YAM JAH 6
6
Pa Caox Caig Kawn Pui
1Yam jah kawn pui lih ti haoh hun ka piang haktiex, kix koe kawn sibun tom nie, 2Kawn simex Siyiex khankix yaox mhawm grang kawn bun kawn pui, kix laug ti teei mawh moeng tix heue. 3Simiang Siyiex ah nin, “Khwan Aux tak ang lai ot ka daux kawn pui leeing ju, kheu mawh nawh nex nham, Aux tak sang kieh baux ju nawh die ngie tix yieh tixnga num heue.” 4Yam an pui pa ting lhaong#Si 13:33 lih koe piang haktiex, Kawn simex Siyiex khankix, teei ti moeng kawn bun kawn pui, kix pon kawn praix pa ting riang rao, pa ao min tom yam an son cao tix heue. 5Simiang Siyiex yaox pa caox caig yuh kawn pui hoik ting lhaong piang haktiex, krax keud kix, mawh pa ang mhawm khaing heue. 6Simiang Siyiex laux rhawm ka pa phan pa yuh tix kawn pui piang haktiex, Nawh Cao kied kleuh sigrien sigre heue. 7Mawh kheu nan, Simiang Siyiex ah nin, “Aux kied kleuh ka pa hoik phan hoik yuh ti kawn pui, Aux tak sang yuh can pa koe piang haktiex in laux leeing jah ka kawn pui tom hoek ka totiag can pa chix mu piang tiex khankix mai sim sai raoma khankix heue.” 8Viang mawh nan, Noax mawh pui pa caw rhawm sivoe ngai Simiang Siyiex heue.#Mat 24:37; Luk 17:26
Noax Yuh Reu Ting
9In mawh grawng doeh ru Noax, Noax mawh pui pa rahsee#2Pe 2:5 mai pa grum naog, daux doeh ru nawh, nawh mawh pa hu tau mai Siyiex. 10Noax koe kawn simex loe kaux, pa mawh Shemax, Hamax mai Yaphiet heue. 11Kawn pui haktiex hoik yuh pa caox caig sivoe ngai Siyiex, piang haktiex in naog ka ceu pa lang teung heue. 12Siyiex jhak ka haktiex, Nawh Cao hoik yaox ka laux leeing cux sium haktiex, nex nham kawn pui khankix kawx hoik hu ka daux pa laux leeing haktiex heue. 13Siyiex ah nin ka Noax, “Dee sidah bawg yam kawn pui hoik hoek plak sivoe ngai Aux, mawh kheu hoik naog pa kied lang teung piang haktiex jao kix, jhak heue, Aux tak sang yuh kix laux tau mai haktiex heue.
14“Yuh reu ting tix mu son cao maix, ka khaox gawpharax, yuh lawg khankix koe daux reu, kraix peeh khaox gix ka plak daux mai plak praix heue.” 15“Pa sang caw maix ti yuh mawh nin, krax lang reu kieh koe loe yieh sawk, krax vieh kieh koe tixphwan sawk, krax lhaong kieh koe tixngoe sawk heue.” 16“Yuh siviex iak koe ka reu an, kieh tiiem greem braux tix sawk, kieh ding siviex koe ka praok reu, yuh reu an koe loe thaix, pa mawh thaix plak greem, thaix sigreung mai thaix plak piang heue, 17Jhak heue, Tokaux Aux sang kieh rawm kheem piang haktiex, sonsang yuh kawn pui pa im ju pa koe greem raoma mai can ceu pa koe piang haktiex khawmuik khawm leeing yum heue.” 18Viang mawh nan, Aux tak deuh lox sijax mukheu tix ka maix, tokaux maix, kawn simex maix, moeng maix mai mun maix khankix, tak yaox ti laig daux reu heue. 19“Maix tak yaox ti viex totiag pa im ju mhaing mai shiang ku mawx ku an laig ka daux reu sonsang priex maix kix im ju tau mai maix heue. 20Sim ceu mawx ceu an, totiag ceu mawx ceu an, can pa chix mu piang tiex, ceu mawx ceu an, pa mawh mhaing mai shiang ku mawx ku an hoek ka maix mai priex kix im ju heue.” 21“Maix tak sang yaox ti khrawm pa ih son cao maix mai pa ih son kix khawmuik heue.” 22Mawh kheu nan, Noax yuh kuceu#He 11:7 awm gumlox pa hoik tawm Simiang Siyiex ka nawh heue.
Currently Selected:
YAM JAH 6: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012