LUKAX 16

Kawncau Pa Ang Rahsee

1Ka kawncau Nawh khankix kawx Nawh Cao ah nin, “Koe caomi tix kaux, pa koe kawncau pa bung kaing tix kaux, pa dhua pui nawh kieh kraung khrai caomi an nai mai krai ka simiang nawh heue. 2Simiang nawh kok nawh mai ah nin ka nawh, pa mhong aux grawh grawng maix mawh pa yuh ka mawx? Deeh tawx lai carang, grawh grawng yam yuh maix kawncau pa bung kaing. Mawh kheu ang maix lai baox pon ti yuh kawncau pa bung kaing heue. 3Kawncau pa bung kaing an keud ah nin daux tokaux tix, aux tak sang yuh ka mawx, kheu simiang aux hoik deeh teei, kaing bung aux khaing aux? Aux ang koe riang ti sang kaong tiex mai phan caung ti ih, kaig aux kah heue. 4Khaix hoik rau aux khaing kaing bung, aux tak yuh ka mawx! Aux hoik tawng, sonsang rieb pui aux ka daux nyiex kix. 5Nawh kok pui pa ceuk ka simiang nawh ku kaux mai chawk ah nin ka kaw phao ka, maix ceuk ka simiang aux miex ding? 6Kaw an deeh ah nin, Aux ceuk rawm bee tix rheng coi heue. Kawncau pa bung kaing an ah nin ka nawh, teei lai grawng ceuk maix mai nied ti tiiem phwan yieh coi heue. 7Khaix an nawh baox chawk ka tang kaux ah nin, maix ceuk cie tix miex ding? Kaw an deeh ah nin ka nawh, ceuk nghox ca tix rheng glawm heue. Kawncau pa bung kaing an ah nin ka nawh, teei lai grawng ceuk maix mai nied ti tiiem daix yieh glawm heue. 8Simiang nawh yaw kawncau pa bung kaing pa ang rahsee an, kheu hoik yuh nawh pa lhak lhiiem. Grawh grawng nawh, kawn praix pa dex dawd mai haktiex khankix nie lhak lhiem son bawg yam ju yam ot yam koe kix, khaing kawn praix pa riang khankix heue. 9Aux baox krai ka pex, teei sinngao pa nieb hoik pon pex mai shiao, yuh ka mawx sonsang pon paox grawm, yam pa hoik laux sinngao an, pa tak sang rieb pex ka daux nyiex gox pa tak koe leeing ju heue. 10Kaw pa kaux sijax ka ceu pa nie iak, ka grawng pa ting kawx, kaux sijax heue. Kaw pa ang rahsee, ka ceu pa nie iak, ka ceu pa ting kawx, ang rahsee heue. 11Mawh kheu nan phan pex ang kaux sijax, ka sinngao ceu pa ang rahsee, mawx sang tawx pex priex sinngao pa mawh pa meh? 12Phan pex ang hoik kaux sijax ka cie pui tang kaux, mawx tak sang tawx cie tokaux pex, ka pex? 13Kawncau tix kaux kawx ang pon yuh son simiang ra kaux, mawh kheu nawh tak koeng ka tix kaux mai moh tang kaux an, phan ang mawh nan, nawh tak een rhawm ka tix kaux mai nieb yuh ka tang kaux an heue. Pex ang pon ti yuh son Siyiex mai khawm son sinngao heue.”

Tawx Satix Ka Pharishie

(Mat 11:12-13, 5:31-32; Mak 10:11-12)

14Pharishie khankix pa mawh pui pa moh mau, yam mhong kix lox ceu an khawmuik, kix yuh pa ang cee ang cak nyiah ka Nawh Cao heue. 15Nawh Cao ah nin ka kix, “Pex mawh pui pa yuh awm grang pa rahsee sivoe kawn pui, viang mawh nan Siyiex tawng rhawm rhi pex. Mawh kheu pa yaog kawn pui ti kieh ting, mawh pa seeing brai sivoe ngai Siyiex heue. 16Lox lai beenli mai cao jhai khankix, koe tom hoek Yohan heue. Jah ka bawg yam an, sidiex gau lox bwan gaux rhawm pa dex dawd mai meung Siyiex mai pui ku kaux grhawm ti laig kah heue. 17Viang mawh nan raoma mai haktiex lheu yie grai, khaing ngai lai pa nie iak tix mu cod grai khaing daux lai beenli heue. 18“Pui mawx ang ah, pa tik moeng tix mai baox moeng tang kaux, nawh lud vao heue. Kaw pa teei ti moeng bun pa hoik tik mex nawh, lud vao heue.

Tax Caomi Mai Lazarux

19“Koe caomi tix kaux, nawh ceep kraung raoh klai mai kraung man paing pa mhawm, yuh krax pa gaux rhawm ku ngaix heue. 20Koe pui hot tix kaux, pa kaux Lazarux, pa ot dex siviex caomi an, nawh muad mie naog yia leem khawm kaux tix. 21Nawh simie ti ih, pa pruat pa roik, pa cod khaing pheen caomi an, mawh heue. Viang mawh sox khankix kawx hoek ti lied dee saux nawh heue. 22Yam an tix ngaix pui hot an yum mai kawncau Siyiex khankix, teei nawh hu deuh nawh ka daux naok Abraham heue. Caomi an kawx yum mai sipaung nawh heue. 23Nawh kied kha rhawm daux meung yum, nawh yaog ngai tix jhak mai yaox ka Abraham dee singai, mai Lazarux ka daux naok Abraham heue. 24Nawh kok yo ah nin, Keeing! Abraham eue, caux rhawm ka aux liak, ploi Lazarux hoek, son sang cub nawh toh giien tix daux rawm mai kieh caux ka dak aux nghie liak, kheu aux kied kha rhawm ka daux rao ngu in heue. 25Viang mawh nan Abraham ah nin, kawn praix eue, doh keud ka grawng pa hoik pon maix ceu pa mhawm cie maix, yam kawn im ju maix, awm an Lazarux hoik pon ceu pa ang mhawm, pa caox heue, viang mawh nan, yam in nawh pon ceu pa khu rhawm nawh, pa nyawm rhawm tin mai maix kham geu pa kha rhawm heue. 26Lheu khaing in khawmuik, sinax yiex mai maix, koe ngawd rang ting raux, yuh ka mawx son kix pa sang hu khaing tin ka maix, tak ang chix hu mai tix kaux kawx ang pon tiang ti hoek khaing tan ka yiex heue. 27Caomi an baox ah nin, keeing eue, phan mawh nan, aux khyox ka maix, kieh Lazarux hu ka nyiex keeing aux liak. 28Sonsang hu nawh ti kham mhai ruk ka kix heue, mawh kheu aux koe puxaik phwan kaux, phan ang mawh nan ha kix kawx, hoek ka dee kha rhawm tin heue. 29Viang mawh nan, Abraham ah nin, kix koe Mose mai cao jhai khankix, kieh kix nghiet lox kix heue. 30Kaw an baox ah nin, Ang mawh, keeing Abraham eue, viang mawh nan, phan tix kaux pa hoik yum, hu ka kix, kix tak sang doh keud ka phimap tix heue. 31Abraham baox ah nin ka nawh, phan kix ang nghiet Mose mai cao jhai khankix, viang pui tix kaux deeh kaoh khaing krax yum kawx, kix tak ang cu nghiet ka lox nawh heue.”

Currently Selected:

LUKAX 16: WCL

Highlight

Copy