LUKAX 13

Doh Keud Ka Phimap tix

1Daux bawg yam an pui ot tan tix blah, pa krai ka Nawh Cao grawh grawng pui Galilie tix blah, pa hoik kieh Pilat nham kix kluklao tau mai pa tan pa lu kix heue. 2Nawh Cao pawk lox ah nin ka kix, “Pex ce pui Galilie khankix nie ting phimap khaing pui Galilie tang kaux khawmuik, kheu hoik kham geu kix ceu an khankix lie? 3Aux krai ka pex, ang mawh. Viang mawh pex kawx, phan pex ang doh keud ka phimap tix, pex tak sang laux leeing awm an khawmuik heue. 4Phan ang mawh nan kix kao kaux daix, pa hoik grhup dheem nyiex lhaong Silom kix yum, pex ce kix nie lheu lud khaing pui pa ot ka daux veng Yerusaliem khawmuik lie? 5Aux krai ka pex, ang mawh. Viang mawh pex kawx, phan pex ang doh keud ka phimap tix, pex tak sang laux leeing awm an khawmuik heue.”

Khaox Ruh Ang Koe Plix

6Nawh Cao baox krai lox tiag in, “Pui tix kaux koe khaox ruh pa hoik sum ka daux sipeem nawh tix khaox, nawh hoek ti sawg plix ka khaox an, ang yaox tidtix heue. 7Nawh ah nin ka pui pa pau sipeem. Jhak heue. Daux loe num pa hoik luan in, aux hoek ti sawg plix ka khaox ruh in, ang yaox tidtix. Kid ti tik heue. Yuh patix kieh nawh kram haktiex yuh nin? 8Pui pa pau sipeem an, pawk lox ah nin ka nawh, Simiang ka daux num in kawx, kawn grham nawh ha, tom hoik ciag aux sivie num nawh mai sau phon kah heue. 9Khaix in phan nawh chix plix mhawm heue, ang plix maix pon kid ti tik heue.”

Pai Bun Laig Phi

10Ka daux ngaix twah tix ngaix, yam sidiex gau Nawh Cao ka daux nyiex sidiex, 11bun tix kaux, pa hoik laig phi pa kieh nawh saux kao daix num. Nawh hoik pompox sikrawng, tom ang pon yaog tokaux tix ceeix kawx heue. 12Yam yaox Yesux nawh, Nawh Cao ah nin ka nawh, “Bun eue, maix hoik luan khaing jhawm saux tix heue.” 13Nawh Cao teei taix tix deuh ka piang nawh, nawh uik see dom mawx dom an mai yaogyaw bwanson Siyiex heue. 14Viang mawh nan, pui giex kaing nyiex sidiex an, song rhawm kheu cox Yesux jhawm saux moi ngaix twah mai ah nin ka cub pui hun khankix, “Koe liah ngaix pa khaw pui ti yuh kaing jhaw. Hoek ka daux ngaix an khankix, paw vi hoek sonsang kieh cox jhawm saux pex moi, ka daux ngaix twah heue.” 15Simiang pawk lox ka nawh ah nin, “Pui pie pui lhen khankix eue, pex ku kaux daux pui, ploi mawie ploi la khaing kawg mai tuk ti tawx hu nyaux rawm, ngaix twah ang mawh lie? 16Bun in, pa mawh kawn bun Abraham, pa hoik phyawk Satan ka daux kao daix num, ang khaw ti ploi nawh khaing pa hoik phyawk tix, ka daux ngaix twah lie?” 17Yam ah Nawh Cao nan, pui pa koeng ka Nawh khawmuik, koe krax kaig heue. Cub pui hun khawmuik, gaux rhawm ka grawh grawng ceu pa ting min plakngai pa yuh Nawh Cao khankix heue.

Lox Tiag Simie Taux Klaox

(Mat 13:31-32; Mak 4:30-32)

18Nawh Cao baox ah nin, “Meung Siyiex awm ceu patix? Aux tak plak kieh awm patix? 19Awm simie taux klaox tix mu, pa rhuat pui tix kaux, ka daux sipeem tix heue. Nawh ting lhaong, lih mawh khaox ting, sim raoma hoek ti ot ti laux ka piang kak nawh khankix heue.”

Lox Tiag Grawng Susaix

(Mat 13:33)

20Nawh Cao baox deeh ah nin, “Aux tak plak kieh Meung Siyiex awm patix? 21Awm susaix pa teei bun tix kaux mai mox ka daux phawng gaox loe glawm, tom susaix an hoik laig ka daux khawmuik mai kieh ploh heue.”

Siviex Pa Sikhawp

(Mat 7:13-14,21-23)

22Yam hu kawncau Nawh Cao krax, Nawh hu preeng daux veng daux yaong khankix, sidiex gau mai baox loi hu ka veng Yerusaliem heue. 23Pui tix kaux chawk Nawh Cao ah nin, “Simiang eue, tux pui pa sang hoek krax taoh lie?” Nawh Cao ah nin ka kix, 24“Nied ti coca sonsang pon ti laig ka siviex pa sikhawp sighiep heue. Mawh kheu, Aux krai ka pex, pui tom nie tak sang sawg ti laig kah mai ang pon laig heue. 25Yam hoik kaoh cao nyiex mai hoik song siviex mai pex cung plak praix mai gleuh siviex ah nin, Simiang eue, paoh siviex son ex liak heue. Nawh tak pawk lox mai ah nin ka pex, grawng kaoh pex khaing dee mawx Aux ang tawng heue. 26Yam an pex tak sang ah nin, ex hoik ih hoik nyaux dee ot Maix mai Maix hoik sidiex gau ka daux krax cie ex khankix heue. 27Nawh tak sang baox ah nin, Aux krai ka pex, Aux ang tawng dee kaoh pex, pex pa mawh pui pa yuh pa ang rahsee khawmuik, lih hu khaing Aux heue. 28Yam yaox pex Abraham mai Icak mai Yakop mai cao jhai khawmuik, ka daux meung Siyiex mai hoik taing hoik tik tokaux pex plak praix, tak sang yiiem riag mai greeik rhang heue. 29Kix tak kaoh hoek khaing plak lih singaix mai plak klip singaix, khaing caong ma seh, caong ma laong, ngawm ka daux meung Siyiex heue. 30Jhak heue, kix pa dhah khaix tix blah tak hoek ka mai kix pa hoek ka tix blah tak dhah khaix heue.”

Krax Moh Yesux

(Mat 23:37-39)

31Ka daux bawg yam nari an Pharishie tix blah hoek ti ah nin ka Nawh Cao, “Maix lih hu khaing tin, kheu simiang Herut simie ti phah Maix yum heue.” 32Nawh Cao ah nin ka kix, “Hu krai ka sox praix an, Aux sang grheu phicaox khankix lih mai cox jhawm saux moi, singaix mai pasax, ka daux loe ngaix Aux tak grum mhawm heue. 33Viang mawh nan, Aux tak hu krax hu Aux, in ngaix mai pasax mai sikaox, mawh kheu Cao jhai tix kaux kawx ang khaw ti laux leeing, plak praix veng Yerusaliem heue. 34Veng Yerusaliem eue, veng Yerusaliem, pa teei cao jhai khankix yum mai dheem pui pa ploi hoek ka maix ka simaox, Aux simie ti khrawm kawn praix maix, awm ia miex khrawm kawn tix greem pruik nawh miex bawg maix ang kieh Aux yuh. 35Jhak heue, hoik grham nyiex pex yi ka pex heue. Aux krai ka pex, pex tak ang lai baox yaox Aux, tom pex ah, “Kaw pa hoek ka daux ceu kaux Simiang ting bwanson heue.”

Currently Selected:

LUKAX 13: WCL

Highlight

Copy