Romanos 1

Ma Pablo kutz'ib'aj xaq kutaq b'i rutzil kiwach aj Roma

1Yin in ma Pablo in o pa k'ax pu'ab' i wajaw Jesucristo, man i Dios xinusik'ij che inpatani chi in apóstol, xaq xinutaq b'i chupaxsaxik i utz laj tzij k'ak' re i Dios.

2I Dios ax usujum wi chik chupam Uwuj chi ub'im kan Ire chkij i profeta. 3I tzij le are i lapanik chrij i Qajwal Jesucristo chi Uk'ojol i Dios. Ire, are xalax chwach i jyub' ta'aj lik keje pacha konojel i winaq, man are jun chke umuq uxikin i mam David, 4xwiri, Ire lik Uk'ojol i Dios, lik nim ucho'ab'; ile lik x-aljinsax chqe rumal i Lo'laj Utewal i Dios are xwalij i Jesucristo che i kamik.

5Rumal i Cristo chi i Dios uya'om chwe chi in apóstol re kin-an inpatan, man ni'pa i tinimit chwach i jyub' ta'aj, o ni winaq kkikub'a ni kik'ux che, xaq kki'an na pacha i kub'ij, 6-7Xaq keje yix, ix usik'im ru', iwonojel ix aj pa Roma chi kixkojon che i Jesús; i Dios lik k'ax kixuna'o, xaq ix usik'im re ku'an chiwe chi lik ix re Ire, xaq lik ix ukwenta chik jun ch'am laj tinimit. I Qaqajaw Dios xaq i Ajwal Jesucristo chkiya utzil chomal chiwe, xaq i uxlanb'al k'uxij chi kpe ru' Ire.

Tioxinik che i Dios

8Nab'e kwaj kinb'ij chiwe, kintioxij che in-Dios, iwumal yix, pub'i i Qajwal Jesucristo, man lik xaipa lik chom i lapik k-anik, xaq lik etamam chi ikub'am ik'ux che i Dios, xaq lik ki'ano wach i kub'ij. 9Are kinlapan ru' i Dios lik arewi kintz'onoj piwi yix; i Dios are Ajsaqinel Tzij che i xinb'ij le, xaq lik ru' ronojel ink'ux, inya'om wib' chub'ixkil i utz laj tzij k'ak' chrij Uk'ojol. 10Xaq are kinlapan ru' i Dios lik kintijin chutz'onoxik che chi we kraj ire kixewila uri pacha inch'ob'om. 11Lik kwaj kixinsolij yab'al jub'i' nojb'al re i Dios pik'aslemal, jikb'al re ik'ux che ire. 12Are kwaj yin chi kqaya ni ukowil qak'ux chqawach, rumal i ukub'ib'al ik'ux yix xaq i we yin.

13Ix, wachalal chwach i Cristo, kwaj kiwetamaj chi k'iyalmul inch'ob'om chi kixewila, xwiri lik o uya'om rib' pinb'e rumali chi in enaq taj. Kwaj yin kin-an ni chke jujun chila chi xaq ike kkijach ni kib' pu'ab' i Cristo, keje pacha in-anom pa taq jub'an chik tinimit. 14Yin chinqul o wi uk'utik chke konojel, nti k-ono we je tijojtalik winaq o we ne te tijojtalik, we o keta'am o nti keta'am, yin pacha taq o ink'as ku'. 15Rumali chi lik kwaj yin xaq kintzijoj i utz laj tzij k'ak' re i Dios chiwe, chi ix o chila pa Roma.

Ucho'ab' i utz laj tzij k'ak' re i Dios

16Yin kink'ix ti chub'ixkil i utz laj tzij k'ak' re i Dios, man ile lik o ucho'ab', man konojel ni'pa i kkikojo lik ketotaj na. Nab'e usujum ile chke i aj Judío winaq, te'uri chke i ne te aj Judío. 17I utz laj tzij k'ak' le lik kuk'ut chqe wach u'ankil chi nti qamak chwach i Dios. I u'ankil ku'an chqe are rumal ukub'ib'al qak'ux che i Ajwal; xa rumal ukub'ib'al qak'ux che i Dios ku'an utz laj taq winaq chqe. Man keje iri tz'ib'tal chupam uwuj i Dios ujer: “I utz laj winaq rumal ukub'ib'al uk'ux che i Dios lik kk'asi na.”

Kimak i winaq chwach i Dios chi kekojon ti che Ire

18I Dios uk'utum chqe chi o i nim laj tojb'al mak kpe ni chikaj pkiwi konojel i je aj-anol mak chwach Ire, xaq i je aj-anol utz taj chke i winaq, ru' ile kki'atij i retamaxik i saq laj tzij re i Dios. 19Ni'pa i qeta'am chi re i Dios, ike lik keta'am chik, man lik are Ire xuya retamaxik chke. 20Ni'pa ile kqil ti ru' qab'a'wach, xwiri lik qeta'am chi olik, man ax u'aljinsam wi loq k'a chuxeb'al ij saq. U'aljinsam chqe ru' ni'pa uyijb'am ire; rumali i ajmak laj taq winaq kkesaj ti kib' chwach. 21Keta'am chi ire lik Dios, xwiri kikojom ti u'ij pacha i kmajaw che xaq kitioxim ti che. Rumali, chi ni'pa i kkich'ob'o nti uchak chke; i kinojb'al lik xsachik, kkil ti chik ub'e wach taq i utz xaq wach i utz taj. 22Kkib'ij chi lik o kino'oj, xwiri xki'an che kib' chi nti kinojb'al. 23Xkikoj ti u'ij i Dios chi ronojel ij saq k'aslik; xa are xkikoj u'ij i jalajuj taq tiox chi ki'anom ike ru' ki'ab', kik'exwach chikop, pacha taq i tz'ikin, kumatz, xaq i chikop chi kajib' kaqan.

24Rumali i Dios xero'taj i winaq chupam i kimak; xuya chke chi kki'an ni'pa i kkaj u'anik; rumali chi xe'ok chu'anik i ch'am taj chkiwach chi lik k'ixb'al rilik. 25Keje ile xki'ano man kikojom ti saq laj tzij re i Dios, xa kikojom ki'ij ni'pa i u'anom i Dios; xkikoj ti u'ij i Dios chi x-anaw ni'pa i olik. Are ire lik kmajawik kqakoj u'ij k-e ij saq chrij. Amén.

26Rumali i Dios je ro'tam chu'ankil i utz ti laj taq urayijb'al kich'akul chi lik k'ixb'alil. I ixoqib' kkaj ti chik u'anik urayijb'al kich'akul ku' achiyab' xa xki'an urayijb'al kich'akul chkiwach ike je ixoqib'. 27Xaq keje xki'an i achiyab' ile, man xki'an ti chik urayijb'al kich'akul ku' i kixoqil, are i xki'ano xjech'ab' i kinojb'al man xe'ok chu'anik urayijb'al kich'akul chkiwach je achiyab'. Kki'an nimaq taq k'ixb'alil chkiwach; kitukel xkipetsaj i tojpen pkiwi rumal i utz taj chi kki'ano.

28Xwiri ike kkikoj taj chi ire lik Dios, rumali xero'taj pu'ab' i itzel laj taq nojb'al. Xuya chke chi kki'an ni uri wach taq i kmajaw taj. 29Ike lik kiya'om kib' chu'anik itzel taq anik; to' kki'an i utz taj; xaq kkirayij uwach ub'itaq ke chkiwach; to' kpe koywal che i jun chi utz olik, to' kekamsanik; to' ch'oj kki'ano; to' ket'oronik; to' kkinuk' tzij chkij i jub'an chik. 30To' k'ax kech'aw chkij i jub'an; tzel kkil i Dios; kkiya ti ki'ij i winaq; to' kki'an nim che kib', kkina taq ike lik nim ki'ij. Lik arewi kkich'ob' u'anik i utz taj chi kki'an ti te'eq; xaq kekojon ti chke i kiqajaw kichuch. 31Kkaj ti kkita ub'e i utz; kki'an taj pacha i kkib'ij; lik mijun o k'axnab'al kik'ux che; xaq mijun kkil tob'al uwach. 32Ike keta'am wach ub'im i Dios chi ku'an na: Ire ub'im chi ni'pa i ke'anaw keje ile, kmajaw chke chi kekamik. Xwiri ike b'i ke che ile, man k'a ketijin chu'anik. Xwi ta la ile, xaq kekikotik we o jub'an chik keje kki'an ile.

Currently Selected:

Romanos 1: ACHICUB

Highlight

Copy