LUKAX 18

Miexmai Mai Cao Prawng See

1Nawh Cao krai lox ka kix, yuh ka mawx sonsang khaw kix ti rawg bwan jheung jheung mai son ang kix sang khrup rhawm, 2ah nin, “Ka daux veng tix veng koe cao prawng see tix kaux, pa ang lhat ka Siyiex mai ang chix nabyam pui heue. 3Ka daux veng an koe miexmai tix kaux, pa hu ka cao prawng see an law lawx, ah nin, prawng son aux mhawm mai yuh ka pui pa yuh see ka aux liak. 4Ka daux tix vong nawh ang prawng ang yuh, viang mawh nan khaix an nawh keud tiah nin ka daux tokaux tix, viang aux ang lhat ka Siyiex mai ang nabyam ka pui kawx, 5Mawh kheu miexmai in hoek ti lag lheut suksag aux, aux tak sang prawng plak kiex, phan ang mawh nan kiex tak sang kieh aux taug nyhap tix heue.” 6Simiang baox ah nin, “Nghiet ka lox cao prawng see pa ang rahsee an heue. 7Siyiex tak ang prawng, ang yuh plak pui pa hoik laug Nawh ti teei, pa kok ka Nawh yam pon singaix mai yam pon sawm, viang ang Nawh khran yuh kawx lie? 8Aux krai ka pex, Nawh tak sang nied ti prawng laung laung plak kix heue. Yam sang hoek Kawn kawn pui, Nawh tak sang yaox krax yum rhawm ka piang haktiex in lie?”

Pharishie mai Pui Koh Mau

9Lox tiag in kawx, Nawh Cao krai ka kix tix blah, pa een rhawm ka tokaux tix, grawng uik rah uik see tix mai nieb een ti ang koe cee ka pa kawn deuk khawmuik an heue. 10“Pui ra kaux haok daux nyiex bwan son sang rawg bwan, tix kaux mawh Pharishie mai tang kaux an, mawh pui pa koh mau heue. 11Pharishie an cung ti rawg bwan nong nong ah nin, Siyiex eue, aux yaog yaw bwanson Maix, kheu ang aux awm pui tang kaux khankix, pa nieb rhim ti teei, yuh pa ang rahsee, lud vao, awm pui koh mau in kawx, aux ang awm heue. 12Aux twah pa ih, tix twah ra ngaix mai aux tawx kao son tix son khaing pa pon aux khawmuik heue. 13Viang mawh nan pui pa koh mau an, cung dee singai mai pie ngai nawh, ang yaog tix maong plak raoma, nawh dieh naok ti ah nin, Siyiex eue, caux rhawm ka aux pa mawh pui tingmap liak. 14Aux krai ka pex, yam lih hu pui in ka nyiex tix, nawh hoik nie lheu pon pa rahsee, khaing tang kaux an heue. Mawh kheu pui mawx ang ah, pa yaog tokaux tix lhaong, tak sang yeen nawh tiem, pui mawx ang ah, pa yuh tokaux tix tiem, tak sang yaog nawh lhaong.”

Nawb Bwan Ka Kawn iak

(Mat 19:13-15; Mak 10:13-16)

15Kix viex kawn iak tix khankix hoek ka Nawh Cao, son sang teeh Nawh ka kix heue. Yam yaox kawncau Nawh khankix, kix ah ka kix heue. 16Viang mawh nan Yesux kok kix hoek ka ti ah nin, “Kieh kawn nyawm iak khankix hoek ka Aux, paw sidien ka kix, kheu meung Siyiex mawh cie pa awm kix heue. 17Aux krai lox tete ka pex, pui mawx ang ah, pa ang rieb ti teei Meung Siyiex awm kawn nyawm iak, tak ang pon ti laig tan heue.”

Grawng Cao Mi Awn Ju

(Mat 19:16-30; Mak 10:17-31)

18Cao mi pui awnju tix kaux hoek ti chawk Nawh Cao ah nin, “Sara cao gau pa mhawm eue, sonsang pon aux, ju leeing ju aux tak sang yuh ka mawx?” 19Yesux pawk lox ah nin ka nawh, “Kheu maix lai kok Aux mawh, pa mhawm? Lheu khaing Siyiex tix kaux khaing, tix kaux kawx ang mhawm heue. 20Maix tawng lox pingnyap khankix, paw lud vao, paw teei ju pui yum, paw briex, paw kham mhai ruk pa ang mawh meh, yungyi ka miex keeing tix heue.” 21Kaw an pawk ah nin, “Aux hoik hawt ti yuh ceu an khankix khawmuik, tom yam iak aux heue.” 22Yam mhong Yesux lox an, Nawh Cao ah nin ka nawh, “Kawn koe pa cha maix tix ceu khaing. Hu coh pa koe maix khawmuik mai tawx ka pui hot sia khankix mai maix tak koe kraung khrai ka daux meung raoma mai hoek ti hawt Aux heue.” 23Viang mawh nan, yam mhong nawh ceu an khankix, nawh kied khi rhawm, kheu mawh nawh pa kied koe heue. 24Yesux jhak ka nawh ah nin, “Pui pa mawh cao mi nu sonsang laig ka daux meung Siyiex miex ding heue. 25Laig kala-uk ka daux kre nyex lheu yie khaing laig cao mi ka daux meung Siyiex heue.” 26Kix pa mhong lox an chawk ah nin, “Phan mawh nan, pui mawx tak sang pon hoek krax taoh?” 27Nawh Cao deeh ah nin, “Ceu pa ang kawn pui chix yuh, Siyiex chix yuh heue.” 28Petrux ah nin, “Jhak heue, ex hoik prah grham cie ex mai hawt khaix Maix heue.” 29Nawh Cao baox ah nin ka kix, “Aux krai lox tete ka pex, ang koe pui tix kaux kawx, pa hoik prah grham nyiex nawh, phan ang mawh nan, moeng nawh, puxaik nawh, miex keeing nawh, kawn praix nawh, kheu son meung Siyiex. 30Pa tak ang baox nie lheu pon ka daux bawg yam in mai ju leeing ju ka daux ju khaix heue.”

Krai Grawng Yum Tix

(Mat 20:17-19; Mak 10:32-34)

31Nawh Cao kok kawncau tix kao ra kaux ah nin ka kix, “Jhak heue, ex tak sang haok hu ka veng Yerusaliem, ceu pa hoik tiem cao jhai khankix ti deuh, tak sang grum mawh ka Kawn kawn pui heue. 32Grawh grawng nawh, tak sang teei ti tawx Nawh ka pui tang ceu, yuh pa ang cee ang cad mai pa ang khaw ang jiet mai baig rawm myia ka heue. 33Kix tak sang sivied Nawh, teei Nawh yum, yam hoik hoek loe ngaix Nawh tak deeh kaoh im heue.” 34Kawncau Nawh khankix ang tawng grawng ceu in khankix, tix ceu kawx heue. Mawh kheu hoik mox lox in khaing kix mai kix ang tawng grawng ceu pa ah Nawh Cao heue.

Pai Ngai Batimie Moi

(Mat 20:29-34; Mak 10:46-52)

35Yam hoek Nawh Cao dex ka veng Yerikho, pui dugngai tix kaux ngawm dex krax mai caung ti ih heue. 36Kheu mhong nawh cub pui hun hu daux krax, nawh tom chawk grawng in mawh pa yuh ka mawx. 37Kix krai ka nawh, mawh Yesux pui veng Nazariet pa hu lawng krax heue. 38Kaw an kok yo ah nin, “Yesux kawn Davit eue, caux rhawm ka aux liak.” 39Pui pa hu sivoe khankix, ah ka nawh, sonsang yawg nawh tix heue. Viang mawh nan nawh nie baox yo ah nin, “Kawn Davit eue, caux rhawm ka aux liak” 40Yesux cung mai tawx lox, nhie kix viex kaw an hoek ka tix, yam hoek nawh dex, Nawh Cao chawk ka nawh ah nin, 41“Maix simie ti kieh Aux yuh patix son maix?” Kaw an ah nin, “Simiang eue, kieh ngai aux chix yaox liak” 42Yesux baox ah nin ka nawh, “Kieh yaox heue, krax yum rhawm maix hoik kieh maix moi” 43Dom mawx dom an kaw an chix yaox mai yaog yaw Siyiex, hawt khaix Nawh Cao. Yam yaox pui khawmuik ceu an, kix yaog yaw Siyiex heue.

Currently Selected:

LUKAX 18: WCL

Highlight

Copy