Romanos 14

Jalajuj taq usuk' u'atik tzij

1We o jun winaq kkojon che i Dios chi k'amaja qas kuta ub'e i k'utunik re i Cristo, chik'ulaj iwu'; xaq mi'an ch'oj ru', we xaqjun ti ich'ob'onik. 2Pacha taq iri, o jujun kkich'ob'o chi is utz wach i ktijawik, xwiri o jujun qas ti jikil kik'ux xaq kkib'ij ike chi xwi ichaj utz ktijawik re uti'b'alil kiwa. 3Xwiri i jun chi kuch'ob'o chi ronojel is utz ktijawik, muk'aq b'i u'ij i jun chi ronojel ti b'iroxik kutijo. Xaq i jun chi o i b'iroxik chi kutij taj, much'ach'a i jun chi is kutijo man chwach i Dios oj xaqjun qonojel. 4¿Ix pachin yix chi ki'at tzij puwi i rajchak jun chik? Ile are i rajaw uchak k-ataw ni tzij puwi we utz u'anik uchak ku'an che xaq we utz taj. Jun, we saqil laj rajchak i Dios, utz uri kel uchak man o ucho'ab' i Dios ru'.

5Kinb'ij chik jun k'utb'al re: O jujun kkib'ij chi o taq jun ij mas nim u'ij chkiwach jun chik. Xaq o i keb'inik chi ronojel taq i ij is je xaqjun, lik mijun o u'ij. Chqajujunal wi chqach'ob'o usuk', te'uri chqa'ana pacha i kqana pqak'ux chi suk'ulik. 6Pachin kukoj pajil jun ij, kojb'al u'ij i Ajwal, chu'ana. Xaq pachin jun chi xa b'iroxik kutijo, xaq ile kuch'ob'o chi kojb'al u'ij i Dios ku'ano, kutioxij che i Dios, xaq xaqjun uri ru' i jun chi kutij taj, keje ile ku'ano man xaq oksab'al re u'ij i Ajwal, xaq kutioxij che i Dios.

7I qak'aslemal xaq i qakamik pqa'ab' ti yoj o wi, xwi pu'ab' i Ajwal o wi. 8Man we oj k'aslik, kojb'al re u'ij i Ajwal; we xojkamik xaq kojb'al re u'ij i Ajwal. Ke'el uri, we oj k'aslik, o we xojkamik, oj re i Ajwal. 9Man i Cristo xkamik, xaq xwalij chkixol i kamnaq, man ke'eloq chi are Ire Ajwal pkiwi i je k'aslik xaq pkiwi i je kamnaq.

10¿B'uchak uri yet kayo'ya i awachalal chwach i Cristo? ¿Xaq b'uchak tzel kawilo? Man lik qonojel kqak'ut ni qib' chwach i Dios man Ire ku'at ni tzij pqawi chqajujunal. 11Qeta'am ile, man chupam uwuj i Dios keje iri tz'ib'talik: Kub'ij i Ajwal:

“Lik kinb'ij na:

Chi konojel kexuki ni chinwach yin;

xaq konojel kkib'ij na chi xwi Yin in Dios.”#14.11 Keje ile tz'ib'talik: Isaías 45.23; Filipenses 2.10-11.

12Qonojel uri, chqajujunal kqab'ij ni chwach i Dios wach i qa'anom chi chwach i jyub' ta'aj.

13Rumali, mqayo'ya chik qib'. Are chqana qib' wach kojtijin yoj chu'anik; moqxa o taq i kqa'ano, i qachalal chwach i Cristo xa ketzaq taq rumal i kqa'ano le. 14Yin weta'am chi ni'pa i b'iroxik lik utz nti jun ch'am taj; yin in kojonnaq chik che i Ajwal Jesucristo rumali kinb'ij ile. Xwiri we o jun kuch'ob'o chi jun b'iroxik lik ch'am taj, xaq lik ch'am ti uri che i Jesús. 15We yet, rumal wach taq i katijo, ka'an che i awachalal chwach i Cristo chi kaqajsaj ukowil uk'ux, nti k'axnab'al ak'ux uri che. I Cristo xkam rumal ire, ma'an uri che chi ksachik xa rumal wach i katij yet. 16Cha'ana i utz man keje ile i winaq k'ax ti kech'aw chrij i utz chi ka'ano le. 17I usuk' i qa'olem pa ajawinik re i Dios are ti wach taq i kqatijo, wach taq i kqatu'u; are wach taq kpe ru' Lo'laj Utewal i Dios are i qak'aslemal suk'ulik, utz olem, xaq i kikotemal. 18We keje ile kojtijin chu'anik chwach i Cristo, i Dios kkikot uri qu', xaq i winaq, utz kojkilo.

19Rumali chqatzukuj i utz olem chqawach; chqatzukuj uto'ik qib' chunimarsaxik i qak'aslemal chwach i Dios. 20Mqayoj uchak i Dios chqaxol xa rumal wach taq i kqatijo. Qatzij, ronojel i ktijawik, is ch'am chwach i Dios, xwiri utz ti kqa'ano we o i kqatijo chi xa kutzaqsaj jun qachalal chupam umak. 21Mas utz we kqatij ti ti'ij, xaq we kqatu' ti uwa'al uva muqb'am, xaq mqayinya uwach jun b'iroxik we xa tzaqsab'al re i qachalal chwach i Cristo kqa'ano. 22We qeta'am chi Dios utz krilo wach i kojtijin chu'anik, utz uri qe yoj, xwiri o uchak xwi yoj qeta'am chwach i Dios. Utz ke i winaq chi utz kkina ru' i wach i kki'ano. 23Xwiri we kqach'ob' taj we utz xaq we utz taj kqatijo, chrijil chik ile we xqatijo, kojmakun uri. Man nti ukub'ib'al qak'ux, keje ile ke'eloq, man kqana pqak'ux chi utz ti kqa'ano. We o taq kqatijo are xa keb' qak'ux chutijawik, kojmakun uri.

Currently Selected:

Romanos 14: ACHICUB

Highlight

Copy