Yohana 15

Zeso ge mojo̰o̰ on̰or ge fareba go

1Zeso jan na nda ge ame hateya ma go: Mbi on̰or ge fareba ne, mbi Ba ndu ge gaaso on̰or mbe ne. 2On̰or tok ge diige ge no mbi ta ge tol ndwa to, mbi Ba chal ne gezi. Ɗaŋɗe, fete on̰or tok ge diige ge tol ndwa, ndwa nuusi ne go, ne gwan tol ndwa gḛḛ waɗeya. 3Fare ge mbi jin̰a ḛ num ma ɗwabe ḛ ya ɗwabe zoo. 4Ḛ kaa ɓanna dagre ge mbi, ge mojo̰o̰ mbi no dagre ge ḛ go me. On̰or tok hini mbyaɗ tol ndwa to, kaɗ go ne ge on̰or sḛ ta mbḛḛ. Go mbe no ca, ḛ mbyaɗ kee a̰me ge ḛ pagal to, kaɗɗa ḛ kaɗ ɓanna dagre ge mbi to.

5Zeso gwan jan na nda ge ame hateya ma go: Mbi ge mojo̰o̰ on̰or go, ḛ ge mojo̰o̰ ne tok ma go me. Ndu ge ɓa̰a̰ no dagre ge mbi, mbi ɓanna dagre ge ne, go mbe no, seɗ pool ge kee kaŋ ge kwaɗa ma gḛḛ, ge dape, ḛ pool ge kee a̰me hini be mbi to. 6Ndu ge diige ge ɓan dagre ge mbi to, àa dol ne zum yà dinna ge on̰or tok ge nda fete ne go, fin̰a gezi. On̰or tok ge go mbe ma, àa ɔwabe num kan ol zì, àa til gezi me. 7Kaɗɗa ḛ go ɓanna dagre ge mbi, mbi fare ma kaɗ ḛ zì me ɗe, ḛ kaɗe Dok Ba kaŋ ge ḛ ɓyare ne, mbo hon ḛ ne me. 8Ḛ ke tèmel ge kwaɗa ma, ḛ ngay waɗme go ḛ mbi nda ge ame hateya ma ne, go mbe no, ḛ ngay zum pateya ge mbi Ba ne nda ta. 9Dinna ge mbi Ba ngay na laa wanna no mbi ta go, mbi sḛ waɗme, mbi ngay laa wanna ḛ ta mbe go. Ḛ kaa ɓanna ge mbi ge laa wanna ge ambi pe. 10Dinna ge mbi ka mboya ge mbi Ba wa yuwaleya ma pagal go ɗe, ne sḛ ka ngay laa wanna ge na ne mbi ta ɗaɗag me. Go mbe no ca, kaɗɗa ḛ mbo go mbi wa yuwaleya ma pagal, mbi mbo ka ngay mbi laa wanna ge ḛ ta ɗaɗag me.

11Fare mbe ma no peɗ, mbi jin̰a ḛ num ndwa go laa saal ge mbi kee ne no, ḛ ke ne waɗme, ago, ge ḛ ḛ kaa huyya tab. 12Mbi wa yuwaleya no: Ḛ laa wa̰a̰ ta, ta buwal zì ge mojo̰o̰ mbi laa wa̰a̰ ḛ go. 13Kaɗɗa ndu hon tene mbo swày ge na kondore ma pe, ngay go ne laa wa̰a̰ num wan fareba. 14Ḛ gaa mbi kondore ma ne, kaɗɗa ḛ mbo ge mbi wa hoɗɗa ma pagal. 15Go mbe no, mbi daa gwan tol ḛ mbi nda ge tèmel ma to, ge dape, ndu ge tèmel kuwa kaŋ ge na ndu ge zok nuusi tene kee ne to. Mbi gaa tol ḛ kondore ma ge dape, mbi ngay ḛ kaŋ ge mbi Ba jin̰a mbi num ma ya go mɔɗwag. 16A be ḛ sḛ ma taa mbi ne to, ɗaŋɗe, a mbi sḛ taa ḛ ne. Mbi ho̰ ḛ tèmel ge kee kaŋ ma no gḛḛ-gḛḛ, kaŋ ge mbo gaa ya mḛḛya ɗiŋ ma. Go mbe no, mbi Ba mbo hon ḛ kaŋ ge ḛ mbo ele na num ya ma mɔɗwag ge mbi dḭḭl zì. 17Fare ge mbi hoɗ ḛ mbi wa ne pagal go: Ḛ laa wa̰a̰ ta, ta buwal zì.

Ge dape nda ge dunin̰a zì ma wa kuri ḛ de

18Zeso gwan jan na nda ge ame hateya ma go iya: «Kaɗɗa nda ge dunin̰a zì ma laa ɓyare ḛ to, ḛ kuwa go num laa ɓyare mbi to ḛ ndwa zḛḛ. 19Daa no go ḛ ge dunin̰a ne ma ne ɗe, num laa daa mà wan ḛ ge mojo̰o̰ maa nda ma go. Ɗaŋɗe, fare ge kee go num laa ɓyare ḛ to ɗe, a ge mbi taa ḛ ge num buwal zì ya pe, ḛ daa be num nda ma ne to. 20Ḛ duwa ge fare ge mbi jin̰a ḛ pagal: Ndu ge tèmel be waɗe na ndu ge zok ge ga̰a̰l to. Kaɗɗa nda a̰me ma njon̰ mbi, àa mbo njon̰ ḛ waɗme. Ɗaŋɗe, Kaɗɗa gegene ma ame mbi fare ma, àa mbo ame ḛ ḛ ma waɗme. 21Àa mbo njon̰ ḛ ge dape, ḛ ge ambi ma ne. Àa mbo kee ḛ kaŋ mbe ma peɗ ge dape, àa kuwa ndu ge teme mbi ya to. 22Daa no go mbi mbo ya, mbi wa̰a̰ num fare mbe ma pe no to ɗe, àa daa mà kaɗ nda ge kee sone ma to. Ge sego, num wa eeya a̰me ge maa sone mbe ma pe daa be gaa to baɗ. 23Ndu ge diige ge ne laa ɓyare mbi to, ne laa ɓyare mbi Ba to waɗme. 24Àa daa mà kaɗ nda ge kee sone ma to, daa no go, ge num buwal zì, mbi be kee kaŋ keeya ge ndu a̰me ge ɗogle kê num pe ma ɗu to. Ge sego ge àa kuwa num ya no puy, àa gwan kuri mbi kuri, àa kuri mbi Ba me. 25Ɗaŋɗe, ano mbe dee ya keeya ndwa go, fare ge njaŋe no num eeya zì ma wa huy: “Àa kone mbi bàŋ ɗar.”#Mkm 35.19.» 26Sok ge Ba ge mbaaya mbo mbo ja, ne ge mbi mbo teme ḛ ne ja ge mbi Ba ta ya, ndwa go On̰om ge fareba, a ne mbo kee mbi sayda ne me. 27Ḛ sḛ ma waɗme, ḛ mbo kaɗ nda ge kee mbi sayda ma ne, ge dape, ḛ kaa ya dagre ge mbi, ge sok ge mbi ee pe hon hateya ma ya go day.

Currently Selected:

Yohana 15: kiaGRB

Highlight

Copy