Romanos 2

I Dios ku'at tzij lik chrij usuk'

1We yet kakoj umak jun awachi'il are k-on jun utz taj, nti kawesaj wi awib' uri chwach we xaq ka'an yet pacha ku'an ire. Xa tojb'al mak uri katzukuj pawi yet. 2Qeta'am chi Dios lik suk'ul i atb'al tzij ku'ano are ku'at tzij pkiwi i je aj-anol taq i utz taj le. 3We yet ka'at tzij puwi i jun, xaq xa ka'an yet pacha kki'an ike, ¿Xatab'a i Dios kuya ti tojb'al mak uri chawe? Kuya'o. 4K'amaja ni kuya pawi man ktijin chuya'ik unimal uk'ux chawe. ¿Aweta'am ti b'awa chi lik nim i rutzil uk'ux i Dios? ¿Aweta'am taj chi ire lik utz uk'ux, at roy-em na chi kajalwachij anojb'al? 5Xwiri yet lik at b'uy, kawaj ti kajalwachij ak'ux chwach i Dios; rumali xa kattijin chunimarsaxik amak chi kpe ni pawi are kuriq i ij re tojb'al mak are ku'an i Dios i suk'ul laj atb'al tzij. 6Man i Dios kuya tojb'al re chqe chqajujunal chrij wach i qa'anom. 7Kuya i k'aslemal chi kk'is ti chik chke ni'pa i kkimayij ti u'anik i utz, riqb'al re ki'ij chwach i Dios, xaq i kikotemal chila chikaj xaq i utz chi kk'is ti chik. 8Xwiri i Dios lik kutaq na li tojpen pkiwi ni'pa i kkitzukuj i to' ke ike, chi kekojon ti che i saq laj tzij re i Dios, chi to' kkaj u'anik i utz taj. Ktzaq ni roywal i Dios pkiwi ike le. 9Kpe ni uyej, kpe ni k'ax pkiwi konojel i winaq chi kki'an i utz taj; xaq kpe ni k'ax pkiwi i ne te aj Judío, xwiri mas nim i k'ax kpe ni pkiwi i aj Judío chi kki'an i utz taj. 10Xwiri ni'pa i kki'an i utz, i Dios kuya chke koksax ni ki'ij, kichomal, xaq i chomb'al ib' chke konojel. Lik keje ile kuya chke i aj Judío winaq, xaq chke i ne te aj Judío. 11I Dios xaqjun i kilik ku'an chke konojel i winaq.

I u'atb'al tzij ma Moisés

12Ni'pa xketamaj ti utzij upixab' i Dios chi tz'ib'tal kan rumal i mam Moisés, ike we ki'anom kimak, ksachsax ni kiwach, xwiri are ti u'atb'al tzij i mam Moisés ku'at tzij pkiwi. Xwiri i jub'an chik chi keta'am, we ki'anom kimak are i atb'al tzij le kub'ij chke chi kpe ni tojb'al mak pkiwi. 13I winaq chi je utz chwach i Dios je are ike chi kkikoj ni'pa utzij. I winaq chi to' kkita i ujer atb'al tzij, xaq kki'an taj, ike je are ti i je suk'ulik chwach i Dios. 14Man i winaq chi ne te aj Judío, ike kekojon che utzij upixab' i Dios, tupu keta'am ti uwach xwiri ike keta'am wach i utz chi kki'ano xaq wach i utz taj. 15-16Are kki'an keje ile, kki'aljinsaj uri chi ni'pa i kub'ij i atb'al tzij, chi lik pacha tz'ib'tal pkik'ux. Kkina pkik'ux we utz i ki'anom, xaq we utz taj. Are kuriq i ij chi Dios ku'an u'atb'al tzij pkiwi i winaq, i kinojb'al ku'an chke chi kkina'o we utz i ki'anom, o we utz taj. I Dios kuya pu'ab' i Jesucristo ku'at ni tzij pkiwi wach taq kich'ob'om pkik'ux. Keje ile kub'ij i utz laj tzij k'ak' re i Dios chi kintijin yin chupaxsaxik.

17Chata pe', yet ka'an nim che awib' xa rumal at aj Judío winaq. Ka'an nim che awib' man at chatal rumal i Dios; kul ak'ux che i atb'al tzij tz'ib'tal kan rumal i mam Moisés. 18Qatzij, aweta'am wach kraj i Dios chawe, aweta'am wach i utz kmajaw chawe chi ka'ano man o i atb'al tzij le awu'. 19Rumal i atb'al tzij le, kab'ij yet lik at saqil aj-ok'anel b'e chke i je mawach; kab'ij yet at pacha jun ajtzijol a' chke i je o pa equm. 20Kab'ij yet lik at utz laj ajk'utunel chke i kkita ti ub'e utzij i Dios; kab'ij yet at utz laj ajtijonel chke i k'ate ktijin kinawik. Keje ile kach'ob' yet man aweta'am i atb'al tzij chi tz'ib'tal kan rumal i mam Moisés. Rumal i atb'al tzij le kab'ij yet lik ronojel aweta'am, xaq at rajaw i saq laj tzij. 21Lik keatijoj i jub'an, kab'ij yet. ¿B'uchak uri katnaw ti yet chu'anik pacha i kak'utu? Yet kak'utu chi utz taj k-an ela'; ¿B'uchak uri katel-anik? 22Kak'utu chi utz taj we jun winaq kumin rib' ru' jun chi k'ulinaq ti ru'. ¿B'uchak uri ka'an yet? Kab'ij yet chi utz taj kok ki'ij ni'pa i k'exwach je antalik, ¿B'uchak uri katok pa taq kachoch tiox xaq kawel-aj ub'itaq ke chke? 23Yet to' nim a'anom che awib', man chawe yet xya' wi i atb'al tzij tz'ib'tal kan rumal i mam Moisés. Xwiri, yet aqajsam u'ij i Dios man katkojon ti che u'atb'al tzij le. 24Xe'eloq pacha i tzij chi tz'ib'tal chupam Uwuj i Dios chi keje iri kub'ij: “I ne te aj Judío winaq k'ax kech'aw che i Dios iwumal yix.”

25Nti kuchakuj we o jun antal circuncisión che we kkojon ti che i atb'al tzij chi tz'ib'tal kan rumal i mam Moisés. We kkojon ti che ke'eloq chi antal ti circuncisión che. 26Jun winaq, we antal ti circuncisión che, xwiri we ku'ano pacha kub'ij i ujer atb'al tzij re mam Moisés, i Dios lik ku'an ni re Ire che tupu antal ti i circuncisión che. 27Jun winaq chi antal ti circuncisión che uch'akul xwiri we kkojon che i atb'al tzij, are ire uri ku'at ni tzij pkiwi i antal i circuncisión chke, tupu o te i atb'al tzij pi'ab' xwiri kekojon ti che. 28Man we at Judío, ile xwi ti rumal ka'an taq i anik chi kki'an ike xaq rumal ti taq i circuncisión che ach'akul, ile ke'eloq chi xwi ti rumal i ka'an ru' i ach'akul, kat-on taq Judío. 29I mer saqil aj Judío winaq are kekojon che u'atb'al tzij i Dios, i je are ti kekojon che ki'atb'al tzij i winaq re uwach i jyub' ta'aj. Lik je are aj Judío winaq ile chi k'ax keuna i Dios, tupu i winaq re uwach i jyub' ta'aj tzel kekilo.

Currently Selected:

Romanos 2: ACHICUB

Highlight

Copy