YAM JAH 7
7
Pa Kheem Rawm
1Khaix an Simiang Siyiex ah nin ka Noax, “Maix mai nyiex ma maix khawmuik laig ka daux reu, mawh kheu Aux hoik yaox pa rahsee maix sivoe tix, daux doeh ru inkix heue.” 2“Maix teei totiag mhaing mai shiang pa singax aliah ku mai totiag mhaing mai shiang pa ang singax ra ku, 3Sim daux raoma tix ceu aliah ku khawm mhaing mai shiang, sonsang priex maix doeh ru kix im ju piang haktiex khawmuik heue. 4Grawh grawng nawh, khaix hoik naog aliah ngaix Aux tak sang kieh lhiex lih piang haktiex in tixpon ngaix tixpon sawm mai Aux tak kieh can ceu pa im ju, pa hoik phan hoik yuh Aux khankix laux leeing piang haktiex in heue.” 5Noax yuh kuceu awm gumlox tawm Simiang Siyiex ka nawh heue. 6Yam kheem rawm piang haktiex Noax koe ju liah yieh num heue. 7Mawh kheu nan, Noax mai kawn simex nawh, moeng nawh mai mun nawh, khankix laig daux reu#Mat 24:38,39; Luk 17:27 sonsang luad luan khaing pa kheem rawm heue. 8Totiag pa singax mai pa ang singax, sim sai raoma mai can ceu pa chix mu chix hu piang tiex, 9ku mawx ku an, laig daux reu tau mai Noax, mhaing mai shiang awm gumlox tawm Simiang Siyiex ka Noax heue. 10Khaix hoik hoek aliah singaix, rawm khankix, lih kheem piang haktiex heue. 11Yam koe ju Noax liah yieh num, daux khix ra kao aliah singaix daux khix an rawm keut khaing dee raux khawmuik hoik bih mai siviex raoma hoik baoh heue.#2Pe 3:6 12Lhiex lih piang haktiex tixpon ngaix tixpon sawm heue. 13Ka daux singaix an, Noax mai kawn simex nawh Shemax, Hamax, Yaphiet, moeng nawh mai mun nawh loe kaux laig daux reu heue. 14Kix mai totiag ceu mawx ceu an, tobrie ceu mawx ceu an mai totiag pa chix mu chix hu piang tiex ceu mawx ceu an, sim raoma ceu mawx ceu an kuceu khankix, 15Totiag pa im ju mhaing mai shiang ku mawx ku an laig daux reu tau mai Noax heue. 16Totiag pa mawh mhaing mai shiang kuceu laig ka daux reu awm gumlox pa tawm Simiang Siyiex, khaix an Simiang Siyiex nyeep siviex reu ka kix heue. 17Rawm ca nied ti kheem piang haktiex tixpon ngaix, rawm khankix haok hwan mai yaog reu haok lhaong khaing haktiex heue, 18rawm haok hwan sipie mai ting riang piang haktiex mai reu sibloe piang rawm heue. 19Rawm nied ti haok hwan ting riang mai gawng lua pa koe greem raoma hoik glip khawmuik heue. 20Rawm hoik kheem lhaong khaing gawng lua khankix kao phwan sawk heue. 21Can pa im ju piang tiex, pa mawh sim, totiag tobrie kuceu mai can pa chix mu piang tiex khawmuik mai kawn pui hoik yum heue. 22Can ceu pa im ju, pa toek bhawm ka meeh tix, pa ot piang haktiex kawx yum khawmuik heue. 23Nawh Cao kieh can pa im ju piang haktiex, pa mawh kawn pui, tobrie, totiag pa chix mu chix hu mai sim sai raoma khankix laux leeing heue. Mawh ngie Noax mai can pa ot tau mai nawh daux reu pa klawd ju heue. 24Rawm ting lhaong mai kheem piang haktiex tix yieh tixphwan ngaix heue.
Currently Selected:
YAM JAH 7: WCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012