LUKAX 12

Rien Rhawm Ka Pui Pie Lhen

(Mat 10:26-27)

1Daux bawg yam an, yam cub pui pa ang lai uik simin tom nie khrawm paox tix, tom dig kix piang paox tix, tix kaux lai tix kaux, Nawh Cao jah ti ah nin phao ka, ka kawncau Nawh khankix, “Rien rhawm tix ka susaix Pharishie khankix, pa mawh pa pie pa lhen heue. 2Viang mawh nan ang koe tix ceu kawx, pa hoik kheem hoik tawb, pa tak ang deeh hoe mai pa hoik mox ang koe tix ceu kawx, pa ang deeh kieh tawng heue. 3Mawh kheu nan, pex hoik ah ceu pa yuh ka mawx ang ah ka daux pa faik, tak sang mhong ka daux pa riang heue. lox pa hoik ah pex ka yhaok, ka daux lawg plak daux, tak sang yo khaing piang prang nyiex heue.

Pa Caw Ex Ti Lhat

(Mat 10:28-31)

4Paox grawm Aux khankix eue, Aux ah ka pex, paw lhat ka kix pa chix teei tokaux yum mai pa ang chix yuh tidtix khaix an heue. 5Viang mawh nan, Aux sang krai ka pex grawh grawng khaw pex ti lhat ka pa yuh ka mawx. Lhat ka kaw pa teei yum mai koe sibrawm ti taing sau ka daux mawnarhok. Mawh heue. Aux krai ka pex, lhat ka kaw an heue. 6Ngawh coh saik phwan mu mawh asarix ra piak, ang mawh lie? Siyiex ang piawm saik khankix tix mu kawx heue. 7Viang mawh hauk kaing pex kawx hoik simin khawmuik heue. Paw vi lhat kah, kheu nie lheu mhawm pex khaing saik heue.

Pui Pa Rieb Mai Pui Pa Thiang

(Mat 10:32-33, 12:32, 10:19-20)

8Aux krai ka pex, pui pa kham ti rieb ti teei Aux ku kaux plak sivoe ngai kawn pui, Kawn kawn pui kawx, tak sang kham ti rieb ti teei nawh plak sivoe ngai kawncau Siyiex khankix heue. 9Viang mawh nan pui pa thiang ti tik Aux sivoe kawn pui, Aux tak sang thiang ti tik nawh sivoe ngai kawncau Siyiex khankix heue. 10Pui pa ah lox map ka Kawn kawn pui ku kaux, tak sang pluat sang ploi phimap nawh heue. Viang mawh nan kaw pa salao ka Khuan Singax Singeh, tak ang pluat ploi nawh heue. 11Yam viex kix pex sivoe nyiex sidiex khankix mai pui giex kaing khankix mai simiang khankix, paw khi rhawm grawh grawng lox pa sang pawk sang ah pex. 12Mawh kheu Khuan Singax Singeh tak sang gau pex ka daux bawg yam nari an, grawng pa khaw pex ti ah lox pa yuh ka mawx heue.

Caomi Pa Daox

13Pui tix kaux ka daux cub pui hun an, ah nin ka Nawh Cao, “Sara Cao Gau eue, nhie puxke aux gwieh sin ka aux liak” 14Viang mawh nan Nawh Cao chawk ah nin ka kaw an, “Pui eue, mawx pa kieh Aux mawh cao prawng cao gwieh ka piang pax?” 15Nawh Cao baox ah nin ka kix, “Rien rhawm tix son ang sang ghoing kah heue. Mawh kheu ju pui ang ot ka daux pa haoh sin ngao pa koe tix heue.” 16Nawh Cao baox krai ka kix daux lox tiag ah nin, “Haktiex cao mi tix kaux kied nie pon plix heue. 17Nawh keud ti ah nin ka daux tokaux tix, Aux tak sang yuh ka mawx? Kheu ang aux koe dee een plix cie tix khankix heue. 18Nawh baox ah nin, Aux tak yuh nin heue. Aux sang yieh nyiex krao aux khankix mai baox deeh yuh pa nie ting mai an tak sau nghox ca mai sin ngao aux tan heue. 19Aux tak ah nin ka ju aux. Ju eue, maix hoik nie koe sin ngao pa hoik deuh, son num tom nie heue, laux lee tix, ih nyaux mai gaux rhawm heue. 20Viang mawh nan, Siyiex ah nin ka nawh, Pui daox eue, tak teei ju maix khaing maix ka daux sawm in heue. Ceu pa hoik cox hoik priex maix khankix, tak mawh cie pui mawx? 21Kaw pa sawg ti een kraung khrai son tokaux tix mai pa ang koe pa hot plak Siyiex, awm cao mi an heue.”

Paw Khi Rhawm

(Mat 6:25-34)

22Nawh Cao ah nin ka kawncau Nawh khankix, “Mawh kheu nan Aux ah nin ka pex, pex sang ih pa yuh ka mawx, son ju tix mai sang ceep pa yuh ka mawx son tokaux tix, paw vi khi kah. 23Kheu ju lheu mhawm khaing pa ih mai tokaux lheu mhawm khaing kraung ceep heue. 24Keud ti yaox grawh grawng lak khankix, kix ang rhuat ang van mai kix ang vawg ang pat mai kix ang koe lawg koe krao dee een kraung, viang mawh nan Siyiex tawx kix sawm. Pex lheu ngawh lheu mhawm khaing sim khankix miex ding? 25Mawh kheu krax khi rhawm, ka daux pex, mawx pa chix kieh, tokaux tix baox lhaong tix sawk? 26Phan pex ang chix yuh ceu pa nie iak khaing paox tix, pex lai khi rhawm grawh grawng tang ceu pa taig khankix yuh ka mawx? 27Keud ti yaox grawh grawng tai siyak, chix ting chix lhaong yuh ka mawx, kix ang yuh kaing mai ang kling, viang mawh nan Aux krai ka pex, viang mawh kraung pa ceep simiang Sawlamon pa ting min plakngai, ang mhawm awm tai an khankix tix kho kawx heue. 28Pex pa iak krax yum rhawm eue, phan Siyiex tawx pa ceep pa mhawm awm an, ka num rib num riem daux tiagtu, pa koe singaix mai pa teei tix sau ka daux, daux ngu pasax, Nawh sang tawx kraung ceep pa lheu khaing an ka pex ang mawh lie? 29Paw sawg, son pa sang ih pex, son pa sang nyaux pex, paw kieh koe krax ang yum rhawm pa keud jee keud blaong. 30Mawh kheu pui piang meung haktiex khankix khawmuik, sawg ceu an khankix heue. Viang mawh nan Keeing pex tawng grawh grawng pa lo pex ceu in khankix heue. 31Mawh kheu nan sawg Meung Siyiex ha mai ceu in khankix tak sang baox tawx ka pex heue.

Sinngao Meung Raoma

(Mat 6:19-21)

32Cub yung iak eue, paw lhat graung, mawh kheu Keeing pex koe rhawm ti tawx meung an ka pex heue. 33Coh pa koe pex mai yuh bwanson tawx ka pui hot pui sibhawm khankix heue. Yuh hau pa ang chix prim, pa mawh sinngao daux meung raoma, pa ang chix uik chix laux, dee ang pui briex pon hoek dex, dee ang pung piang siah yuh laux heue. 34Mawh kheu koe sin ngao pex dee mawx, rhawm pex kawx koe tan heue.

Siliex Krox Jun Khankix

35“Rawd nyoi pex mai kieh kawk ngu pex lah heue. 36Kieh tokaux pex mawh awm pui pa krox ti jhak son simiang kix, yam deeh hoek nawh khaing dee ih kapaox heue. Kheu yam deeh hoek nawh mai gleuh siviex. Kix tak pon ti paoh son nawh dom mawx dom an heue. 37Yam deeh hoek simiang, siliex pa yaox nawh, krox ti pau son nawh khankix, ting bwanson heue. Aux krai lox tete ka pex, nawh tak sang nhawt maox rawd nyoi tix mai kieh kix ngawm tix sawm mai tokaux nawh tak sang khan kheu ka kix heue. 38Phan nawh sang deeh hoek pon sawm, bawg yam pau ra bawg tix bawg ang ah, bawg yam pau loe bawg tix bawg ang ah mai yaox kix yuh nan, siliex khankix ting bwanson heue. 39Kieh tawng ceu in heue. Phan cao nyiex tawng bawg yam nari sang hoek pui briex, nawh tak sang pau ti jhak mai ang grham ang kieh yieh ti laig daux nyiex tix heue. 40Mawh kheu nan, pex rien rhawm tix, kheu daux bawg yam nari, yam ang pex ce Kawn kawn pui tak sang hoek heue.”

Pa Kaux Mai Pa Ang Kaux Sijax

(Mat 24:45-51)

41Petrux chawk ah nin, “Simiang eue, Maix ah lox tiag in ka ex lie, phan ang mawh nan ah ka pui khawmuik lie?” 42Simiang deeh ah nin, “Siliex pa kaux sijax mai pa koe pingnya, pa hoik kieh simiang nawh ting piang geh nyiex tix, sonsang tawx nyum pa ih, ka kix yam hoek bawg yam pa khaw ti tawx, mawh mawx? 43Yam deeh hoek, simiang nawh siliex pa yaox nawh yuh nan, ting bwanson heue. 44Aux krai lox pa mawh meh ka pex, simiang nawh tak kieh nawh ting piang pa koe nawh khawmuik heue. 45Viang mawh nan phan siliex an keud ti ah nin daux rhawm tix, Simiang aux tak sang koi hoek mai jah ti tap simex siliex mai bun siliex khankix mai ih mai nyaux tom yoek tix. 46Simiang nawh tak hoek ka daux singaix pa ang nawh keud nawh ce mai daux bawg yam nari pa ang nawh tawng mai mug nawh dud mai teei nawh deuh tau mai pui pa ang kaux sijax khankix heue. 47Siliex pa tawng alo pa caw simiang tix, ang yuh ti rien, awm alo pa caw simiang nawh, tak sang sivied nawh tom nie taix heue. 48Viang mawh nan kaw pa ang tawng mai hoik yuh ceu pa khaw ti sivied nawh kah tak sang sivied nawh ceeix ngie heue. Pui mawx ang ah, pa hoik tawx ka nawh tom nie, tak sang yuh ti teei khaing nawh tom nie heue. Ka pui mawx ang ah pa hoik tawx ka daux tawm taix nawh tom nie, tak sang deeh rawg deeh mhaing khaing nawh tom nie heue.

Tak Gwieh Paox Kheu Yesux

(Mat 10:34-36)

49“Aux hoek sonsang taing ngu ka piang haktiex mai alo Aux mawh pa yuh ka mawx? Viang mawh yam in kawx, phan ngu an hoik cap mhawm heue. 50Lheu khaing an, Aux koe krax cubcom, pa tak lai cubcom Aux ka tix ceu mai ka ang nyang bax hoik bawg yam an, Aux kied khi rhawm ka miex ding heue. 51Pex ce Aux hoek ti tawx krax nhim rhawm ka piang haktiex in lie? Aux krai ka pex ang mawh, hoek ti kieh gwieh paox tix heue. 52Mawh kheu khaix in, ka daux nyiex tix lhang, pa koe phwan kaux tak gwieh ang khaw paox tix heue. Loe kaux an ang khaw ka kiex ra kaux mai kiex ra kaux ang khaw ka kix loe kaux heue. 53Kix tak sang gwieh paox tix, keeing tak ang khaw ka kawn simex tix, kawn simex kawx tak ang khaw ka keeing nawh. Miex tak ang khaw ka kawn bun tix, kawn bun kawx tak ang khaw ka miex nawh. Yiex tak ang khaw ka mun tix, mun kawx tak ang khaw ka yiex nawh heue.”

Kieh Chix Tawng Bawg Yam

(Mat 16:2-3)

54Nawh Cao baox ah nin ka cub pui hun khankix, “Yam yaox pex paiawm haok plak klip singaix, dom mawx dom an, pex ah tak lhiex heue. Mawh heue. 55Yam yaox pex phlu bhaung khaing plak caong ma seh, pex ah, tak kied sieet siaoh heue. Mawh heue. 56Pex pa mawh pui pie lhen eue, pex chix jhak chix tawng mhai haktiex mai raoma heue. Kheu, pex khex ang chix tawng ka grawh grawng bawg yam, yam in?

Yuh Mhawm Ka Pui Rahsee

(Mat 5:25-26)

57Yuh patix tokaux pex ang chix tawng, mawh pa yuh ka mawx, pa mawh pa rahsee? 58Yam hu maix ka simiang, tau mai kaw pa sang yuh see ka maix, nied tiyuh sonsang mhawm lox an hawt krax, phan ang mawh nan, ha nawh kox reu maix hu ka cao prawng see, cao prawng see an tak teei ti tawx maix ka cao giex kaing, cao giex kaing sau maix ka daux thawng heue. 59Aux krai ka maix, maix ang pon lih khaing dee an, tom sidah ang maix nyang bax plud mau ghoik tix piak heue.”

Currently Selected:

LUKAX 12: WCL

Highlight

Copy