg Moi

11Yam kawn tak hu Nawh Cao ka veng Yerusaliem, Nawh hu preeng ka sinax meung Samarix mai meung Galilie heue. 12Yam laig Nawh Cao ka daux yaong tix yaong pui sipawg kao kaux, cung dee singai, 13mai kok yo ah nin, “Yesux, Simiang eue, caux rhawm ka yix liak.” 14Yam yaox Nawh Cao kix, Nawh ah nin ka kix, “Hu jhi tokaux pex ka cao giex kaing li pa ting khankix heue.” Yam kawn tak hu kix, kix deeh singax heue. 15Ka daux kix tix kaux yam nawh yaox grawh grawng hoik deeh moi tix, nawh deeh tieh ti hoek mai ah lox sinum yaog yaw Siyiex heue. 16Nawh gup ngai tix dex caong Nawh Cao mai yaog yaw bwanson Nawh Cao, kaw an mawh pui Samarix heue. 17Yesux ah nin ka nawh, “Pa hoik deeh kieh singax koe kao kaux ang mawh lie? Viang mawh nan kix dim kaux ot dee mawx? 18Ang koe pa sang deeh hoek ti yaog yaw bwanson Siyiex, lheu khaing pui tang ceu in lie?” 19Nawh Cao baox ah nin ka kaw an, “Kaoh hu krax hu maix, krax yum rhawm maix hoik kieh maix moi heue.”

Grawng Meung Siyiex

(Mat 24:23-28,37-41)

20Pharishie khankix hoek tix chawk ah nin, “Meung Siyiex tak sang hoek lai mawx?” Nawh Cao pawk lox ah nin ka kix, “Meung Siyiex hoek ka daux pa chix yaox pui ang mawh heue. 21Viang mawh nan kawx, kix tak ang ah, jhak heue, koe tin, phan ang mawh nan, jhak heue, koe tan mawh kheu meung Siyiex koe ka daux pex heue.” 22Nawh Cao ah nin ka kawncau Nawh khankix, “Singaix bawg yam tak sang hoek, yam sang simie pex tix yaox, singaix bawg yam Kawn kawn pui tix singaix mai pex tak ang lai pon ti yaox heue. 23Kix tak sang ah nin ka pex, jhak heue tan, jhak heue tin, paw lih hu, viang khaix kix kawx paw hawt heue. 24Mawh kheu awm tuhsah, yam nawh tuh plak daog raoma tix plak, jhan riang tom hoek daog raoma tang plak, yam tak sang hoek Kawn kawn pui ka daux singaix Nawh, tak sang awm an heue. 25Viang mawh nan Nawh tak sang kham geu tom nie ceu mai kham geu pa tik pa vud pui ju in, phao ka heue. 26Awm pa hoik mawh ka daux bawg yam singaix Noax khankix, ka daux bawg yam singaix Kawn kawn pui kawx, tak sang mawh awm an heue. 27Kix ih, kix nyaux, teei mex teei moeng, teei ti tawx ka paox tix, tom hoek singaix laig Noax ka daux nyiex reu ting mai rawm haok hwan mai naog piang haktiex, yuh kix laux khawmuik heue. 28Awm an ka daux bawg yam singaix Lotax khankix, kix ih, kix nyaux, kix liag, kix coh, kix sum mai kix yuh nyiex heue. 29Viang mawh nan ka daux singaix yam lih Lotax khaing daux veng Sawdom, lih lhiex ngu mai mhat khaing raoma mai yuh kix laux khawmuik heue. 30Ka daux singaix yam tak sang kieh sidawng Kawn kawn pui, tak awm an heue. 31Ka daux singaix an, pui pa ot ka piang prang nyiex, paw kieh nawh lih ti teei kraung tix ka daux nyiex, awm an pui pa ot ka daux ma, paw kieh nawh deeh plak khaix tix heue. 32Doh keud ka moeng Lotax heue. 33Pui mawx ang ah pa sawg ti taoh ju tix, tak sang som ju heue. Viang mawh nan pui mawx ang ah pa sang som ju, tak sang pon taoh ju tix heue. 34Aux krai ka pex, ka daux sawm an, pui ra kaux pa it piang ku tix mu ngie, tak sang teei tix kaux mai tak sang prah tang kaux an heue. 35Bun ra kaux pa krid tau ka mhaw, tak sang teei tix kaux mai tak sang prah tang kaux an heue.” 36Pui ra kaux pa ot daux kaung, tak sang teei tix kaux mai tak sang prah tang kaux an heue.” 37Kix chawk Nawh Cao ah nin, “Simiang eue, ceu in tak sang mawh ka dee mawx?” Nawh Cao pawk lox ah nin ka kix, “Tokaux yum koe dee mawx ang ah klang preng tak sang khrawm tix tan heue.”

Currently Selected:

LUKAX 17: WCL

Highlight

Copy