Romanos 15

Terejik chrij i utz chi xu'an i Cristo

1Yoj chi lik o ukowib'al qak'ux che i Dios, o uchak o unimal qak'ux chke i qas ti o ukowib'al kik'ux tob'al ke chupam i kik'achirik. Mqa'an taq i xwi kumaj qawach yoj. 2Qonojel yoj o uchak kqa'ano pacha i utz kkil i qachalal. Keje ile chqa'ana tob'al ke che i kik'aslemal chwach i Dios, xaq yab'al re ucho'ab' kik'ux. 3Chqa'ana pacha xu'an i Cristo. Ire xu'an taj pacha i to' xraj Ire, kojb'al taq u'ij. Xwi xu'ano pacha xraj i Uqajaw, tob'al qe yoj. Xuch'ijo, pacha kub'ij i tziji chi tz'ib'tal kan chupam uwuj i Dios ujer: “Are xatkiyo'ya, Lo'laj Dios, chwij yin xtzaq wi i yo'yanik le.”#15.3 Keje ile tz'ib'talik: Salmos 69.9. 4Ni'pa i tz'ib'tal kan ujer chupam uwuj i Dios, are tijojb'al qe yoj. Tz'ib'tal kanoq tob'al qe xaq yab'al unimal qak'ux. Rumali lik kul qak'ux che chi lik kqariq ni utz'aqatsaxik usujunik i Dios chqe. 5Lik qatzij, ru' i Dios kpe wi unimal qak'ux, xaq i ukowil qak'ux. Kintz'onoj che Ire chi kixuto ni yix, man keje ile lik junam ik'ux chu'anik i utz, chrij pacha i terejik chrij i Jesucristo. 6Man keje ile lik konojel, kkikoj ni u'ij i Dios chi are i Uqajaw i Ajwal Jesucristo.

7Rumal uri chiwaj iwib' chiwach chijujunal; xaqjun pacha xu'an i Cristo are xojuk'ulaj ru'. Keje ile chi'ana, kojb'al re u'ij i Dios. 8Kinb'ij chiwe, keje ile chi'ana man i Jesucristo xu'an ajchak che rib' chkij i aj Judío winaq. Anb'al re pacha usujum kan i Dios chke i qatit qamam ujer; kuk'utb'ej re chke chi Dios lik ku'an na pacha i ub'im kanoq.#15.8 Ub'im kan chke chi kutaq li jun ajtol ke, ile are i Cristo xk'unik. 9Ire xaq xk'un kumal i ne te aj Judío winaq, man utz kkikoj ni u'ij. Xaq lik kkik'amwaj kkitioxij che i Dios, man xril tob'al kiwach. Man chupam uwuj i Dios, keje iri tz'ib'talik:

Rumali kinb'ij a'ij chkixol i tinimit;

kinb'ixaj i b'ix kojb'al re a'ij.#15.9 Keje ile tz'ib'talik: 2 Samuel 22.50; Salmos 18.49.

10Xaq kub'ij jun chik tziji chupam uwuj i Dios:

Yix chi ix aj Israel taj, lik chixkikotoq junam ku' i tinimit re i Dios.#15.10 Keje ile tz'ib'talik: Deuteronomio 32.43.

11Xaq kub'ij jun chik tzij chi tz'ib'talik:

Nimaq taq tinimit, tinimit, iwonojel.

Chikojo u'ij, i Ajwal.#15.11 Keje ile tz'ib'talik: Salmos 117.1.

12I mam Isaías xaq o tzij xutz'ib'aj, chi keje iri kub'ij:

K-on panoq kel ni jun che umuq uxikin i ma David, chi uk'ojol kan i mam Isaí;

kya' ni upatan pkiwi konojel i nimaq taq tinimit

i winaq lik che ire kkikub'a wi kik'ux.#15.12 Keje ile tz'ib'talik: Is 11.10.

13I Dios, chi kuya pqak'ux chi lik kqil na wach i kusujuj chqe. Ire lik kixukikotsaj, xaq kuya ni utz olem pik'ux, ile lik rumal ukub'ib'al ik'ux che Ire. Yix, kul ik'ux che chi kiriq na wach usujum i Dios chiwe. Rumal i Lo'laj Utewal i Ire.

I chak re i k'utunik rumal i ma Pablo

14Yin, wachalal chwach i Cristo, kul ink'ux chiwe chi lik nim i rutzil ik'ux chke konojel, xaq lik nim inojb'al che i wach rajwaxik che i b'e re i Dios; xaq lik kixtiki chuya'ik inojb'al chiwach. 15Xwiri, wachalal, xinkowij jub'i' inwach chutz'ib'axik i tziji chiwe; xin-ano man utz ksach ti chik'ux i tzij k'uttal chiwe. Kin-ano man xaq are inpatan chi yatal chwe rumal i utzil chomal re i Dios. 16In utaqom, chi in rajchak i Jesucristo chke i ne te aj Judío winaq; inchak are ub'ixkil chke wach i utz laj tzij k'ak' re i Dios chi petnaq chikaj. Keje ile kin-ano kinyab'ej ke chwach i Dios je pacha jun utz laj sipon, jun sipon chi antal chom che rumal i Lo'laj Utewal i Dios.

17I lo'laj chak chi uya'om i Dios chwe, chom ktijin relik, lik o usuk' uri chi kinkoj in-ij pub'i i Jesucristo man lik are Ire ktijin chinto'ik. 18Yin we o i kinkowij inwach chub'ixkil, lik xwi kinb'ij ni'pa taq u'anom i Jesucristo wumal yin chi kinb'ij utzij, anb'al re chke i ne te aj Judío chi kekojon che i Dios. Iri antajnaq lik ru' intzij xaq ru' wach taq in-anom. 19I nimaq taq anik xaq nimaq taq ilb'al re chi in-anom, lik ru' ucho'ab' i Lo'laj Utewal i Dios in-anom wi. Lik inpaxsam uwach utzijol, i utz laj tzij k'ak' re i Cristo. Lik xinjeq ub'ixkil k'a pa Jerusalén, te'uri xaq xinb'ij pa taq komon chila, te'uri xin-e k'a pa ulew Ilírico. 20Keje ile, xintij in-ij chub'ixkil ipa paxsam ti wi utzijol chi o i utz laj tzij k'ak' re i Cristo chi petnaq chikaj. Man i chak chi o chinqul are ub'ixkil utzij i Cristo ipa b'ital ti wi, keje ile nti jun k'utunik kinya taq puwi jun chik. 21Kwaj yin ke'eloq pacha i tziji chi tz'ib'tal chupam uwuj i Dios ujer:

Ni'pa i kitom ti utzijol, kkita na;

ni'pa i kitom ti ub'e, kketamaj na.#15.21 Keje ile tz'ib'talik: Isaías 52.15.

I ma Pablo kuch'ob' enam pa Roma

22Wachalal, k'iyalmul inch'ob'om enam pa Roma chisolixik yix, xwiri in enaq taj. Man lik latz'arnaq inwach chub'ixkil i utz laj tzij k'ak' re i Dios. 23Xwiri wo'or ya xinutzin chkisolixik ni'pa taq i winaq che taq i ulewi. Rumali, ya kin-ano pacha ax inch'ob'om wi chi kinupon iwu' chisolixik. 24Inch'ob'om chi kinik'aw ni iwu' are kin-e España; we kinik'aw chiwilik, tupu naj ti kein-ana iwu' moq kinito jub'i' che wach i rajwaxik chwe, keje ile kintiki che in-enam. Keje ile kinkikotik kin-ek, man rilom chik rib' qawach iwu'. 25Xwiri wo'or o uchak kin-e Jerusalén, kink'amb'ej b'i re jub'i' pwaq chi moltajnaq tob'al ke i qachalal chwach i Cristo aj chila. 26I qachalal aj pa Macedonia xaq i aj pa Acaya xkich'ob'o chi kkimol jun sipon re kekito pan i qachalal chwach i Cristo chi je nib'a' pa Jerusalén.#15.26 1 Corintios 16.1-4; 2 Co 8—9.

27Lik xkina pkik'ux chi utz kekito, tupu lik o chkiqul u'anik, man i ne te aj Judío winaq pacha o kik'as ku' i qachalal chi je aj Judío winaq, man ike xek'utuw i utz laj tzij re i Dios chke i ne te aj Judío. Rumali wo'or ike kmajawik kkijach jub'i' ub'itaq ke chke i qachalal aj Judío le. 28Are kinutzin che inchak le, xaq kink'is ujachik i sipon chke, te'uri kinmaj b'i inb'e k'a España. Are uri kinik'aw iwu'. 29Lik qatzij, are kinupon iwu', weta'am chi lik wok'am b'i nim laj utzil chomal re i Cristo chiwe.

30Wachalal chwach i Cristo, lik kintz'onoj utzil chomal chiwe ru' i k'axnab'al qak'ux chi kuya i Lo'laj Utewal i Dios, chi kinito ru' inchaki, kintz'onoj utzil chiwe chi chqa'ana junam che qib', lik rumal i Qajwal Jesucristo, che utz'onoxik che i Dios pinwi yin. 31Chitz'onoj che i Dios chi kinuto ni chkiwach i aj Judea winaq chila chi kkaj ti ukojik utzij i Cristo. Xaq chitz'onoj che i Dios puwi i pwaq chi kink'am b'i chke i qachalal chwach i Cristo aj Jerusalén chi lik utz uk'amik kki'ano. 32Man keje ile, kinkikotik kinupon iwu'. We kraj i Dios, kinuxlan jub'i' iwu' chila. 33I Dios chi kuya i utz laj olem pqak'ux, kintz'onoj che chi o ni iwu' chijujunal. Keje ile ch-antaj na.

Currently Selected:

Romanos 15: ACHICUB

Highlight

Copy