Yohana 14

Zeso vin̰a ge ɗeme nda mbo Dok Ba ta yà ne

1Sok mbe go, Zeso jan na nda ge ame hateya ma go: Ne kaa ge ḛ dul wa iigi to. Ḛ ho fareba Dok ta, ḛ ho fareba mbi ta waɗme. 2Ge zok ge mbi Ba ne ziya yà, sok kàɗɗa ma go yà gḛḛ. Daa go ne fare ge fareba ne to ɗe, mbi daa mà jan ḛ ne to: Mbi mbo nuusi sok kàɗɗa ɗu ge ḛ pe. 3Sok ge mbi mbo nuusi ḛ sok kàɗɗa mbe ya, mbi mbo gwanna ɔwabe ḛ mbo mbi ta yà, ndwa go ḛ sḛ ma waɗme, ḛ wa mbo kaɗ ge sok ge mbi no ne go. 4Kaɗɗa ge sok ge mbi mbo no ne yà ɗe, ḛ kuwa vin̰a ge gene ndu mbo ne yà kuwa. 5Tomas jan ne go: Bagezok, i kuwa sok ge mo mbo no ne yà to me, i kuwa vin̰a mbe mà pe gyana de? 6Zeso gwan ge ne janna go: Mbi sḛ no gaw, mbi vin̰a ge gene nda mbo Dok ta yà ne, mbi kaɗ fare ge fareba ge ngay nda Dok, mbi kaɗ ndwa ge Dok hon nda ne waɗme. A ge mbi ta ɗu, ndu wa seɗ vin̰a ge mbo Dok Ba ta yà go. 7Daa go ḛ kuwa mbi kuwa ɗe, ḛ daa mà kuwa mbi Ba waɗme. Koo ge sego puy, ḛ kuwa ne kuwa ge mojo̰o̰ ḛ kuwa ne ya mbe no go. 8Filib jan ne go: Bagezok, kaŋ ge i ɓyare ne ge mo ta ɗu, ngay i Dok Ba.

9Zeso gwan ge ne janna go: Mbi kee ya kaal ge ḛ no ga koɗa, Filib! Mo daa jan go mo kuwa mbi to wa? Ndu ge kuwa mbi ya, kuwa mbi Ba. Ge dape mo wa jan go: Ngay i Dok Ba de? 10Mo hoɗ fareba ya go i ge mbi Ba ge ndu ɗu go de? Fare ge mbi jan ḛ num ma no, mbi jan ḛ num ge mbi pagal to. A mbi Ba ge i ge ne no ge ndu ɗu go, kee na tèmel ma ne ndwa huy num wa. 11Ḛ ho fareba ge fare ge mbi jan ḛ pagal go, i ge mbi Ba ge ndu ɗu go. Kaɗɗa go to puy, ḛ ho fareba ge kaŋ keeya mbe ma no pagal. 12Fareba mbi jan ḛ ne no, ndu ge diige ge hoɗ fareba ya mbi ta, mbo kee kaŋ keeya mbe ge mbi kee num no pe ma waɗme. Mbo gwan kee ge waɗe ano mbe ma, ge dape, mbi mbo ge mbi Ba ta yà. 13Kaŋ ge ḛ mbo ele Dok num ya ma peɗ, ge mbi dḭḭl zì, mbi mbo kee ḛ num ndwa go mbi wa ngay pateya ge mbi Ba ne zum. 14Mbi jan ḛ go: Kaŋ ge ḛ mbo ele mbi num ya ma peɗ, ge mbi dḭḭl zì, mbi mbo kee ḛ num.

Wa tii ge Zeso kê ge On̰om ge Harcal pe

Yoh 16.5-15, 33; 1Yo 5.3; 2.3-5

15Zeso jan nda ge ame hateya ma go: Kaɗɗa ḛ laa wa̰a̰ mbi wan, ḛ mbo ge mbi wa yuwaleya ma pagal. 16Kaɗɗa ge mbi, mbi mbo kaɗe Dok Ba, mbo teme ḛ ba ge mbaaya ya, ndwa go ne gaa kàɗɗa ɗiŋ ge din ge ḛ. 17A On̰om jan fare ge fareba ne ge Dok pagal, ge nda ge dunin̰a zì ma mbyaɗ vin ne maa sḛ zì to, ge dape, àa kuwa ne mage wan ne pe to. Kaɗɗa ge ḛ, ḛ kuwa ne kuwa, ge dape a ge ḛ dagre, mbo kaɗ ge ḛ zì me.

18Mbi mbo n̰a ḛ kḛḛne to, mbi mbo gwan-na ḛ ta. 19Sok chal ja zì guwa ge go nda ge dunin̰a zì ma mbo kuwa mbi daa to baɗ. Kaɗɗa ge ḛ, ḛ mbo ka kuwa mbi ge dape, mbi ge ndwa, ḛ sḛ ma mbo kaɗ ge ndwa waɗme. 20Dwam mbe mbo yan ja, ḛ mbo kuwa go i ge mbi Ba ge ndu ɗu go, nè ge ḛ ge ndu ɗu go me. 21Ndu ge koy mbi wa yuwaleya ma, ka mbo num pagal, a ndu ge ne laa wa̰a̰ mbi ne. Mbi Ba laa mbo wan ndu ge ne laa mbo wan mbi ya. Mbi waɗme, mbi mbo ngay ne mbi laa wanna, mbi ngay tene ne ta me. 22Jude ge àa tol ne waɗme go Yudas, ɗaŋɗe, be Yudas Iskariyoɗ to, ele ne go: Bagezok, kee mà pe gyana, mo wa mbo ngay tene ge i ta, be ge nda ge dunin̰a zum ma ta to de? 23Zeso gwan ge ne janna go: Kaɗɗa ndu laa wa̰a̰ mbi wan, mbo koy mbi fare hateya ma. Mbi Ba laa mbo wan ne waɗme. I ge mbi Ba mbo mbo ya ge ne ta, i mbo kaɗ dagre ge ne me. 24Ndu ge ne laa wa̰a̰ mbi to, mbo ge mbi hateya ma pagal to. Fare mbe ge ḛ za̰a̰ mbi jan num ma no, àa mbo ge mbi ta to, ɗaŋɗe, a mbi Ba ge teme mbi ya jin̰a mbi ne go, mbi jin̰a num.

25Zeso gwan jan na nda ge ame hateya ma go iya: Mbi jan ḛ fare mbe ma no ge mbi gale no ḛ ta pe. 26Ɗaŋɗe, Ba ge mbaaya, ndwa go On̰om ge Harcal, ge mbi Ba mbo teme ne ja ge mbi dḭḭl zì, mbo hate ḛ kaŋ ma ne peɗ, voɗ ḛ pagal ge fare ge mbi hate ḛ num ma pagal mɔɗwag me. 27Halas kaa ge ḛ. Mbi gene ḛ ya halas ge ambi. Mbi ee ḛ seɗ halas mbe dinna ge nda ge dunin̰a zum ma seɗ ne go to. Ḛ iigi ta mage kee voo ge fare ge ɓyare mbo no ya ḛ pagal ma pe to. 28Ḛ za̰a̰, mbi jan ḛ go: Mbi mbo mbo, ɗaŋɗe, mbi mbo gwan-na ḛ ta. Daa go ḛ laa wa̰a̰ mbi wan ḛ daa mà kee laa saal ge mbi mbo mbi Ba ta yà pe. Ago, mbi Ba ge hormo gḛḛ waɗe mbi. 29Mbi jan ḛ fare mbe ma ge sego, zḛḛ ge go num dee ya, ndwa go, sok ge àa mbo deɗ ja, ḛ wa hoɗ fareba. 30Mbi mbo gwan siɗigi fare ge ḛ daa mbo kaal to, ge dape, ga̰a̰l ge on̰om ge sone ma way ge wa̰a̰ dunin̰a no na tok go mbo ya go. Ne pool a̰me go fyalag ge mbi pagal to. 31Ɗaŋɗe, mbi kee kaŋ mbe ma peɗ ge mojo̰o̰ mbi Ba ge no pḭḭ ma zì yà ho mbi na wa go, ndwa go, nda ge dunin̰a zì ma kuwa go mbi laa wa̰a̰ ne wan. Ḛ ɗege digi, nè mbo ge sok mbe go.

Currently Selected:

Yohana 14: kiaGRB

Highlight

Copy