Yohana 13

Zeso usi na nda ge ame hateya ma ko

Mat 26.19-20; Mrk 10.35-45; Luk 22.14-18, 24-27

1Zḛḛ dwam ɗu ge go vḛḛso ge Paska ge Yahuɗ ma way dee ya ɗe, Zeso ka kuwa kuwa go na dwam ma mbyaɗ-ɗa go, ge na ɗege ge dunin̰a mbe no zì gwan mbo na Ba ta yà. Ajo̰o̰ na ka ngay laa wanna ɗaɗag ge na nda ge dunin̰a zì ma ta ɗe, ka ngay ne num ta mbe go ɗiŋ mbo swày. 2Sok zam kaŋ zam ge gasamal go ɓanna ge na nda ge ame hateya ma ɗe, Ba ge ho̰o̰l zane waɗ fare ja ge Yudas ge Simo̰ Iskariyoɗ van zì go, ne ɓin̰a Zeso gezi. 3Zeso ka kuwa kuwa go Dok Ba n̰a kaŋ ma peɗ ge na tok go. Ka kuwa kuwa waɗme go na mbo ge ne ta ya, na gwan mbo ne ta yà. 4Ɗege ge sok zam kaŋ zam go, fwage na ba̰a̰ ga̰a̰l gezi, ɔwabe ba̰a̰ wa a̰me ɗu, vwal ne ge na pul go. 5Guwa̰, kan mam ge fal go, ɗege usi na nda ge ame hateya ma ko, ka tigɗi num ge ba̰a̰ wa mbe ge na daa vuwa ne na pul go.

6Sok ge dee ya Simo̰ Piyer ta, ne sḛ jan Zeso go: Bagezok, mo ɓyare go mo usi mbi ko ne de? 7Zeso gwan ge ne janna go: Kaŋ ge mbi kee ne no, mo wan ne pe ge sego to, ɗaŋɗe, mo mbo wan ne pe guwa̰ kaal nde. 8Piyer jan ne go: Go mo sḛ usi mbi ko ma ne ya! Ano mbe kee to baɗ. Zeso gwan ge ne janna go: Kaɗɗa mo ɓyare mbi usi mo ko to, mo mam ndwa ge mbi to. 9Simo̰ Piyer jan ne go: Kaɗɗa na mbe go, Bagezok, usi be mbi ko ma ɗeŋew to, mbi tok mage mbi pagal waɗme. 10Zeso jan ne go: Ndu ge diige ge son tene ya, daa ɓyare gwan son tene ta iya to, [ɗeŋew gaa usi na ko ma], ge dape, ne sok gene ma mɔɗwag kɔn̰al. Ḛ sḛ ma kɔn̰al waɗme, ɗaŋɗe, be ḛ peɗ to. 11Ago Zeso ka kuwa ndu ge mà mbo ɓyan na ya gezi kuwa. A ge pe, jin̰a daa no go: Ḛ kɔn̰al peɗ to.

12Sok ge Zeso tok aa ge na nda ge ame hateya ma ko usiya go, gwan ge na ba̰a̰ ga̰a̰l kanna ge na ta, gwan-na kaŋ zam wa go. Sok mbe go jan num go: Ḛ wan kaŋ ge mbi kee ne mbe pe ya kwaɗa de? 13Ḛ tol mbi ḛ Ba ge hateya koo ḛ Bagezok, ḛ fare temel, a tem mbi nee ne. 14Kaɗɗa go mbi sḛ ge ḛ Bagezok mage ḛ Ba ge hateya usi ḛ ko ma ne ɗe, ḛ sḛ ma waɗme, mbiya go ḛ usi ta ko ma ta buwal zì. 15Ago mbi ngay ḛ kaŋ ko pul, ndwa go ḛ sḛ ma waɗme, ḛ gaa kee ne ta buwal zì dinna ge mbi sḛ kê ne ge ḛ ta go. 16Fareba mbi jan ḛ ne no, moor be waɗe na ndu ge zok ge ga̰a̰l to, koo ndu ge temeya waɗe ndu ge teme na ya ge ga̰a̰l to me. 17Ge sego ḛ wan fare mbe ma pe ya go, ḛ mbo kaɗ-ɗa ka mboya num pagal, ḛ mbo kaɗ ge laa saal.

18«A be ge ḛ pe peɗ, mbi jan fare mbe no to, mbi kuwa nda mbe ge mbi taa num ma kwaɗa. Ɗaŋɗe, ɓyare go fare mbe ge no Njaŋeya ge Dok ne zì wa huy: “Ndu ge paa na tok no dagre ge mbi ge kaŋ zam pagal, seŋe ya mbi pagal.”#Mkm 41.10. 19Ge sego, mbi jan ḛ fare ge ɓyare mbo no ya mbe ya go zḛḛ ge go ne dee ya, ndwa go sok ge mbo deɗ ja, ḛ ho fareba go ne mbi mbe ne gagan̰. 20Fareba mbi jan ḛ ne no, ndu ge diige ge ame ndu ge mbi teme ne, ame mbi #13.20 Ame mbi: A ame ne mo dul wa zì be ge mo diŋ to.sḛ, ndu ge diige ge ame mbi ya, ame ndu ge teme mbi ya.»

Zeso wuwage go Yudas mbo ɓyan na gezi

Mat 26.31-35; Mrk 14.27-31; Luk 22.31-34

21Guwa̰ ge Zeso jin̰a fare mbe ma go, seɗ iigiya ge na on̰om zì, jan zum waŋ go: Fareba mbi jan ḛ ne no, ndu ɗu ge ḛ buwal zì mbo ɓyan mbi gezi. 22Nda ge ame hateya ma ndil ta ndwa, àa wan pe go ne jan fare mbe ge huɗi pagal de to. 23Zeso ndu ge ame hateya a̰me ɗu ge a ngay laa wanna ne ta gḛḛ na ka̰a̰m buwal zì, kaa fiiya se ge Ne kṵwa̰l zì. 24Simo̰ Piyer baa ne ndwa, ndwa jan ne go, ne ele Zeso go, ne jan fare mbe ge huɗi pagal de. 25Ndu ge ame hateya mbe, paa na wa ya ge Zeso tɔgwa zì, ele ne go: Bagezok, a huɗi de? 26Zeso gwan ge ne janna go: A ndu ge mbi mà siɗi dupḛ ya dig, mbi paa ne gii pagal, mbi hon ne ne. Sok mbe go, Zeso siɗi dupḛ dig, paa ne ge gii pagal, hon Yudas ge Simo̰ Iskariyoɗ van ne. 27Sok ge Yudas ame dupḛ mbe go gaw, Saytan waɗ ne zì. Zeso jan ne go: Kaŋ ge mo dwaɗ kee ne, ke ne digi avun cab. 28Ge num ge ame hateya gegene ge kaa kaŋ zam wa go ma buwal zì, ndu a̰me ɗu wan pe go, Zeso jin̰a fare mbe ge dape de to. 29Ajo̰o̰ Yudas ka koy maa bware ne ɗe, nda ge ame hateya ma gḛḛ ka dwaɗ go Zeso jin̰a ne go, ne mbo yaɗ maa kaŋ ge vḛḛso pe ma ya koo ne mbo hon nda ge a̰se ma a̰me fyalag. 30Guwa̰ ge Yudas ame dupḛ mbe go gaw, kale waɗ zum avun cab, sok saa ndwa ya.

Wa yuwaleya ge jin̰al

31Sok ge Yudas wuwa ya zum go, Zeso jan go: Ge sego, Mbi, Van ge Ndu ne, mbi gaa seɗ pateya, Dok mbo seɗ pateya ge mbi ta me. 32[Kaɗɗa go Dok seɗ pateya ge mbi ta ɗe], Dok sḛ mbo ngay pateya ge Mbi ge na Van ne zum waɗme, gaa kee ne kee ge sego. 33Mbi kondore ge laa wanna ma, mbi gaa kaɗ ge ḛ swag boo. Ḛ mbo ɓyare mbi pe, ɗaŋɗe, ge mojo̰o̰ mbi jin̰a Yahuɗ gegene ma ne go ɗe, ge sego, mbi jan ḛ go waɗme: Ḛ mbyaɗ mbo ge sok ge mbi mà mbo ya ne yà to. 34Mbi hoɗ ḛ wa yuwaleya ge jin̰al: Ḛ laa wa̰a̰ ta ge ta buwal zì. Dinna ge mbi laa wa̰a̰ ḛ go, ɓyare go ḛ laa wa̰a̰ ta ge ta buwal zì mbe go waɗme. 35Kaɗɗa ḛ laa wan ta ya ta buwal zì mbe go, mbo ee ndu ge diige kuwaya go, ḛ mbi nda ge ame hateya ma ne.

Zeso wuwage Piyer ne wa ge mà ee ne ya

36Simo̰ Piyer ele Zeso go: Bagezok, mo mbo diya de? Zeso gwan ge ne janna go: Mo mbyaɗ kàre mbi pe ge sego, ge sok ge mbi mà mbo ya ne yà to, ɗaŋɗe, gaa guwa̰ gale kaal nde, mo wa mbo kàre mbi pe ya go. 37Piyer jan ne go: Bagezok, ge dape ɗoo, mbi wa kàre mo pe ge sego to de? Mbi guwa ge hon tene mbo swày ge mo pe. 38Zeso gwan ge ne janna go: Mo guwa ge hon tene mbo swày ge mbi pe ya? Fareba mbi jan mo ne no: Zḛḛ ge go baare ɗege tol fiyaso ge aaram pagal ɗe, mo mbo ee mo wa ndwa taa go, mo kuwa mbi to.

Currently Selected:

Yohana 13: kiaGRB

Highlight

Copy