LUKAX 14

Pai Saux Pang Vaig Moi

1Ka daux ngaix twah tix singaix, Nawh Cao hu ka daux nyiex simiang Pharishie tix kaux, sonsang sawm mai kix jiang Nawh heue. 2Jhak heue, pui tix kaux pa koe jhawm saux pang daux vaig mai uah tix, ot ka sivoe Nawh Cao tan heue. 3Yesux chawk ah nin, ka pui tawng pui prawng lai been mai Pharishie khankix, “Khaw ti cox jhawm saux moi ka daux ngaix twah lie, ang khaw lie?” 4Viang mawh nan kix ang nye heue. Nawh Cao teei kaw an, cox jhawm saux nawh moi mai kieh nawh hu heue. 5Nawh Cao baox chawk ah nin ka kix, “Ka daux pex tix kaux kaux pa koe la phan ang mawh nan pa koe mawie, pa rau ka daux o ngaix twah, pa tak ang bluh nawh lih dom mawx dom an koe lie?” 6Kix ang pon pawk lox ka grawh grawng ceu an heue.

Ngawm Dee Tiem

7Yam yaox Nawh Cao pui pa hoik kok hoek ti sawm khankix laug dee ngawm pa mhawm khaing paox tix, Nawh krai lox tiag yuh nin ka kix. 8“Yam kok pui tix kaux kaux maix ih ka paox, paw vi ngawm neung dee mhawm khaing paox tix, ha nawh hoik kok pui pa lheu ting min plakngai khaing maix, 9pui pa kok maix mai kaw an, hoek ti ah nin ka maix, yoi maix, son kaw in heue. Yam an maix tak koe krax kaig mai lih hu dee tiem khaing paox tix heue. 10Viang mawh nan, yam kok pui maix, hu ngawm neung dee nie tiem khaing paox tix, yuh ka mawx son yam hoek kaw pa kok maix, nawh tak ah nin ka maix, paox grawm eue, haok ka dee lhaong heue. Yam an maix tak koe min plakngai, sivoe kix pa ngawm sawm tau mai maix khawmuik heue. 11Mawh kheu pui mawx ang ah, pa yaog tokaux tix lhaong, tak sang yeen nawh tiem mai pui mawx ang ah, pa yuh tokaux tix tiem, tak sang yaog nawh lhaong heue.” 12Viang mawh ka kaw pa hoik kok Nawh Cao kawx, Nawh ah nin, “Yam kok maix ti khan kheu priex ngaix, priex bo, paw vi kok paox grawm maix mai puxaik maix mai paox ceu paox cat maix mai paox plawg maix pa mawh cao mi khankix, phan yuh nan kix kawx tak deeh kok maix mai deeh pawk bwanson maix heue. 13Viang mawh nan yam yuh maix pawie, kok pui hot pui sibhawm mai pui laux maung mai pui laux caong mai pui dug ngai khankix, 14mai maix tak pon bwanson heue. Mawh kheu kix ang pon deeh pawk bwanson maix heue. Daux bawg yam deeh kaoh pui rahsee khankix sax maix tak sang deeh pon bwanson heue.”

Priex Bo Pa Ting

(Mat 22:1-14)

15Yam ngawm neung pui pa sawm tau mai Nawh Cao tix kaux, mhong lox ceu an khankix nawh ah nin ka Nawh Cao, “Kaw pa tak pon ti ih blah ka daux meung Siyiex, ting bwanson heue. 16Viang mawh nan, Nawh Cao ah nin ka kaw an, “Pui tix kaux khrex priex bo ting mai ghaok pui tom nie. 17Yam hoek bawg yam sawm, nawh ploi kawncau tix, hu nhie pui pa hoik ghaok khankix hoek ah nin, hoek heue, kheu hoik cox hoik khrex kuceu, 18kix khawmuik, awm rhawm paox tix, nieb ah lox sonsang luan tix heue. Kaw phao ka ah nin ka nawh, Aux hoik liag ma tix gwang mai aux tak lai hu ti jhak heue. Aux khyox khaw ka maix, ploi aux liak ha 19tang kaux tix kaux ah nin, Aux hoik liag moi phwan brawm, aux sang hu cheu ti yaox kix heue. Aux khyox khaw ka maix, ploi aux liak ha, 20tang kaux tix kaux baox ah nin, Aux hoik teei ti koe moeng, mawh kheu nan aux ang pon hoek heue. 21Kawncau an deeh hoek mai krai grawh grawng ceu an khankix ka simiang nawh heue. Yam an cao nyiex an song rhawm mai ah nin ka kawncau an, nied ti hu ka gah krax ting gah krax iak, ka daux veng mai viex pui hot pui sibhawm mai pui laux maung mai pui dug ngai mai pui laux caong khankix hoek heue. 22Kawncau an ah nin, Simiang eue, hoik yuh awm pa nhie maix, viang mawh nan ang nyang bax naog, kawn koe dee ot heue. 23Simiang an baox deeh ah nin ka kawncau nawh an, lih hu ka gah krax ting khankix mai deeh koe khaox vie khankix mai khin kix hoek, yuh ka mawx, sonsang naog nyiex aux heue. 24Grawh grawng nawh, aux krai ka pex, pui pa hoik ghaok phao ka khankix tix kaux kawx tak ang pon ti laik priex bo aux heue.”

Pa Keung Ti Mawh Kawncau

(Mat 10:37-38)

25Cub pui hun tom nie, hu tau mai Nawh Cao mai Nawh veeh ti ah nin ka kix, 26“Phan pui tix kaux kaux hoek ka Aux, ang koeng ka miex tix, keeing tix, moeng tix, kawn praix tix, puxaik tix, nan tix mai khawm ju tix kawx, nawh ang pon ti mawh kawncau Aux heue. 27Pui mawx ang ah, pa ang klawm khaox lhak tokaux tix mai hawt khaix Aux, ang pon ti mawh kawncau Aux heue. 28Mawh kheu ka daux pex koe pui mawx, pa simie ti yuh nyiex lhaong, pa ang ngawm phao ka mai sawn ti yaox grawh grawng sang uik miex ding mai grawh grawng nawh koe mau sang kub ti yuh tom hoik lie, ang kub lie? 29Phan ang mawh nan, khaix hoik kaw nawh num, ha nawh ang pon yuh tom hoik, pui khawmuik tak ne raw ka nawh, 30ah nin, pui in jah ti sum mai ang pon yuh tom hoik heue. 31Phan ang mawh nan koe simiang mawx, pa sang hu ti puing simiang tang kaux, pa ang ngawm ti kum kawng grawh grawng nawh pon teei pui tix mheen ngie mai pon ti hu cha paox tix, ka simiang pa viex pui ra mheen lie, ang pon lie? 32Phan ang mawh nan, phan nawh yiag tix ang pex, yam kawn ot simiang an dee singai, nawh tak sang ploi cao cau hu khyox khaw, son ang naing sang jih mai kieh yien heue. 33Mawh kheu nan ka daux pex, pui mawx ang ah pa ang tik ang grham ceu pa koe tokaux tix khawmuik, ang pon ti mawh kawncau Aux heue.

Kih Pa Ang Laoh

(Mat 5:1-3; Mak 9:5-10)

34Kih kienie mawh pa mhawm, viang mawh kih kawx, phan pa laoh nawh hoik grai, tak sang deeh teei pa chix kieh nawh laoh yuh ka mawx? 35Ang mhawm son haktiex, viang mawh son pum phon kawx ang mhawm. Pui tik nawh plak praix khaing. Kaw pa koe yhaok ti mhong, kieh nawh mhong heue.”

Currently Selected:

LUKAX 14: WCL

Highlight

Copy